ހަފްތާއެއްގެ ތެރޭގައި އިންޑިޔާއިން ފެންނަ ކޮވިޑްގެ ކޭސްތައް ފަސްގުނަ މަތިވެއްޖެ

އިންޑިޔާއިން ފެންނަމުންދާ ކޮވިޑް-19ގެ ކޭސްތައް ހަފްތާއެއްގެ ތެރޭގައި ފަސް ގުނަ އިތުރުވެއްޖެއެވެ.

އިންޑިޔާގައި ހުކުރު ދުވަހު 117،100 މީހުންނަށް ކޮވިޑް-19 ޖެހިގެން ރިޕޯޓުކޮށްފައި ވެއެވެ. މިއީ މިދިޔަ އަހަރުގެ ޖޫން މަހުގެ ފަހުން އެގައުމުގައި އެއްދުވަހާ އެހާ ގިނަ މީހުންނަށް ކޮވިޑް ޖެހިގެން ރިޕޯޓްކުރި ދުވަސްވެސް މެއެވެ. އިންޑިޔާގައި މީގެކުރިން ހަލުވިކަމާއެކު ފެތުރެމުންދިޔަ ޑެލްޓާ ވޭރިއަންޓުގެ ބަދަލުގައި މިހާރު ގިނަ ސިޓީތަކުގައި ފެތުރެމުން އަންނަނީ އޮމިކްރޯން ވޭރިއަންޓެވެ.

އޮމިކްރޯން ވޭރިއަންޓާއެކު އެގައުމަށް މިހާރު ވަނީ ކޮވިޑްގެ ތިން ވަނަ ރާޅެއް ކުރިމަތިވެފައެވެ. މިއާއެކު ގިނަ ބަޔަކަށް ބިރުވެރިކަން އިހުސާސް ވެފައިވަނީ އިންޑިޔާއަށް މިދިޔަ އަހަރު ކުރިމަތިވި ކޮވިޑްގެ ނުރައްކާތެރި ދެވަނަ ރާޅުގައި ދިމާވި ހިތްދަތި ކަންތައްތަކުގެ ސަބަބުންނެވެ.

އެހެންކަމުން އިންޑިޔާގައި ހާލަތު ގޯސްވަމުންދާ ސަރަހައްދު ތަކުގައި މިހާރުވެސް ވަނީ ފިޔަވަޅުތައް އަޅަން ފަށާފައެވެ. އެގޮތުން އިންޑިޔާގެ ވެރިރަށް ނިއުދިއްލީގައި ރޭގަނޑު ކާފިއު ހިންގަމުން ގެންދާއިރު، ހަފްތާ ބަންދުގައި މީހުން ބޭރުތެރޭގައި އުޅޭ މިންވަރު މަދުކުރުމުގެ ފިޔަވަޅުތައް އަންނަނީ ތަންފީޒު ކުރަމުންނެވެ. އެގޮތުން ކޮންމެހެން އޮފީހަށް ނިކުންނަށް ނުޖެހޭ މީހުން ގޭގައި ތިބެގެން މަސައްކަތް ކުރުމަށް މިހާރު ވަނީ އަންގާފައެވެ.

މީގެއިތުރުން ޓެކް ހަބްގެ ގޮތުގައި ބެލެވޭ ބެންގަލޫރުގައިވެސް ކާފިއު ހިންގަމުން އަންނައިރު ވިޔަފާރީގެ މައި ހަބްގެ ގޮތުގައި ބެލެވޭ މުމްބާއީގައިވެސް ވަނީ ރޭގަނޑު ގަޑީގައި ކާފިއު އިއުލާނު ކޮށްފައެވެ.

އޭއެފްޕީ އާ ވާހަކަ ދެއްކި އިންޑިޔާގެ ނަރުހުންނާއި ޑޮކްޓަރުން ބުނެފައިވަނީ މިހާތަނަށް އަދި ފެނިފައިވާ ކޭސްތަކުގެ ތެރެއިން ހޮސްޕިޓަލް ތަކުގައި އެޑްމިޓްކޮށްގެން ފަރުވާދޭ މީހުންގެ އަދަދު މަދުކަމަށެވެ. އަދި ކުރިން ތަޖުރިބާކުރި ކަންކަމުގެ އަލީގައި މިފަހަރު މިކަމަށް ރަނގަޅަށް ތައްޔާރުވެވިފައި ވާކަމަށް އެމީހުން ބުނެފައިވެއެވެ. މިދިޔަ އަހަރު ކޮވިޑްގެ ދެ ވަނަ ރާޅާ ކުރިމަތި ވިއިރު، ނަފްސާނީ ގޮތުންވެސް ތިބީ އެކަމަށް އެހާ ބޮޑަށް ތައްޔާރުވެފައި ނޫންކަމަށާއި ނަމަވެސް މިހާރު އޭރަށްވުރެ ބޮޑަށް މިއީ ކިހާވަރެއްގެ ކަމެއްކަން އެނގޭ ކަމަށް ފްރޮންޓްލައިންގައި މަސައްކަތްކުރާ މީހުން ވަނީ ބުނެފައެވެ.

އިންޑިޔާއަށް ކޮވިޑްގެ ދެވަނަ ރާޅު ކުރިމަތިވިއިރު އޮކްސިޖަން ލިބުމުގައި ދިމާވި ދަތިތަކާއި އެކަށީގެންވާރަށް ފަރުވާ ނުދެވި ބަލި މީހުންނައިގެން ހޮސްޕިޓަލްތައް ފުރިގެން ދިޔުމާއެކު އެތައް ބަޔަކު ދިޔައީ މަރުވަމުންނެވެ. އެގޮތުން ދެތިން ހަފްތާތެރޭގައި ދެ ލައްކަ މީހުން ވަނީ މަރުވެފައެވެ. ނަމަވެސް މިފަހަރު އެއަށްވުރެ ބޮޑަށް ތައްޔާރުވެފައިވާ ކަމަށް އެގައުމުން އަންނަނީ ބުނަމުންނެވެ.

އިންޑިޔާގެ ހެލްތު މިނިސްޓްރީން ބުނެފައިވަނީ ހުކުރު ދުވަހު 302 މީހުން ކޮވިޑް ޖެހިގެން މަރުވެފައިވާ ކަމަށެވެ. މިއާއެކު ކޮވިޑް ޖެހިގެން މަރުވި މީހުންގެ އަދަދު ވަނީ 483،178ށް އަރާފައެވެ. އެގައުމުގައި ކޮވިޑް ޖެހުނު މީހުންގެ އަދަދު ވަނީ 35.23 މިލިއަނަށް އަރާފައެވެ.