ކަޒަކްސްތާނުގައި މިހާރު ހިނގަމުންދާ ހަމަނުޖެހުންތަކުގެ ފަހަތުގައިވާ ކަމުގެ ތުހުމަތުގައި އެގައުމުގެ އިންޓެލިޖެންސް އިދާރާގެ ކުރީގެ ވެރިޔާ ހައްޔަރުކޮށްފިއެވެ.

ކަޒަކްސްތާނުގެ ސެކިޔުރިޓީ އެޖެންސީން ބުނެފައިވަނީ އިންޓެލިޖެންސް އިދާރާގެ ކުރީގެ ވެރިޔާ ކަރީމް މާސިމޯވް ހައްޔަރުކޮށްފައިވާކަމަށެވެ. އޭނާ މަގާމުން ވަކިކޮށްފައިވަނީ ހަމަނުޖެހުންތައް ފެށުނުފަހުން މިދިޔަ ހަފުތާގެ ބުދަ ދުވަހު ކަޒަކްސްތާނުގެ ރައީސް ގާސިމްއެވެ.

ކަޒަކްސްތާނުގެ ރައީސް އޮފީހުން ބުނެފައިވާ ގޮތުގައި ރައީސް ވަނީ ރަޝިޔާގެ ރައީސް ޕުޓިންއާ ފޯނުން ގުޅުއްވާ ގައުމުގެ ހާލަތު މިހާރު ރަނގަޅުވަމުން އަންނަކަމަށް ވިދާޅުވެފައެވެ. އަދި ޓެރަރިސްޓުންނާ ދެކޮޅަށް ކުރަމުންދާ ހަނގުރާމަ ކުރިޔަށްދާކަމަށާއި ޓެރަރިސްޓުން ނައްތާލުމުގެ މަސައްކަތް ހުއްޓުމެއްނެތި ކުރިޔަށްދާކަމަށް ވަނީ ވިދާޅުވެފައެވެ.

ތެލުގެ އަގު ބޮޑުކަމަށް ބުނެ ކަޒަކްސްތާނުގައި ފެށި މުޒާހަރާތައް ވަނީ ހަމަނުޖެހުންތަކަކަށް ބަދަލުވެ މުޅި ގައުމަށް ފެތުރިފައެވެ. މުޒާހަރާ ކޮންޓްރޯލުން ނެއްޓިގެން ދިޔުމާއެކު ރައީސް ވަނީ އެންމެފަހުން ޓެރަރިސްޓުންނާއި ގާނޫނާއި ޚިލާފު އަމަލުކުރަމުންދާ މީހުންގެ ގަޔަށް ބަޑިޖެހުމަށް އަސްކަރިއްޔާއަށް އަމުރުކުރައްވާފައެވެ.

ހުކުރުދުވަހު ކަޒަކްސްތާނުގެ ރައީސް ވިދާޅުވެފައިވަނީ ހަމަނުޖެހުންތައް ހިންގުމުގެ ކަންކަން ރާވަމުންދިޔައިރު ކަމާބެހޭ ފަރާތްތަކުން ތިބީ ނިދާފައިކަމަށެވެ. ކަރީމް މާސިމޯވަކީ އިންޓެލިޖެންސް އިދާރާގެ ވެރިޔާގެ އިތުރުން އެގައުމުގައި ދެ ފަހަރަށް ބޮޑުވަޒީރުކަން ކުރައްވާފައިވާ ބޭފުޅެކެވެ. އަދި ކަޒަކްސްތާނުގައި 30 އަހަރު ވަންދެން ވެރިކަން ކުރެއްވި ކުރީގެ ރައީސް ނޫރްސުލްތާން އާ ގާތްގުޅުމެއް އޮންނަ ބޭފުޅެކެވެ. 2019 ވަނަ އަހަރު ނޫރްސުލްތާން މިހާރުގެ ރައީސް ގާސިމްއާ ވެރިކަން ހަވާލުކުރެއްވީއެވެ.

ކަރީމްއާ ދެކޮޅަށް ކުރަނީ ކޮން ތުހުމަތުތަކެއްކަން އަދި ހާމަކޮށްފައެއްނުވެއެވެ. ސެކިޔުރިޓީ ސަރވިސް އިން ބުނެފައިވާ ގޮތުގައި އިތުރު އޮފިޝަލުންތަކެއްވެސް ވަނީ ހައްޔަރުކޮށްފައެވެ. ނަމަވެސް އެމީހުންގެ ނަންތަކެއް ހާމައެއްނުކުރެއެވެ.

ހުކުރުދުވަހު ސަރުކާރަށް ތާއީދުކުރާ ސިޔާސީ ފަރާތަކުން ޓީވީގައި ބުނެފައިވަނީ އެގައުމުގެ އަލްމާޓީ އެއަރޕޯޓް ދޫކޮށް ސެކިޔުރިޓީ ބާރުތަކުން ގޮސްފައިވާކަމަށެވެ. އަދި މުޒާހަރާ ކުރާ ފަރާތްތަކަށް އެއަރޕޯޓް ދޫކޮށްލާފައިވާ ކަމަށް ވަނީ ބުނެފައެވެ. ނަމަވެސް އެކަން ކަށަވަރު ނުވާކަމަށް ރޮއިޓަރސް އިން ވަނީ ރިޕޯޓްކޮށްފައެވެ. އަދި އެއަރޕޯޓް ވަނީ ކަޒަކްސްތާނުގެ ސެކިޔުރިޓީ ފަރާތްތަކާއި ރަޝިޔާގެ އަސްކަރިއްޔާގެ ބާރުގެ ދަށުގައި ކަމަށް ރަޝިޔާގެ ޑިފެންސް މިނިސްޓްރީން ބުނެއެވެ.

ކަޒަކްސްތާނުގެ އިންޓީރިޔާ މިނިސްޓްރީން ބުނާގޮތުގައި ހަމަނުޖެހުންތަކާއި ގުޅިގެން މިހާތަނަށް 4،400 މީހުން ވަނީ ހައްޔަރުކޮށްފައެވެ. ހަމަނުޖެހުންތަކާއި ގުޅިގެން އެގައުމުގައި އިންޓަރނެޓް ކަނޑާލާފައިވައިރު މިހާރުވެސް އިންޓަރނެޓްގެ ޚިދުމަތް ރަނގަޅަށް ނުލިބޭކަމަށް ރިޕޯޓްތައް ބުނެއެވެ.