އިންތިޚާބުތަކާއި، ޕާޓީތަކާއި ގުޅުންހުރި 3 ކަމަކަށް ބަދަލު ގެންނަން އޭޖީ އޮފީހަށް ފޮނުވައިފި
ސިޔާސީ ޕާޓީތަކަށް ފައިސާ ބަހަމުންދާ ގޮތަށް ބަދަލު ގެންނަން ވަނީ ހުށަހަޅާފައި
އިންތިޚާބެއްގެ ވޯޓުލުން
ޕާޓީތަކާއި އިންތިޚާބާއި ގުޅުންހުރި ބައެއް ކަންކަމަށް ބަދަލުގެނައުމަށް އެޓަރނީ ޖެނެރަލް އޮފީހަށް ފޮނުވާފައިވާނެ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
އިލެކްޝަންސް ކޮމިޝަންގެ މަސައްކަތްތަކާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން ފުއާދު ވިދާޅުވީ ސިޔާސީ ޕާޓީތަކާއި އިންތިޚާބުތަކާއި ގުޅުންހުރި މައިގަނޑު ތިން ކަމެއް އެޓަރނީ ޖެނެރަލް އޮފީހަށް ފޮނުވާފައިވާނެ ކަމަށެވެ.
މިގޮތުން އެއް ކަމެއްގެ ގޮތުގައި ދައުލަތުން ސިޔާސީ ޕާޓީތަކަށް ދެމުންދާ ފައިސާ ބަހަމުންގެންދާ ގޮތަށް ބަދަލު ގެނައުމަށް ހުށަހަޅާފައިވާނެ ކަމަށް ފުއާދު ވިދާޅުވިއެވެ. މިހާރު ފައިސާ ދެމުންދަނީ 10،000 މެމްބަރުންނަށްވުރެ ގިނައިން މެމްބަރުން ތިބި ޕާޓީތަކަށް އެކަނި ކަމަށް ފުއާދު ވިދާޅުވިއެވެ. މި އަދަދު ހަމަނުވާ އެއްވެސް ޕާޓީއަކަށް ފައިސާ ނުލިބޭނެ ކަމަށް ފުއާދު ވިދާޅުވިއެވެ. އެހެންކަމުން ހުރިހާ ޕާޓީއަކާ އެކު މަޝްވަރާކުރުމަށްފަހު ހުށަހަޅާފައިވާނީ މެމްބަރުން ތިބޭ އަދަދަށް ބަލާ ވަކި ޕަސެންޓޭޖެއް ކޮންމެ ޕާޓީއަކަށްވެސް ދިނުމަށް ކަމަށް ފުއާދު ވިދާޅުވިއެވެ.
މީގެ އިތުރުން ފުއާދު ވިދާޅުވީ މިހާރުވެސް ހުރިހާ ޕާޓީތަކެއްގެ އޮޑިޓް ރިޕޯޓުތައް އިލެކްޝަންސް ކޮމިޝަނަށް ހުށަހަޅަމުންދާކަމަށެވެ. މި އޮޑިޓްގެ އިތުރުން އިލެކްޝަންސް ކޮމިޝަނުން ކޮންމެ ޕާޓީއެއްގެވެސް އިތުރު އޮޑިޓެއް ހެދުމަށް އެޓަރނީ ޖެނެރަލް އޮފީހަށް ހުށަހަޅާފައިވާނެ ކަމަށް ފުއާދު ވިދާޅުވިއެވެ. މިއީ ސިޔާސީ ޕާޓީތަކުގެ މަަސައްކަތްތައް ގާތުން ބެލުމުގެ ގޮތުން ކުރަން ހުށަހަޅާފައިވާ މަސައްކަތެއް ކަމަށް ފުއާދު ވިދާޅުވިއެވެ.
މީގެ އިތުރުން އިންތިޚާބުގައި ވޯޓު ގުނުމާއި، ނަތީޖާ އިއުލާނުކުރުމާއި، ކެންޑިޑެސީ ގަބޫލުކުރުން ފަދަ ކަންކަމަށް ބަދަލު ގެނައުމަށްވެސް ހުށަހަޅާފައިވާނެ ކަމަށް ފުއާދު ވިދާޅުވިއެވެ. ތަފާތު ތިން އިންތިޚާބެއް ކުރިއަށްދާއިރު، މި ތިން އިންތިޚާބުގައި ހުންނަ ބުރަދަނާ މަސައްކަތްވެސް ތަފާތުކަމަށް ފުއާދު ވިދާޅުވިއެވެ.
މީގެއިތުރުން ފުއާދު ވަނީ 2023 ގައި އޮންނަ ރިޔާސީ އިންތިޚާބަށް ތައްޔާރުވުމުގެ މަސައްކަތްތައް މިހާރުން ފެށިގެން ކުރަމުންދާކަން ފާހަގަކުރައްވާފައެވެ. މިގޮތުން ސޮފްޓްވެއަރތައް އަޕްގްރޭޑް ކުރުމާއި، އަދިވެސް ހޯދަންޖެހޭ އިތުރު ވަސީލަތްތައް ހޯދުމުގެ މަސައްކަތްވެސް ކުރަމުންދާކަމަށް ފުއާދު ވިދާޅުވިއެވެ.
