ކަޒަކްސްތާނުގައި ހިނގާ ހަމަނުޖެހުންތަކުގައި 160ށްވުރެ ގިނަ މީހުން މަރުވެއްޖެ
ކަޒަކްސްތާނުގެ މައި ސިޓީ އަލްމާޓީގައި މަރުވި މީހުންގެ އަދަދު 103ށް ވަނީ އަރާފައި
ކަޒްކްސްތާންގައި ހިނގާ ހަމަނުޖެހުމުގައި ފުލުހުން މީހަކު ގެންދަނީ
ކަޒަކްސްތާނުގައި ހިނގާ ހަމަ ނުޖެހުމުގައި ފާއިތުވި ހަފްތާގައި 160ށްވުރެ ގިނަ މީހުން މަރުވެ 5000ށްވުރެ ގިނަ މީހުން ހައްޔަރުކޮށްފައިވާ ކަމަށް ރިޕޯޓްކޮށްފިއެވެ.
އެ ގައުމުގެ އިންޓީރިއަރ މިނިސްޓްރީއާ ހަވާލާދީ ރިޕޯޓް ކޮށްފައިވާ ގޮތުގައި މުދަލަށް ލިބުނު ގެއްލުމުގެ އަގު މިހާރު ވަނީ 175 މިލިއަން ޔޫރޯއިން މައްޗަށް އަރާފައެވެ. ބޭންކުތަކަށާއި އާއްމުންގެ މުދަލަށް ގެއްލުން ވެފައިވާއިރު، 100ށްވުރެ ގިނަ ވިޔަފާރިއަށްވަނީ ހަމަލާ ދީފައެވެ. އިންޓީރިއަރ މިނިސްޓްރީން ބުނެފައިވަނީ، 400ށްވުރެ ގިނަ ވެހިކަލް ހަލާކުވެފައިވާ ކަމަށެވެ.
ހަމަނުޖެހުން ތަކުގައި 164 މީހުން މަރުވެފައިވާއިރު، އޭގެ ތެރޭގައި 2 ކުޑަކުދިންވެސް ހިމެނެއެވެ.
ކަޒަކްސްތާނުގެ މައި ސިޓީ އަލްމާޓީގައި މަރުވި މީހުންގެ އަދަދު 103ށް އަރާކަމަށްވަނީ ރިޕޯޓް ކޮށްފައެވެ. އެ ސިޓީއަކީ ހަމަނުޖެހުންތައް އެންމެ ބޮޑަށް ހިނގި ސިޓީއެވެ. މަރުވި މީހުންގެ އަދަދު އިތުރުވާނެ ކަމަށްވަނީ ލަފާކޮށްފައެވެ.
ތެލުގެ އަގު ބޮޑުކަމަށް ބުނެ ކަޒަކްސްތާނުގައި ފެށި މުޒާހަރާތައް ވަނީ ހަމަނުޖެހުންތަކަކަށް ބަދަލުވެ މުޅި ގައުމަށް ފެތުރިފައެވެ. މުޒާހަރާ ކޮންޓްރޯލުން ނެއްޓިގެން ދިއުމާއެކު ރައީސް ވަނީ އެންމެފަހުން ޓެރަރިސްޓުންނާއި ގާނޫނާއި ޚިލާފު އަމަލުކުރަމުންދާ މީހުންގެ ގަޔަށް ބަޑިޖެހުމަށް އަސްކަރިއްޔާއަށް އަމުރުކުރައްވާފައެވެ.
