ދެ ޕޯޓުގެ މަސައްކަތް ނިންމައި އަންނަ އަހަރުގެ ތެރޭގައި ހުޅުވޭނެ: އާޒިމް

ހދ. ކުޅުދުއްފުއްޓާއި އައްޑޫ ސިޓީ ހިތަދޫގެ ޕޯޓު އަންނަ އަހަރުގެ ތެރޭގައި ހުޅުވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ޗީފް އެގްޒެކެޓިވް އޮފިސަރ (ސީއީއޯ) އާދަމް އާޒިމް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި އާޒިމް ވިދާޅުވީ ހިތަދޫ ޕޯޓުގެ އެންވަރަޔަމެންޓް އިމްޕެކްޓް އެސެސްމެންޓް (އީއައިއޭ)ގެ މަސައްކަތާއި، ޑިޒައިން މަސައްކަތް ކުރުމަށް ޕޯޓް ލިމިޓެޑްއާއެކު ބައްދަލުވުންތަކެއް ބާއްވާ މަޝްވަރާ ކޮށްފައިވާ ކަމަށެވެ. އީއައިއޭ އަދި ޑިޒައިންގެ މަސައްކަތް ކުރުމަށް ވަގުތު ނަގާނެ ކަމަށާއި، އެމަސައްކަތްތައް ކުރިއަށް ގެންދަނީ ވަރަށް ގިނަ ގޮތްގޮތަށް ބެލުމަށްފަހު ކަމަށެވެ. އާއްމު ގޮތެއްގައި އީއައިއޭ މަސައްކަތަށް ތިނެއް ނުވަތަ ހަމަސް ނަގާ ކަމަށް އާޒިމް ވިދާޅުވިއެވެ.

އެންމެ ފުރަތަމަ ހިތަދޫގައި ގާއިމުކުރި އިންޓަނޭޝަނަލް ބަނދަރަށް އިޝާރާތް ކުރައްވައި އާޒިމް ވިދާޅުވީ, ރަނގަޅަށް އީއައިއޭ ނުހަދައި މަސައްކަތް އަވަހަށް ނިންމުމުގެ ނަތީޖާ ވަރަށް ހިތި ކަމަށާއި، އެބަނދަރުގެ ބޭނުން ނުހިފޭ ކަމަށެވެ. އެ ބަނދަރުން ބޯޓު ފަހަރަށާއި، އާއްމުންނަށް ވަނީ ގެއްލުން ކަމަށް އާޒިމް ވިދާޅުވިއެވެ.

ކުޅުދުއްފުށި ޕޯޓަށް އިޝާރަތް ކުރައްވައި އާޒިމް ވިދާޅުވީ, ޕޯޓު ތަރައްގީ ކުރުމުގެ ދެވަނަ ފިޔަވަހީގެ މަސައްކަތްކުރުމަށް ސޮއިކޮށްފައިވާއިރު، އީއައިއޭގެ މަސައްކަތް ކުރިއަށްދާ ކަމަށެވެ. އިންޓަނޭޝަނަލް ޕޯޓުތަކުގެ މަސައްކަތްތައް ކުރިއަށް ގެންދާނީ ވަރަށް ފުރިހަމައަށް އާޒިމް ވިދާޅުވިއެވެ. އެގޮތުން އަންނަ އަހަރުގެ ތެރޭގައި ދެ ޕޯޓު މަސައްކަތް ނިންމައި ހުޅުވާނެ ކަމަށް އުންމީދުކުރާ ކަމަށް އާޒިމް ވިދާޅުވިއެވެ.

ކުޅުދުއްފުށި ރީޖަނަލް ޕޯޓުގެ ރި-ޑިވެލޮޕްމަންޓް މަޝްރޫއުގެ ދަށުން، ފަޅު ފުންކުރުމާއި އައު މަގަތު ފާލަމެއް ހެދުމުގެ އިތުރުން ރިވެޓްމަންޓް ޖެހުމާއި ނެރުބައްތި ޖެހުން ހިމެނެއެވެ. މީގެއިތުރުން، އޮފީސް އިމާރާތެއް އެޅުމާއި ވޯރކްޝޮޕް އިމާރާތެއް އެޅުން ހިމެނެއެވެ. އެމްޓީސީސީއަށް ކުޅުދުއްފުށީ ރީޖަނަލް ޕޯޓުގެ މަސައްކަތް ހަވާލުކޮށްފައިވަނީ 138.9 މިލިއަން ރުފިޔާއަށެވެ. މަސައްކަތް ނިންމުމަށް ހަވާލު ކޮށްފައިވަނީ، 495 ދުވަހުގެތެރޭގައެވެ.

ކުޅުދުއްފުއްޓާއި އައްޑޫ ސިޓީ ހިތަދޫގެ ޕޯޓު ތަރައްގީކުރުމަށް 200 މިލިއަން ރުފިޔާ ޚަރަދުވާނެ ކަމަށް ސަރުކާރުން ލަފާކޮށްފައިވެއެވެ. މާލޭގެ އިތުރުން ކުޅުދުއްފުށި ޕޯޓާއި، އައްޑޫ ހިތަދޫ ޕޯޓަކީ ބޭރުގެ ބައެއް ބޯޓުތަކުން ވެސް މުދަލާއެކު ލަފާ ޕޯޓުތަކެކެވެ.