އަބޫދާބީއަށް ދިން ހަމަލާތަކުގައި ތިން މީހުން މަރުވިއިރު އިތުރު ހަމަލާތަކެއް ދީފި
18 ޖެނުއަރީ 2022 | އަންގާރަ 00:47ޑްރޯން ހަމަލާތަކަށްފަހު އަބޫދާބީ އިންޓަރނޭޝަނަލް އެއަރޕޯޓަށް ވަނީ އިތުރު ހަމަލާތަކެއް ދީފައި
އަބޫދާބީ އެއަރޕޯޓް ހުންނަ ސަރަހައްދުން
އަބޫދާބީގެ ތެޔޮވަޅުތަކަށް އަމާޒުކޮށް ޔަމަނުގެ ހޫޘީން ފޮނުވާލި ޑްރޯން ހަމަލާތަކުގައި ތިން މީހުން މަރުވެއްޖެއެވެ.
ޔުނައިޓެޑް އަރަބް އެމިރޭޓްސް (ޔޫއޭއީ)ގެ ފުލުހުން ބުނާގޮތުގައި ޑްރޯން ހަމަލާތަކަށްފަހު އަބޫދާބީ އިންޓަރނޭޝަނަލް އެއަރޕޯޓަށް ވަނީ އިތުރު ހަމަލާތަކެއްވެސް ދީފައެވެ. ކުރިން ދިން ހަމަލާތަކުގައި މަރުވެފައިވަނީ އިންޑިޔާއަށް ނިސްބަތްވާ ދެ މީހުންނާއި ޕާކިސްތާނު މީހެއްކަމަށް ޔޫއޭއީގެ ފުލުހުން ބުނެއެވެ.
ހަމަލާތަކަށްފަހު ހޫޘީން ވަނީ މިއީ އެމީހުން ޔޫއޭއީ އާ ދެކޮޅަށްދޭ ހަމަލާތަކެއްކަމަށް ބުނެފައެވެ. ޔަމަނުގައި ހިނގަމުންދާ ހަނގުރާމައިގައި ސައުދީ އާއި ޔޫއޭއީ ގުޅިގެން އަންނަނީ ހޫޘީންނާދެކޮޅަށް ހަނގުރާމަކުރަމުންނެވެ. ޔޫއޭއީއަށް ހަމަލާދިނުމުގެ އިތުރުން ހޫޘީން ވަނީ ސައުދީގެ ރަސްކަމުގެ ދަރުބާރަށް އަމާޒުކޮށް ޑްރޯން މެދުވެރިކޮށް 8 ހަމަލާއެއް ފޮނުވާލާފައެވެ. ސައުދީގެ ސްޓޭޓް މީޑިޔާއިން ރިޕޯޓްކޮށްފައިވާ ގޮތުގައި މިހަމަލާތައް ވަނީ ނާކާމިޔާބު ކޮށްލާފައެވެ.
ހަމަލާތަކަށްފަހު ހޫޘީ ގަނގުރާމަވެރިންގެ ސްޕޯކްސްމަން ބުނެފައިވަނީ އެޖަމާއަތުން ޔޫއޭއީ އާ ދެކޮޅަށް އަސްކަރީ އޮޕަރޭޝަނެއް ފަށާފައިވާކަމަށެވެ. މިހަމަލާތަކަކީ ޔޫއޭއީން ސައުދީ އާ ގުޅިގެން ޔަމަނުގައި ހިންގަމުންދާ ކަންކަމާ ގުޅިގެން ޔޫއޭއީއަށް ފިލާވަޅެއް ދިނުމުގެ ގޮތުން ކުރާކަމެއްކަމަށް ސްޕޯކްސްމަން ޔަހްޔާ އަލް ސަރީ ވަނީ ވިދާޅުވެފައެވެ.
ސައުދީންނާއި ސައުދީއަށް ވާގިވެރިވާ ފަރާތްތަކުން ބުނެފައިވަނީ އެސަރަހައްދުން ހޫޘީން ދީފައިވާ ހަމަލާތަކެއް ދެނެގަނެވިފައިވާކަމަށެވެ. ހޫޘީން ބުނަމުން އަންނަނީ ހަތް އަހަރުވަންދެން އެމީހުންނާ ދެކޮޅަށް ހަނގުރާމަކުރަމުން އައިނަމަވެސް އެމީހުންނަކީ ސައުދީންނާއި ސައުދީންގެ ބައިވެރިންނަށްވުރެ ބާރުގަދަ ބައެއްކަމަށެވެ. އަދި ކުރިޔަށް އޮތްތަނުގައި ސައުދީ އާއި ޔޫއޭއީގެ އެތެރޭގެ ސަރަހައްދުތަކަށް ހަމަލާ ދެވުމުގެ ގާބިލްކަންވެސް އެބަހުރިކަމަށް އެޖަމާއަތުން އަންނަނީ ބުނަމުންނެވެ.
އަބޫދާބީގެ އެއަރޕޯޓަށް ދިން ހަމަލާތަކާއި ގުޅިގެން އިއްތިހާދު އެއަރވޭއިން ވަނީ ބައެއް ފްލައިޓްތައް ފުރުން ލަސްކޮށްފައެވެ. ނަމަވެސް ވަރަށް އަވަހަށް އާންމު ހާލަތަށްދާނެކަމަށް އިއްތިހާދު އެއަރވޭއިން ބުނެއެވެ.
މިހަމަލާ އެމެރިކާ، ފްރާންސް އަދި ބަހުރެއިނުން ވަނީ ކުށްވެރިކޮށްފައެވެ. ޔޫއޭއީން ބުނެފައިވަނީ ހޫޘީން މިދިން ހަމަލާގެ ރައްދުދޭނެކަމަށެވެ.
