މި ހަފްތާގައި ފަސް ބިލެއްގެ މަސައްކަތް ފަށާނެ - މަޖިލިސް ރައީސް
7 ފެބުރުއަރީ 2022 | ހޯމަ 04:50ހޯމަ ދުވަހުގެ ޖަލްސާގައިވަނީ ފަނޑިޔާރުންގެ ޤާނޫނަށް އިސްލާހު ގެނައުމުގެ ބިލުގެ އިބްތިދާއީ ބަހުސް ފަށާފައި
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
މި ހަފްތާގައި މަޖިލީހުން ފަސް ބިލެއްގެ މަސައްކަތް ފަށާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ 2022 ވަނަ އަހަރުގެ ފުރަތަމަ ދައުރުގެ 2 ވަނަ ޖަލްސާ ފަށްޓަވަމުން ރައީސް ނަޝީދު ވިދާޅުވީ، މި އަހަރުގެ ފުރަތަމަ ދައުރުގެ ޖަލްސާތައް ފެށިގެން މިދާ ފުރަތަމަ ހަފްތާގައިވެސް ފަސް ބިލެއްގެ މަސައްކަތް ފެށުގެންދާނެ ކަމަށެވެ. އެއީ، ޤާނޫނު އަސާސީއަށް އިސްލާހު ގެނައުމުގެ ބިލާއި، ފަނޑިޔާރުންގެ ޤާނޫނަށް އިސްލާހު ގެނައުމުގެ ބިލާއި، ނެތިދިޔުމުގެ ބިރު ހީވެފައިވާ ދިރޭތަކެތީގެ ބައިނަލްއަގުއާމީ ވިޔަފާރި ކުރުމުގެ ބިލާއި، ފެނާއި ނަރުދާމާގެ ޤާނޫނަށް އިސްލާހު ގެނައުމުގެ ބިލާއި، ކުދި އަދި މެދު ފަންތީގެ ޤާނޫނަށް އިސްލާހު ގެނައުމުގެ ބިލެވެ.
ރައީސް ނަޝީދު ވިދާޅުވީ، މި ބިލްތަކުގެ އިތުރުންވެސް މިހާރުވެސް 16 ބިލެއް ކޮމިޓީތަކުގައި އެބައޮތް ކަމަށެވެ. އެގޮތުން މާލިއްޔަތު ކޮމިޓީގައި 1 ބިލް، އިގްތިސާދީ ކޮމިޓީގައި 1 ބިލް، އިޖްތިމާއީ ކޮމިޓީގައި 4 ބިލް، 241 ކޮމިޓީގައި 1 ބިލް ޤައުމީ ތަރައްޤީ އާއި ތަރިކައިގެ ކޮމިޓީގައި 1 ބިލް، ލާމަރުކަޒީ ކޮމިޓީގައި 1 ބިލް، ޖުޑިޝަރީ ކޮމިޓީގައި 2 ބިލް އަދި ޖޮއިންޓް ކޮމިޓީތަކުގައި 5 ބިލް އެބައޮތް ކަމަށް ރައީސް ނަޝީދު ވިދާޅުވިއެވެ.
މި ދައުރުގައިވެސް މުހިންމު މަސައްކަތްތަކެއް މަޖިލީހުން ނިމިގެންދާނެކަމަށް ރައީސް ނަޝީދު ވިދާޅުވިއެެވެ.
ހޯމަ ދުވަހުގެ ޖަލްސާގައިވަނީ ފަނޑިޔާރުންގެ ޤާނޫނަށް އިސްލާހު ގެނައުމުގެ ބިލުގެ އިބްތިދާއީ ބަހުސް ފަށާފައެވެ. މި އިސްލާހަކީ ފަނޑިޔާރުން ވިހެއުމާއި ގުޅިގެން ލިބިދޭ ޗުއްޓީއަކީ އެކަށީގެންވާ ޗުއްޓީއަކަށް ހެދުމާއި ގުޅޭ ގޮތުން ހުށަހެޅުނު އިސްލާހެކެވެ.
