ނޮޅިވަރަމުގެ ކެފޭއެއް އަނދައި ހުލިވެ، ބޮޑު ގެއްލުމެއް!

ހދ. ނޮޅިވަރަމުގައި އަމިއްލަ ފަރާތަކުން ހިންގާ ކެފޭއެއްގައި ރޯވެ، ބައިލައްކައަށް ވުރެ ގިނަ ރުފިޔާގެ ގެއްލުމެއް ލިބިއްޖެއެވެ.

މި ކެފޭއަކީ އެ ރަށުގެ ބަނދަރު މަތީގައި ހުންނަ، ގާޑިއާ ސްޓައިލަށް ހިންގާ ކެފޭއެކެވެ. އާދީއްތަ ދުވަހުގެރޭ އެތަނުގައި އަލިފާން ރޯވެ ހިނގި ހާދިސާގައި ކެފޭ ވަނީ އެއްކޮށް އަނދައި ހުލިވެފައެވެ.

ނޮޅިވަރަމު ކައުންސިލުން މައުލޫމާތު ދެއްވިގޮތުގައި އެ ކެފޭގައި އަލިފާން ރޯވެފައިވާކަން އެނގުނީ ފަތިހު 4:30ހާއިރު، ބަނދަރުމައްޗަށް ފުރަން ދިޔަ ދެ ކުއްޖަކަށް އެތަން ފެނިގެން، ކެފޭގެ ވެރިފަރާތައް އެންގުމުން ކަމަށެވެ.

މި ކެފޭއަކީ އެ ރަށު ކައުންސިލުން ދޫކޮށްފައިވާ ބިމުގައި ގާޑިއާ އުސޫލަށް ހިންގާ ދެ ކެފޭގެ ތެރެއިން އެއް ކެފޭއެވެ. ކައުންސިލުން މައުލޫމާތު ދިންގޮތުގައި، މި އަލިފާނުގެ ހާދިސާގެ ސަބަބުން އެތަނުގައި ގެންގުޅޭ ހުރިހާ ސާމާނެއް ވަނީ އަނދައި ހުލިވެފައެވެ. އަދި އިމާރާތަށް ލިބުނު ގެއްލުމާއެކު، 75،000 އެއްހާ ރުފިޔާގެ ގެއްލުން އެތަނަށް ލިބޭނެކަމަށް ލަފާކުރެވޭކަމަށް މައުލޫމާތު ދެއްވައެވެ.

އެ ކެފޭގައި އަލިފާން ރޯވާން މެދުވެރިވި ސަބަބު ފުލުހުން މިހާރު އަންނަނީ ތަޙުޤީޤުކުރަމުންނެވެ.