އައްޑޫ ސިޓީ ހިތަދޫ ސްޓޭޑިއަމް ބިތްދޮށުގައި ރޯވި އަލިފާންގަނޑު ނިއްވާލާފައިވާކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
އެމްއެންޑީއެފް އިން ބުނީ ހޯމަ ދުވަހުގެ ހަވީރު 16:20 އެހާއިރު، ހިތަދޫ ސްޓޭޑިއަމްގެ ބިތްދޮށުގައި އޮންނަ ޗަސްބިމުގެ ވަށައިގެން ހެދިފައިވާ ވިނަގަނޑުގައި ރޯވި އަލިފާންގަނޑު އަންގާރަ ދުވަހުގެ މެންދަމު 04:00 އެހާއިރު އެއްކޮށް ނިއްވާލެވިފައިވާކަމަށެވެ.
މި އަލިފާންގަނޑު އެސަރަހައްދަށް ވަރަށް ބޮޑަށް ފެތުރިފައިވެއެވެ. އައްޑޫސިޓީގެ މޭޔަރު އަލީ ނިޒާރު "ރާއްޖެއެމްވީ" އަށް މައުލޫމާތުދެއްވަމުން ވިދާޅުވީ އަލިފާންގަނޑު ރޯވެފައިވަނީ އެރަށުގެ މާކިޅި ސަރަހައްދުގައި ކަމަށެވެ. ހަވީރުން ފެށިގެން ރޯވެފައިވާ މި އަލިފާންގަނޑު ނިއްވުމުގެ މަސައްކަތް ކޮށްފައިވާކަން އަލީ ނިޒާރު ވަނީ ފާހަގަކުރައްވާފައެވެ.
އަލިފާން ރޯވެފައިވާ ސަރަހައްދުގައި މީހުން ދިރިއުޅޭ ގެތަށް ކޮންމެވެސް ވަރަކަށް ހުރި ނަމަވެސް މިހާތަނަށް އެއްވެސް މީހަކަށް ގެއްލުމެއް ލިބިފައިނުވާކަމަށް ނިޒާރު ވިދާޅުވިއެވެ.
