ކުޅުދުއްފުށީ ސިޓީ ކައުންސިލުން 2022 ވަނަ އަހަރަށް 70 މިލިއަން ރުފިޔާގެ ބަޖެޓެއް ފާސްކޮށްފި އެވެ.

އެގޮތުން މިމަހުގެ 12 ވަނަ ދުވަހު އެކައުންސިލްގެ އާންމު ބައްދަލްވުމުގައި ފާސްކޮށްފައިވަނީ 70،442،953.83 ރުފިޔާ އެވެ. މިއަހަރަށް ފާސްކުރި 70 މިލިއަން ރުފިޔާގެ ބަޖެޓްގެ ތެރެއިން ރިކަރަންޓް ހަރަދުގެ ގޮތުގައި 21.6 މިލިއަން ހިމަނާފައިވާއިރު ކެޕިޓަލް ހަރަދުގެ ގޮތުގައި 9.4 މިލިއަން ރުފިޔާ ހިމަނާފައިވެ އެވެ.

ދައުލަތުން ދޭ ގުރާންޓްގެ ގޮތުގައި 31 މިލިއަން ރުފިޔާ ޖަހާފައިވާއިރު ތިންވަނަ ފަރާތުގެ ފައިސާގެ ގޮތުގައި އެއް މިލިއަން އަދި ކައުންސިލްގެ އާމްދަނީގެ ގޮތުގައި 34.9 މިލިއަން ރުފިޔާ ހިމަނާފައިވެ އެވެ. 34.9 މިލިއަން ރުފިޔާގެ ތެރޭގައި ވޭތުވެދިޔަ އަހަރުތަކުގެ ބާކީވަމުން އައިސްފައިހުރި ހުރިހާ ފައިސާއެއްވެސް ހިމެނޭކަމަށް ކައުންސިލުން ބުނެއެވެ.

ދައުލަތުން ދޭ 31 މިލިއަން ރުފިޔާ މައިގަނޑު ގޮތެއްގައި ހަރަދުވާނީ ރިކަރަންޓް ހަރަދަށާއި ކެޕިޓަލް ހަރަދުތަކަށް ކަމަށާއި، އެގޮތުން ރިކަރަންޓް ހަރަދުގެ ގޮތުގައި 21.6 މިލިއަން ރުފިޔާ ބަޖެޓްކޮށްފައިވާއިރު ކެޕިޓަލް ހަރަދަށް 9.4 މިލިއަން ރުފިޔާ ހިމަނާފައިވާކަމަށް ކައުންސިލުން ބުނެއެވެ.

ކުޅުދުއްފުށި ސިޓީ ކައުންސިލުން ބުނީ އަންހެނުންގެ ތަރައްގީއަށް މަސައްކަތްކުރާ ކޮމެޓީއަށް 2.8 މިލިއަންގެ ބަޖެޓެއް ކަނޑައަޅާފައިވާއިރު އެއީ މިއަހަރުގެ ގުރާންޓްގެ ފަސް ޕެސެންޓްގެ 1.6 މިލިއަން ރުފިޔާ އާއި 2021 ވަނަ އަހަރުގެ ބަޖެޓް ބާކީގެ ގޮތުގައި ހުރި 1.2 މިލިއަން ރުފިޔާ ކަމަށެވެ.

މީގެއިތުރުން ގުރާންޓްގެ 21.6 މިލިއަން ރުފިޔާ ކަނޑައެޅިފައިވާނީ އިދާރީ ހިންގުމުގެ ހަރަދުތަކަށް ކަމަށާއި އޭގެ ތެރޭގައި މުވައްޒަފުންގެ މުސާރަ ހިމެނޭނެ ކަމަށެވެ. އަދި 14.1 މިލިއަން ރުފިޔާ މުވައްޒަފުންނަށް ހިނގާ ހަރަދުގެ ގޮތުގައި ކަނޑައަޅާފައިވާއިރު ޕެންޝަނާއި މުސްކުޅި ކުރައްވާ މުވައްޒަފުންނަށް ލިބޭ އެލެވެންސްތަކަށް 5.4 ލައްކަ ރުފިޔާ ކަނޑައަޅާފައިވާނޭ ކަމަށްވެސް އެކައުންސިލުން ބުނެއެވެ.

އަދި ކައުންސިލްތަކުގެ ދަތުރުތަކަށް ފަސްލައްކަ ރުފިޔާގެ ބަޖެޓްކޮށްފައިވާއިރު، ތަކެތި ހޯދުމަށް އެއް މިލިއަން ރުފިޔާ ހިމަނާފައިވާނޭކަމަށާއި، އަދި އޮފީސް ހިންގުމަށް ބޭނުންވާ ހިދުމަތްތަކަށް 4.6 މިލިއަން ކަނޑައަޅާފައިވެއެވެ. އޭގެ ތެރޭގައި ސެކިއުރިޓީ އާއި ކުނިކެހުމާއި ސާފުކުރުމާއި ކައުންސިލް އިދާރާގެ އިމާރާތްތަކާއި ސިޓީގެ މަގު ބައްތި އަދި އާންމު ތަންތަނުގެ ކަރަންޓާއި ފެންވެސް ހިމެނެއެވެ. މީގެ އިތުރުން ތަމްރީނުތަކަށް 2.5 ލައްކަ ރުފިޔާ ކަނޑައަޅާފައިވެ އެވެ.

ކެޕިޓަލްގެ ހަރަދުގެ ގޮތުގައި ކައުންސިލަށް ގަތުމަށް ނިންމާފައިވާ ތިން ވެހިކަލާއި އޮފީސް އިމާރާތް ބޮޑުކުރުމަށްވެސް ބަޖެޓްކޮށްފައިވެ އެވެ. އަދި އާމްދަނީގޮތުގައި ކަނޑައެޅިފައިވާ 34.9 މިލިއަން ރުފިޔާ ހަރަދުކުރަން ބަޖެޓްކޮށްފައިވަނީ ރައްޔިތުންނާ ގުޅުން ހުރި ކަންކަމަށް ކައުންސިލުން ބުނެއެވެ.

2022 ވަނަ އަހަރުގެ ބަޖެޓާ ބެހޭ ގޮތުން ކުޅުދުއްފުށި ސިޓީ ކައުންސިލްގެ މޭޔަރު މުހައްމަދު އާތިފް ވިދާޅުވީ، ބަޖެޓް އެކުލަވާލުމުގައި އެންމެ ބޮޑަށް ވިސްނަވާފައި ވާނީ ރައްޔިތުންގެ ހިޔާލާއި މަޝްވަރާއާއެކު ހެދި ތަރައްޤީގެ ޕްލޭންގެ ލަނޑުދަނޑިތައް ހާސިލުކުރެވޭނެ ގޮތަށާއި، ރައްޔިތުންނަށް ދެވޭ ރަށްވެހިކަމުގެ ހިދުމަތްތައް އިތުރަށް ތަރައްޤީކޮށް ފުރިހަމަކުރެވޭނެ ގޮތްތަކަށް ބަލައިގެން ކަމަށެވެ.