ޖަނަވަރީ މަހު ރާއްޖެއަށް 4.2 ބިލިއަން ރުފިޔާގެ މުދާ އިމްޕޯޓްކޮށްފި

ޖެނުއަރީ މަހު ރާއްޖެއަށް 4.8 ބިލިއަން ރުފިޔާގެ މުދާ އިމްޕޯޓްކޮށްފިއެވެ.

ފާއިތުވި ޖެނުއަރީ މަހު ރާއްޖެއަށް އިމްޕޯޓް ކުރެވުނު މުދަލުގެ ސީ.އައި.އެފް އަގު 2020 ވަނަ އަހަރުގެ ޖެނުއަރީ މަހާ އަޅާބަލާއިރު 49 އިންސައްތަ އިތުރުވެފައިވާކަމަށް މޯލްޑިވްސް ކަސްޓަމްސް ސަރވިސްއިން ވަނީ ބުނެފައެވެ. ފާއިތުވި ޖެނުއަރީ މަހު ދައުލަތަށް ލިބުނު އާމްދަނީ, 2021 ވަނަ އަހަރުގެ ޖެނުއަރީ މަހާ އަޅާބަލާއިރު 30 އިންސައްތަ ވަނީ އިތުރުވެފައެވެ. 2020 ވަނަ އަހަރުގެ ޖެނުއަރީ މަހު 240 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ ޖެނުއަރީ މަހު މި އަދަދު ވަނީ 314 މިލިއަން ރުފިޔާއަށް ދަށްވެފައެވެ.

ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ ޗައިނާ, އޮމާން އަދި އިންޑިއާއެވެ. ޗައިނާއިން 20 އިންސައްތަ މުދާ އެތެރެކޮށްފައިވާއިރު, އޮމާނުން 14 އިންސައްތަ މުދާ, އަދި އިންޑިއާއިން 12 އިންސައްތަ މުދާ ފާއިތުވި މަހު ވަނީ އެތެރެކޮށްފައެވެ. ރާއްޖެއިން އެންމެ ގިނައިން މުދާ އެކްސްޕޯޓްކޮށްފައިވަނީ ތައިލޭންޑަށެވެ. އެގޮތުން ތައިލެންޑަށް 54 އިންސައްތަ މުދާ އެކްސްޕޯޓްކޮށްފައިވެއެވެ. އަދި އިނގިރޭސިވިލާތަށް 10 އިންސައްތަ މުދާ، މޮރިޝަސްއަށް 12 އިންސައްތަ މުދާ އެކްސްޕޯޓްކޮށްފައިވާ ކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.

ޖެނުއަރީ މަހު ރާއްޖެއަށް ޕްރޮސެސްކުރެވުނު ޑިކްލަރޭޝަންއާއި ރާއްޖެއިން ބޭރުން އައިސްފައިވާ އުޅަނދާއި، ރާއްޖެއިން ފުރާފައިވާ އުޅަނދުފަހަރުގެ އަދަދު ވެސް ވަނީ އިތުރުވެފައެވެ. މި އަހަރުގެ ޖެނުއަރީ މަހު ރާއްޖެއަށް ޕްރޮސެސްކުރެވުނު ޑިކްލަރޭޝަންގެ އަދަދަކީ 19,873 އެވެ. 2020 ވަނަ އަހަރު މިއަދަދު އުޅުނީ 16,248 ގައެވެ. ޖެނުއަރީ މަހު ރާއްޖެއިން ބޭރުން އައިސްފައިވާ އުޅަނދުގެ އަދަދަކީ 123 އެކެވެ. އަދި ރާއްޖެއިން ފުރާފައިވަނީ 142 އުޅަނދެވެ.