ހާލަތު ގޯސްވާތީ، 50 މީހުންނަށްވުރެ ގިނަ މީހުން ޖަމާވާގޮތަށް ހަފުލާތަކާއި އިވެންޓްތައް ނުބާއްވަން އަންގައިފި
9 ޖެނުއަރީ 2022 | އާދީއްތަ 13:01މަގުމަތީ ބާޒާރުތައް ނުބޭއްވުމާއި ކުޅިވަރު މުބާރާތްތައް، ކުޅި ބަލާމީހުންނަށް ވަދެވޭގޮތަށް ނުބޭއްވުމަށް ވެސް އަންގާފައިވޭ
ރަސްފަންނު ސަރަހައްދުގައި މީގެ ކުރިން ބޭއްވި ނައިޓް މާކެޓެއްގެ ތެރެއިން
ހާލަތު ގޯސްވަމުންދާތީ 50 މީހުންނަށްވުރެން ގިނަ މީހުން ޖަމާވާގޮތަށް ހަފްލާތަކާއި އިވެންޓްތައް ނުބާއްވަން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އަންގައިފިއެވެ.
އެޗްޕީއޭއިން ބުނީ ދުނިޔޭގެ ބައެއް ގައުމުތަކުން ފެނިފައިވާ ސަރސްކޯވީ-2 ވައިރަސްގެ "އޮމިކްރޯން" ވޭރިއަންޓް ރާއްޖެއިން ފެނިފައިވާތީއާއި، މާލެ ސަރަހައްދުގައި ބަލި ފެތުރުން އިތުރުވެފައިވާތީ، އާންމު ރައްޔިތުންގެ ސިއްހަތާއި ރައްކާތެރިކަމަށް ޓަކައި ބަލި ފެތުރުން ކޮންޓްރޯލު ކުރުމުގެ ފިޔަވަޅެއްގެ ގޮތުން، މާލެ ސަރަހައްދު (މާލެ، ހުޅުމާލެ، ވިލިމާލެ)ގައި 2022 ޖަނަވަރީ 10 ވަނަ ދުވަހުން ފެށިގެން، ވަކިގޮތެއް އަންގަންދެން ފިޔަވަޅު އަޅަން ނިންމާފައިވާ ކަމަށެވެ.
އެގޮތުން 50 މީހުންނަށްވުރެ ގިނަ މީހުން ޖަމާވާގޮތަށް ހަފްލާތަކާއި އިވެންޓްތަކާއި އެއްވުންތައް ނުބޭއްވުމާއި 50 މީހުންނަށްވުރެން މަދުން މީހުން ހިމަނައިގެން ބާއްވާ އެފަދަ ކަންކަން އެ އެޖެންސީން ކަނޑައަޅާފައިވާ ރައްކާތެރިކަމުގެ މިންގަނޑުތަކާއި ގައިޑްލައިންތަކާ އެއްގޮތަށް ބޭއްވުމަށް އެޗްޕީއޭއިން ވަނީ އަންގާފައެވެ.
މީގެއިތުރުން މަގުމަތީ ބާޒާރުތައް ނުބޭއްވުމާއި ކުޅިވަރު މުބާރާތްތައް، ކުޅި ބަލާމީހުންނަށް ވަދެވޭގޮތަށް ނުބޭއްވުމަށް ވެސް ވަނީ އަންގާފައެވެ. މި ފިޔަވަޅުތައް ތަންފީޒުކޮށް، ފިޔަވަޅުތަކަށް ފުރިހަމައަށް އަމަލު ކުރުމަށް، އެންމެހައި އިދާރާތަކަށާއި އާންމުންނަށް ވަނީ އަންގާފައެވެ.
ރާއްޖޭގެ ކޮވިޑް-19ގެ ހާލަތަށް ބަލާއިރު، ދުވަސްތަކަކަށްފަހު މާލެ ސަރަހައްދުން ފެންނަ ކޭސްތައް ވަނީ އިތުރުވާން ފަށާފައެވެ. އެގޮތުން ޖެނުއަރީ 5 ވަނަ ދުވަހު 224 ކޭސް ރިޕޯޓުކޮށްފައިވާއިރު، މާލެ ސަރަހައްދުން 102 މީހުން ޕޮޒިޓިވް ވެފައިވެއެވެ. އަދި ޖެނުއަރީ 6 ވަނަ ދުވަހު 304 ކޭސް ރިޕޯޓުކޮށްފައިވެއެވެ. އޭގެ ތެރެއިން 136 މީހުން ޕޮޒިޓިވްވީ މާލެ ސަރަހައްދުންނެވެ.
މީގެ އިތުރުން މާސްކް އެޅުމުގެ ގަވާއިދު ތަންފީޒު ކޮށްދިނުމަށް އެޗްޕީއޭއިން އެދިފައިވެއެވެ. އަތޮޅުތެރޭގެ ހުރިހާ ރަށެއްގައި މާސްކް އެޅުމަށް ވަނީ މަޖުބޫރުކޮށްފައެވެ. މިހާރު ދުނިޔޭގެ އެކި ހިސާބުތަކުން ފެންނަމުންދާ އޮމިކްރޯން ވޭރިއެންޓާއެކު، ރާއްޖެ ވެސް އެކަމަށް ތައްޔާރުވެ، ބަލިން ރައްކާތެރިވުމަށް އިތުރަށް ސަމާލުވުމަށް ސިއްހީ މާހިރުން ވަނީ އިލްތިމާސްކޮށްފައެވެ. އަދި އިޖްތިމާއީ ގައިދުރުކަމަށް ޚާއްސަ ސަމާލުކަމެއްދިނުމަށް ވެސް އެދިފައިވެއެވެ.
