އެފްއެސްއެމްގެ ބާޖެއް ފަރަށް އެރުން: ލިބުނު ގެއްލުން އަދިވެސް ނުބެލޭ

އެފްއެސްއެމްގެ ބާޖެއް ކ.ރަންނާޅި ރިސޯޓު ކައިރިން ފަރަށް އެރި ހާދިސާގައި ފަރަށް ލިބުނު ގެއްލުން ބަލަން އަދިވެސް ނުފަށާ ކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.

ފިއުލް ސަޕްލައި މޯލްޑިވްސް (އެފްއެސްއެމް)ގެ ތެޔޮ ބާޖެއް ފަރަށް އަރާފައިވަނީ ޖެނުއަރީ 6 ވަނަ ދުވަހުއެވެ. ބާޖު ފަރަށް އެރިއިރު އޭގައި 90،000 ލީޓަރު ޑީސަލާއި 8000 ލީޓަރު ޕެޓްރޯލް ހުރި ކަމަށް އެފްއެސްއެމްގެ މެނޭޖިންގ ޑިރެކްޓަރ މުހައްމަދު ގަސަމް ވިދާޅުވެފައިވެއެވެ. ބާޖު ފަރަށް އެރުމުން އޭގައި ހުރި ތެލާއި ޕެޓްރޯލް ވަނީ އެހެން ބޯޓަކަށް ބަދަލުކޮށްފައެވެ.

Advertisement

މި ބާޖު ފުންކޮށްފައިވަނީ މިމަހުގެ 7 ވަނަ ދުވަހުއެވެ. މިއީ ބާޖު ފަރަށް އެރިފަހުން 4 ވަނަ ދުވަސް ވެފައިވާއިރު ފަރަށް ލިބުނު ގެއްލުން ބަލަން ފަށާފައިވޭތޯ ރާއްޖެ އެމްވީން ކުރި ސުވާލަކަށް ޖަވާބުދެއްވަމުން އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވީ ފަރަށް ލިބުނު ގެއްލުން ބަލަން ފަށާފައިނުވާކަމަށެވެ. މިއީ ވަރަށް ގިނަ ތައްޔާރީތަކަކާއެކު ފަށަންޖެހޭ މަސައްކަތެއް ކަމަށް ނައީމް ވިދާޅުވިއެވެ. އަދި ފަރަށް ލިބުނީ ކިހާ ބޮޑު ގެއްލުމެއްކަން ބުނަންވެސް ދަތިކަމަށް ވަނީ ވިދާޅުވެފައެވެ.

ފަރަށް އެރި އެފްއެސްއެމްގެ ބާޖަކީ 24 މީޓަރުގެ ދިގު ބާޖެކެވެ. މި ބާޖުން މޫދަށް ތެޔޮ ލީކުވެފައިނުވާކަމަށް އެމްއެންޑީއެފުން މައުލޫމާތުދީފައިވެއެވެ. މިދިޔަ އަހަރުގެ ޖުލައި މަހުގެ ތެރޭގައިވެސް މި ބާޖުވަނީ ފަރަކަށް އަރާފައެވެ. އެފަހަރު ފަރަށް އެރިއިރު 100،000 ލީޓަރުގެ ޑީސަލާއި 15،000 ލީޓަރުގެ ޕެޓްރޯލް ހުރި ކަމަށް އެމްއެންޑީއެފްއިން ބުންޏެވެ.

އީޕީއޭއިން ގެންދަނީ މިފަދަ ހާދިސާތަކުގައި ފަރަށް ލިބޭ ގެއްލުން ބަލައި، ވެރިފަރާތް ޖޫރިމަނާކުރަމުންނެވެ. މިގޮތުން މިދިޔަ އަހަރުގެ އޮގަސްޓު މަހުގެ 19 ވަނަ ދުވަހު ކ. ރަސްފަރީ ހުޅަނގު ފަރާތު ފަރަށް ޕެނަމާއަށް ނިސްބަތްވާ 190 މީޓަރުގެ އާގު ބޯޓެއް ވަނީ އަރާފައެވެ. މި ބޯޓު ފުންކުރެވުމާއެކު އީޕީއޭއިން ވަނީ ހާދިސާ ހިނގި ގޮތާއި ފަރަށް ލިބުނު ގެއްލުން ބަލާފައެވެ. އަދި 10 މިލިއަން ޑޮލަރުން ބޯޓުގެ ވެރިފަރާތް ޖޫރިމަނާކޮށްފައެވެ.

މި ބޯޓު ފަރަށް އެރުމުގައި ބޯތުގެ ކެޕްޓަންގެ ވަރަށް ބޮޑު އިހުމާލެއް އޮތް ކަމަށް ތަހުގީގުން އެނގިފައިވެއެވެ. އަދި އަންގަންޖެހޭ ފަރާތްތަކަށް ކުރީބައިގައި އަންގާފައެއް ނުވެއެވެ. ކ. ރަސްފަރި ފަރަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން، 1995އިން ފެށިގެން ހިމާޔަތްކޮށްފައިވާ ފަރެކެވެ. މިއީ ޑައިވަރުންގެ މެދުގައި މަޝްހޫރު، މާލެ އަތޮޅުގައި އޮންނަ ތިމާވެށީގެ ގޮތުން އެންމެ މުހިއްމު އެއް ސަރަހައްދެވެ. މި ފަރުގައިވާ މުރަކައިގެ ބަގީޗާގައި، އެންމަޑި ސާފުކުރުމަށް ބޭނުންކުރާ "ކްލީނިންގ ސްޓޭޝަން" އެއްވެސް ހިމެނެއެވެ. މީގެ އިތުރުން މި ސަރަހައްދަކީ ފަރުމަހުގެ ދިރުމުން މުއްސަނދިވެފައިވާ، އަދި ދިވެހިރާއްޖޭގައި ހިމާޔަތްކޮށްފައިވާ މާހުޅުނބު ލަނޑަޔާއި، މަޑިއާއި، މިޔަރާއި، ވެލާ ފެންނަ ސަރަހައްދެކެވެ.