ކަޒަކިސްތާނުގެ ވެރިރަށް، ނޫރް-ސުލްތާނުގެ ނަން ކުރީގެ ނަމަށް ބަދަލު ކުރަންް އެ ޤައުމުގެ ރައީސް ކާސިމް ޖޮމަރޓް ޓޯކަޔެވް އެއްބަސްވެވަޑައިގެންފިއެވެ.
އެ ޤައުމުގެ ވެރިރަށަށް ކުރިން ކިޔަނީ "އަސްތާނާ" އެވެ. އެ ސިޓީގެ ނަން ނޫރް-ސުލްތާނަށް ބަދަލުކޮށްފައިވަނީ ކާސިމްގެ ކުރިން ވެރިކަމުގައި ހުންނެވި ނޫރްސުލްތާން ނަޒަރްބަޔެވް ގެ ޝަރަފުގައެވެ. މި ވަދަލުގެންނެވީ ކާސިމް އަމިއްލަފުޅަށެވެ.
ކަޒަކިސްތާނުގެ ރައީސްގެ ތަރުޖަމާނު ބޭރުގެ މީޑިއާތަކަށް ބުނެފައިވާ ގޮތުގައި މަޖިލީހުގެ މެމްބަރުންތަކެއް ހުށަހެޅުން ގަބޫލު ކުރައްވައި ވެރިރަށުގެ ނަން އަލުން އަސްތާނާއަށް ހެއްދުމަށް އެމަނިކުފާނު ވަނީ ނިންމަވައިފައެވެ.
ކަޒަކިސްތާނުގެ ކުރީގެ ރައީސް ނޫރްސުލްތާނަކީ 30 އަހަރު ވަންދެން އެ ޤައުމު ހިންގުމާ ހަވާލުވެވަޑައިގެން ހުންނެވި ބޭފުޅާއެވެ. އެއީ ސޯވިއެޓް ޔޫނިއަންގެ ދުވަސްވަރާއި މިނިވަންކަން ލިބުމަށްފަހުއެވެ. އެ ޤައުމަށް މިނިވަންކަން ލިބުމަށްފަހު ނޫރްސުލްތާން ވަނީ އޭރުގެ ވެރިރަށް އަލްމަޓީއިން އަސްތާނާ ވެރިރަށުގެ ގޮތުގައި ކަނޑައަޅުއްވާފައެވެ. މި ބަދަލު ގެނައުމުން ވެސް ގިނަ ބައެއްގެ ފާޑުކިޔުން އެމަނިކުފާނަށް އަމާޒުވިއެވެ.
ކުރިން އަސްތާނާއަކީ ކުރިން ތަރައްގީވެފައި އޮތް ސިޓީއަކަށް ނުވި ނަމަވެސް ވެރިރަށުގެ ގޮތުގައި އެ ސިޓީ ކަނޑައެޅުއްވުމަށްފަހު އެކި ދާއިރާތަކުން އެ ސިޓީ ވަނީ ތަރައްގީ ކޮށްފައެވެ. އެ ސިޓީއަކީ މިހާރުވެސް ދުނިޔޭގެ އެންމެ ރީތި އާކިޓެކްޗަރތައް ފެންނަ އެއް ސިޓީއެވެ.
ވެރިކަމާ ދުރުވުމަށްފަހުވެސް ނޫރްސުލްތާނުގެ ނުފޫޒު ސަރުކާރުގައި ވަރުގަދައަށް އޮތެވެ. އެއީ ވެރިކަން ކުރާ ޕާޓީގެ ލީޑަރު ކަމާއި ސެކިއުރިޓީ ކައުންސުލްގެ އިސް ފަރާތުގެ ގޮތުގައި އެމަނިކުފާނު ހުންނެވުމުންނެވެ. ނަމަވެސް މިއަހަރުގެ ޖެނުއަރީ މަހު ކަޒަކިސްތާނުގައި ހިންގި ހަމަނުޖެހުންތަކާ ގުޅިގެން އެ މަގާމުތައް އެމަނިކުފާނުގެ އަތްޕުޅުން، މިހާރުގެ ރައީސް ކާސިމް ވަނީ ނަންގަވާފައެވެ.
