އަދުލުގެ ނިޒާމުގައި ހުރި މައްސަލަތައް ދެނެގަނެ އެކަން އެމްޑީޕީ މެމްބަރުންނަށް ހައްލުކުރެވޭނެކަމަށް, ކަނޑިތީމު ދާއިރާގެ މެމްބަރު އަބްދުﷲ ޝަހީމް އަބްދުލް ހަކީމް ވިދާޅުވެއްޖެއެވެ.

ބުދަ ދުވަހު އޮތް ޖުޑިޝަރީ ކޮމިޓީގެ ބައްދަލުވުމުގައި ޝަހީމް ވިދާޅުވީ، ޖިނާއީ އަދުލުގެ ނިޒާމުގައި ކޯޓުތަކުގެ އިހުމާލު އޮތްވަރު ފެނިގެންދާ އެއް ކަމަަކީ ކުރީގެ ރައީސް ޔާމީން މިނިވަންކުރުން ކަމަށާއި، އެކަމުން ކޯޓުތަކާއި ތަހުގީގުކުރާ ފަރާތްތަކުގެ އިހުމާލު އޮތްކަން ފެނިގެންދާ ކަމަށެވެ.

ޝަހީމް ވިދާޅުވީ, އެމަނިކުފާނު މިނިވަންވެވަޑައިގަތުމާއެކު ރާއްޖޭގެ އިޖުތިމާއީ ފޭރާން ކުދިކޮށް ކޮއްޓަވާލައްވާތަން ފެންނަމުންދާ ކަމަށާއި، ފަސް އަހަރު ވެރިކަން ކުރެއްވި ބޭފުޅަކު ރައްޔިތުންނާ މުޚާތަބުކުރައްވައި, ސްކޫލްތަކާއި ސަރުކާރުގެ މުއައްސަސާތަކާއި ގޭގޭގެ ފާރުގައި ބޭއަދަބީކޮށް ލިޔަން ހިތްވަރު ދެއްވަމުން އަންނަ ކަމަށެވެ. މިހާރު ކޯޓުތަކުން ނިންމާ ނިންމުމަކީ ރައްޔިތުންނަށް ގަބޫލު ކުރެވޭ ނިންމުންތަކެއް ނޫން ކަމަށާއި، މިކަން މިހެންވަނީ ގާނޫނުގެ މައްސަލަ ހުރެގެން ނޫން ކަމަށެވެ. މިކަމުގައި އޮތީ ތަންފީޒުކުރަން ތިބޭ މީހުންގެ އިހުމާލު ކަމަށް ޝަހީމް ވިދާޅުވިއެވެ.

އަދި މުއައްސަސާތަކުގައި ތިބި މީހުން ޖަވާބުދާރީ ކުރުވުމަށް ކޮމިޓީއަށް ލިބިފައިވާ ބާރު ބޭނުންކޮށް ޖަވާބުދާރީކުރުވަންޖެހޭ ކަމަށާއި، މިނިވަން ކަމާއެކު އުޅެވެން އޮތީ އޭރުން ކަމަށެވެ.

ޖިނާއީ އަދުލުގެ ނިޒާމު ނަގާލުމަށް މަސައްކަތްކުރާ މީހުން އިންސާފުގެ ކުރިމައްޗަށް ގެނައުމަށް ކޮމިޓީން މަސައްކަތްކޮށް ކާމިޔާބު ކުރެވޭނެކަމުގެ ޔަގީންކަން އެބައޮތް ކަމަށާއި، ކޮމިޓީގެ މެޖޯރިޓީއަކީ އެމްޑީޕީ މެމްބަރުންކަން ޝަހީމް ފާހަގަކުރެއްވިއެވެ. ރައްޔިތުންނަށް ލާބައާއި މަންފާ ލިބޭ ކަންކަމަށް މަސައްކަތް ކުރަން ޖެހޭ ކަމަށާއި، އެމްޑީޕީ އުފެދިގެން މަސައްކަތް ކުރަމުން އަންނަނީ ރައްޔިތުންނަށްޓަކައި ކަމަށެވެ.

ޝަހީމް ވިދާޅުވީ މިއަދު މިކުރެވެނީ ޖުޑިޝަރީ ސިސްޓަމްގައި މައްސަލަ ހުރި ހިސާބު ދެނެގަތުމަށް ކުރާ މަސައްކަތް ކަމަށެވެ. އަދި އިހުމާލުވާ މީހުން ދެނެގަނެ، އެމީހުން ބަދަލު ކޮށްގެންވެސް ސިސްޓަމް ރަނގަޅު ކުރުުމަށް މަސައްކަތްކުރަން ޖެހޭކަމަށް އޭނާ ވިދާޅުވިއެވެ.

ޖިނާއީ އަދުލުގެ ނިޒާމާ ގުޅުންހުރި 5 އިދާރާއެއް ކޮމިޓީއަށް ހާޒިރުކޮށް ސުވާލު ކުރުމަށް ކޮމިޓީން ވަނީ ނިންމާފައެވެ.