އިންތިޚާބުގެ ނަތީޖާ ހަދާ ސޮފްޓްވެއަރ އަޕްޑޭޓްކުރުމުގެ ޕްލޭންތަކެއް އަންނަނީ ހަދަމުން
އިލެކްޝަންސް ކޮމިޝަންގެ ރައީސް ފުއާދު ތައުފީގު ފަލަސުރުޚީ ޕްރޮގްރާމްގައި ވާހަކަފުޅުދައްކަވަނީ
2023ގައި އޮންނަ ރިޔާސީ އިންތިޚާބަށް ތައްޔާރީތައް ވާން ފަށާފައިވާކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި 2023ށް އީސީން ވަމުންދާ ތައްޔާރީތަކާއި ގުޅޭގޮތުން ވާހަކަފުޅުދައްކަވަމުން ފުއާދު ވިދާޅުވީ މިހާރުވެސް އިންތިޚާބުގެ ނަތީޖާ ހަދާ ސޮފްޓްވެއަރ އަޕްޑޭޓްކުރުމުގެ ޕްލޭންތަކެއް ހަދަމުންދާ ކަމަށެވެ. އެއީ މީގެކުރިން ހަދާފައިވާ ސޮފްޓްވެއަރތަކަށް ވުމާއެކު އައިޓީ ދާއިރާއަކީ ވަރަށް އަވަހަށް ބަދަލުވަމުން އަންނަ ދާއިރާއަކަށްވާތީ މިހާރާ އެއްގޮތަށް ސޮފްޓްވެއަރ ތަކެއް ބަދަލުތަކެއް ގެންނަންޖެހޭކަމަށް ފުއާދު ވިދާޅުވިއެވެ.
މީގެއިތުރުން މިހާރު ބޭނުންކުރަމުންދާ ނެޓް ބުކްތަކާއި ޓެބްލެޓްތައްވެސް ބަދަލު ކުރަންޖެހޭކަމަށް ފުއާދު ވިދާޅުވިއެވެ. އޭގެތެރެއިން ވަރަށް ގިނަ އެއްޗިސް މިހާރު ބޭނުންނުކުރެވޭ ކަމަށް ފުއާދު ވިދާޅުވިއެވެ. ނެޓް ބުކްތަކަކީ 2013 ވަނަ އަހަރުގެ ރިޔާސީ އިންތިޚާބުގައި ބޭނުންކުރުމަށް ގެނެސްފައިވާ ނެޓް ބުކްތަކެވެ. ޓެބްލެޓްތައް ހޯދާފައިވަނީ މީގެ ފަސް އަހަރު ކުރިންނެވެ.
ފުއާދު ވިދާޅުވީ މިހާރު ހުރި މިފަދަ ވަސީލަތްތަކާއި ގުޅޭގޮތުން ދިރާސާތައް ކުރެވި އިތުރަށް ބޭނުންވަނީ ކިހާ ތަކެއްޗެއްތޯ ދެނެގަތުމުގެ މަސައްކަތްތައް ކުރަމުންދާ ކަމަށެވެ. މީގެއިތުރުން މީގެކުރިން ކުރެވިފައިހުރި ތަޖުރިބާތަކަށް ބަލާ ދެން އޮންނަ ރިޔާސީ އިންތިޚާބުގައި އިސްލާހުކުރަން ހުރީ ކޮންކަން ތައްތަކެއްތޯވެސް ބަލަމުންދާ ކަމަށް ފުއާދު ވިދާޅުވިއެވެ. އެކަންކަމާއި ގުޅޭގޮތުން ދިރާސާތައް ކުރެވި މަޝްވަރާތައް ކުރަމުންދާ ކަމަށް ފުއާދު ވިދާޅުވިއެވެ.
އަދި ކުރިޔަށް އޮތްތަނުގައިވެސް މިކަމާއި ގުޅޭގޮތުން މަޝްވަރާތައް ކުރެވެމުންދާނެކަމަށް ފުއާދު ވިދާޅުވިއެވެ.
