އަންނަ މާރޗް މަހުގެ ފުރަތަމަ ހަފްތާގައި މިފްކޯއަށް މަސް ގަންނަ އަގު ބޮޑުކުރެވުމުން މަސްވެރިންނަށް ލިބޭ އާމްދަނީއަށް ހެޔޮ އަސަރެއް ކުރާނެ ކަމަށް މިފްކޯގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.

މިދިޔަ ބުރާސްފަތި ދުވަހުގެ ރައްޔިތުންގެ މަޖިލީހުގެ ޖަލްސާގައި ރިޔާސީ ބަޔާން އިއްވަވަމުން ރައީސް ސާލިހު ވަނީ މާރޗް މަހުގެ ފުރަތަމަ ހަފްތާއިން ފެށިގެން މިފްކޯއަށް މަސް ގަންނަ އަގު ބޮޑުކުރެވޭނެކަން އިއުލާނުކުރައްވާފައެވެ. ދެން މިފްކޯއިން މަސް ގަންނާނީ، ދުނިޔޭގެ ބާޒާރުގައި މަހުގެ އަގަށް އަންނަ ބަދަލާ އެއްގޮތަށް ކަމަށާއި، ދުނިޔޭގެ ބާޒާރުގައި ބޮޑުއަގު ލިބޭނަމަ، މިފްކޯއަށް ގަންނަ މަހުގެ އަގު ބޮޑުވާނެ ކަމަށް ރައީސް ސާލިހު ވިދާޅުވިއެވެ.

މިކަމާއި ގުޅިގެން ރާއްޖެއެމްވީއަށް މައުލޫމާތުދެއްވަމުން މިފްކޯގެ ސީއީއޯ ފައުޒީ ވިދާޅުވީ ދުނިޔޭގެ ބާޒާރުގައި މަހުގެ އަގަށް އަންނަ ބަދަލާ އެއްގޮތަށް އަގުތައް ކަނޑައެޅުމުން މިހާރު މިފްކޯއަށް މަސް ގަންނަ އަގަށްވުރެ މި އަގުތައް ބޮޑުވާނެ ކަމަށެވެ. އެގޮތުން މިހާރު މިފްކޯއަށް ގަންނަނީ ފިނިކުރި މަހުގެ ކިލޯއެއް 16 ރުފިޔާއަށް ކަމަށާއި، ފިނި ނުކުރާ މަސް ނަމަ ކިލޯއެއް 14 ރުފިޔާއަށްކަމަށް ފައުޒީ ވިދާޅުވިއެވެ.

ފައުޒީ ވިދާޅުވީ ރައީސް ސާލިހުގެ ވިސްނުންފުޅަކީ މަސްވެރިންނަށް ދެން އޮތް އެންމެ ރަނގަޅު އަގެއް ދިނުން ކަމަށެވެ. އެހެންކަމުން މަސް ގަންނަ އަގު ބޮޑުކުރުމުގެ މަސައްކަތްތައް ފިނޭންސް މިނިސްޓްރީ އާއި މަޝްވަރާކޮށްގެން މިހާރު ކުރިއަށް ގެންދަމުންދާކަން ފައުޒީ ފާހަގަކުރެއްވިއެވެ. އެހެންނަމަވެސް އަދި ވަކި އަގެއް ކަނޑައަޅާފައިނުވާކަމަށް ފައުޒީ ވިދާޅުވިއެވެ. އެހެންނަމަވެސް މި މަސް ތެރޭގައި އެ މަސައްކަތް ނިންމައި އަންނަ މަހުގެ ފުރަތަމަ ހަފްތާގެ ތެރޭގައި އެކަން މަސްވެރިންނަށްވެސް އަންގާނެ ކަމަށް ފައުޒީ ވިދާޅުވިއެވެ.

މަސްވެރިން ބާނާ މަހަށް ހަމައަގު ހޯދައިދިނުމުގެ ޝަކުވާތައް މަސްވެރިން އަބަދުވެސް ކުރެއެވެ. މަސްވެރިން ބާނާ މަހަށް ހަމައަގު ހޯދައިދެވޭނީ ރާއްޖޭގައި ބާނާ މަސް ރާއްޖޭގައި ހިފެހެއްޓި، އެ ޕްރޮސެސްކުރެވޭނެ ނިޒާމެއް ގާއިމްކުރެވިގެންކަމަށް މީގެ ކުރިން ފައުޒީ ވަނީ ވިދާޅުވެފައެވެ. އަދި އެފަދަ ނިޒާމަކަށް މިހާރު ތައްޔާރުވަމުންދާކަމަށް ފައުޒީ ވިދާޅުވިއެވެ. އަދި މި މަސައްކަތް ނިމޭއިރު ރާއްޖޭގައި ބާނާ މަސް އެހެން ގައުމުތަކަށް އެކްސްޕޯޓުކުރެވޭނީ ރާއްޖޭގައި ޕްރޮސެސްކުރެވިގެން ކަމަށް ފައުޒީ ވަނީ ވިދާޅުވެފައެވެ.

ފާއިތުވެދިޔަ 15 އަހަރުގެ ތެރޭގައި، އެންމެގިނަ މަސް މިފްކޯއަށް ކިރާފައިވަނީ ނިމިދިޔަ 2021 ވަނަ އަހަރެވެ. މިގޮތުން މިދިޔަ އަހަރު 58،350 ޓަނުގެ މަސް ކިރާފައިވާއިރު، ޖުމުލަ އަގު 901،786،841 އަށް އަރާފައިވެއެވެ. 2019 ވަނަ އަހަރު އެކުންފުންޏަށް 49،000 ޓަނުގެ މަސް ކިރާފައިވާކަމަށާއި، އެއަހަރު މަސްވެރިންނަށް ދިން އާމްދަނީ 903 މިލިއަން ރުފިޔާއަށް އަރައެވެ. 2020 ވަނަ އަހަރު 48،000 ޓަނުގެ މަސް ކިރާފައިވާއިރު، އެއަހަރު މަސްވެރިންނަށް ދިން އާމްދަނީ 898 މިލިއަން ރުފިޔާއަށް އަރައެވެ.