ކާށިދޫގައި ކުރިއަށް ގެންދިޔަ "ޑޮމެސްޓިކް އެޕްލަޔަންސަސް ސޭފްޓީ" ވޯރކްޝޮޕް ކާމިޔާބުކަމާއެކު ނިންމާލައިފި
ގޭތެރޭގައި ބޭނުންކުރާ ކަރަންޓު ސާމާނާ ގުޅޭގޮތުން މުހިއްމު މަޢުލޫމާތުތަކެއް ވަނީ ދެވިފައި
ކާށިދޫގައި ކުރިއަށް ގެންދިޔަ ވޯރކްޝޮޕްގެ ބައިވެރީންނާއި ލެކްޗަރާއިން
އަންހެނުންނަށް ޚާއްސަކޮށްގެން ކ. ކާށިދުގައި ކުރިއަށް ގެންދިޔަ "ޑޮމެސްޓިކް އެޕްލަޔަންސަސް ސޭފްޓީ" ވޯރކްޝޮޕް ކާމިޔާބުކަމާއެކު ނިންމާލައިފިއެވެ.
މިއީ ކާށިދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީއާއި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން ކުރިއަށް ގެންދެވުނު ވޯރކްޝޮޕެކެވެ. ދެ ދުވަހަށް ބަހާލައިގެން ކުރިއަށް ގެންދެވުނު މި ވޯރކްޝޮޕްގައި ހަތަރު ސެޝަނެއް ވަނީ ބޭއްވިފައެވެ.
ކާށިދޫގެ އަންހެނުންގެ ތަރައްގީއަށް މަސައްކަތްކުރާ ކޮމެޓީން ހާމަކޮށްފައިވާ ގޮތުގައި މި ސެޝަންތަކުގައި ބައިވެރީންނަށް ވަނީ، ގޭތެރޭގައި ބޭނުންކުރާ ކަރަންޓު ސާމާނާއި ގުޅޭ ގޮތުން މުހިއްމު މައުލޫމާތު ތަކެއް ދެވިފައެވެ. އޭގެތެރޭގައި ގޭތެރޭގައި ބޭނުންކުރާ ސާމާނުގެ ޕްލަގް ބަދަލުކުރުމާއި ބޮކި ހޯލްޑަރ އަދި ސްވިޗާއި ސޮކެޓްފަދަ އާލަތްތައް ގުޅަން ދަސްކޮށްދެވިފައި ވާނޭކަމަށާއި އެއާރ ކަންޑިޝަނާއި އައިސްއަލަމާރި ރައްކާތެރިކަމާއިއެކު ސާފުކުރާނެ ގޮތާއި މިތަކެއްޗަށް ދިމާވާ ކުދިކުދި މައްސަލަތައް ދެނެގަނެ އެ މައްސަލަތައް ހައްލުކުރާނެ ގޮތްވެސްވަނީ ކިޔައިދެވިފައެވެ. އަދި ގޭގައި ބޭނުންކުރާ ކަރަންޓް ބައެއް ސާމާނު ރޫޅާނެ ގޮތާއި އެއަށް ދިމާވެފައިވާ މައްސަލަތައް ދެނެގަނެ ހައްލުކުރާނެ ގޮތްވެސް ވަނީ ކިޔައިދެވިފައި ކަމަށެވެ. މިގޮތުން ބައިވެރިން ގެނައި އިސްތިރި، ފަހާފޮށި، ރޭޑިޔޯ އަދި ލެޕްޓޮޕް ފަދަ ތަކެތި ބައިވެރީން އަމިއްލައަށް ރޫޅައިގެން ވަނީ ރަނގަޅުކޮށްފައެވެ.
މި ވޯރކްޝޮޕް ކާމިޔާބު ކަމާއިއެކު ނިންމާލުމުގައި ކ. އަތޮޅު ސްކޫލްގެ މެނޭޖްމަންޓާއި، ޚާއްސަކޮށް ކ. އަތޮޅު ސްކޫލްގެ ޕްރިންސިފަލްގެ ފަރާތުން ލިބުނު އެހީތެރިކަން ފާހަގަކޮށް ކާށިދޫ އަންހެނުންގެ ތަރައްގީއަށް މަސައްކަތް ކުރާ ކޮމެޓީން ވަނީ އެ ފަރާތްތަކަށް ޝުކުރު އަދާކޮށްފައެވެ.
