ބޭރަށް ހިންގުމާއި ހޮޑުލުން އިތުރުވަނީ، ސަމާލުވޭ!

ރާއްޖޭގައި ބޭރަށް ހިންގުމާއި ހޮޑުލުން އިތުރުވަމުންދާތީ ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެޗްޕީއޭއިން ކުރި ޓްވީޓެއްގައި ބުނީ ބޭރަށް ހިންގައި ހޮޑުލެވޭތީ ރިޕޯޓްކުރާ ކޭސްތަކުގެ އަދަދު އިތުރުވަމުން ދާކަމަށެވެ. އެހެންކަމުން މިފަދަ އެއްވެސް ކަމެއްގެ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަށް އެޗްޕީއޭއިން ވަނީ އިލްތިމާސް ކޮށްފައެވެ.

ބޭރަށް ހިންގުމުގެ އިތުރުން އާދަޔާ ޚިލާފަށް ކަރު ހިއްކުމާއި، ބޮލަށް އެނބުރުން އެރުމާއި، މާބޮޑަށް ވަރު ދެރަވެ ދިޔާތަކެތި ބޭނުން ކުރެވޭގޮތް ނުވުމާއި، ކުޑަކަމުދެވޭ މިންވަރު މަދުވުމާއި، ގިނަގިނައިން ހޮޑުލެވުމާއި، ލެވޭ ހޮޑުގައި ނުވަތަ ބޮޑުކަމުތާ ތަކެތީގައި ލޭގެ އަސަރު ހުރުމާއި، އާދަޔާ ޚިލާފަށް ބަނޑުގައި ރިއްސާނަމަ ވީހާވެސް އަވަހަކަށް ޑޮކްޓަރެއްގެ އިރުޝާދު ހޯދުމަށްވެސް އެޗްޕީއޭއިން ވަނީ އިލްތިމާސް ކޮށްފައެވެ.

ބޭރަށް ހިންގައި ހޮޑުލެވޭނަމަ ގިނަގިނަިއން ލޮނުޕެކެޓު، ފެން އަދި ސޫޕް ފަދަ ދިޔާތަކެތި ބޭނުންކުރުމަށާއި، ފާހާނާ ކުރުމަށްފަހު އަދި ކާބޯތަކެތި ތައްޔާރު ކުރުމުގެ ކުރިން ސައިބޯނި ލައިގެން ރަނގަޅަށް އަތް ދޮވުމަށް އެޗްޕީއޭއިން އިލްތިމާސް ކުރެއެވެ. އަދި ބޭރަށް ހިންގުމުގެ އަލާމާތްތައް ނުފެންނަތާ 1 ދުވަސް ވަންދެން ސްކޫލަށް ނުފޮނުވާ، މަސައްކަތަށް ނުނިކުމެ ގޭގައި އަރާމު ކުރުމަށާއި، އާންމުން އެއްވެ އުޅޭ ސަރަހައްދު ތަކަށް ނިކުމެ އުޅުން މަދުކުރުމަށް އެޗްޕީއޭއިން ވަނީ އިލްތިމާސްކޮށްފައެވެ.