ހދ. ނޮޅިވަރަމު، 28 އަހަރުގެ ނިޝާމާ މުހައްމަދުގެ މަރުގެ މައްސަލައިގައި ހައްޔަރުކޮށްފައިވާ އޭނާގެ ފިރިމީހާ، އދ. ފެންފުށި ރޯޒީ ވިލާ، 32 އަހަރުގެ އަބޫބަކުރު ފައިސަލްގެ ހާލަތަށް ބަދަލެއް ނާންނަ ކަމަށް ކުޅުދުއްފުށި ރީޖަނަލް ހޮސްޕިޓަލުން ބުނެފިއެވެ.

އެ ހޮސްޕިޓަލުގެ އޮފިޝަލަކު "ރާއްޖެ އެމްވީ" އަށް ބުނީ އޭނާއަށް އަދިވެސް ފަރުވާ ދެނީ އައިސީޔޫގައި ވެންޓިލޭޓަރުގެ އެހީގައި ކަމަށެވެ. އޭނާ ވެންޓިލޭޓަރަށް ލާފައިވަނީ ސިކުނޑިއަށް އޮކްސިޖަން ފޯރުކޮށްނުދޭތީ ކަމަށް ވެސް އެ ހޮސްޕިޓަލުން ބުނެފައިވެއެވެ.

ފައިސަލްއަށް ކުޅުދުއްފުށީ ރީޖަނަލް ހޮސްޕިޓަލުގެ އައިސީޔޫގައި ފަރުވާދެމުންދަނީ އޭނާގެ އަންހެނުންގެ މަރުގެ މައްސަލައިގައި ހައްޔަރުގައި ހުއްޓާ ދަަންޖެހެން މަސަައްކަތް ކުރުމުންނެވެ. އޭނާ އެކަން ކޮށްފައިވަނީ މި މަހުގެ 12 ވަނަ ދުވަހުގެ ރޭ 23:15 އެހާއިރު އެވެ. ފައިސަލް ދަންޖެހިފައިވަނީ ކުޅުދުއްފުށީ ފުލުހުންގެ ބަންދުގައި ހުއްޓައެވެ. މި ހާދިސާގެ އިތުރު ތަފްސީލެއް ފުލުހުން ހާމައެއް ނުކުރެއެވެ.

މި މައްސަލައިގައި ފައިސަލްގެ ބަންދާ މެދު ގޮތެއް ނިންމަން ކޯޓަށް ހާޒިރު ކުރުމުން 15 ދުވަހުގެ މުއްދަތަށް ބަންދުގައި ބަހައްޓައިގެން ތަހުގީގު ކުރުމަށް ކޯޓުން ވަނީ ހުއްދަ ދީފައެވެ. އިތުބާރު ހުރި މަސްދަރަކުން ރާއްޖެއެމްވީއަށް ކިޔާދީފައިވާ ގޮތުގައި، ފުލުހުންގެ ބެލުމުގެ ދަށުގައި ހުއްޓައި އޭނާ ދަންޖެހެން މަސައްކަތް ކުރީ ބާލީހުގެ އުރަ ގޮޅީގެ ތޭރިތަކުގައި އައްސައިގެންނެވެ.

މައުލޫމާތު ލިބިފައިވާ ގޮތުގައި އޭނާ ހޮސްޕިޓަލަށް ގެންދިޔަ އިރުވެސް ވިންދު ނެތެވެ. އަދި އިމަރޖެންސީގައި ވަގުތުން ފަރުވާ ފަށާ، ވިންދު އައުމުން އައިސީޔޫއަށް ބަދަލުކުރެވި ވެންޓިލޭޓަރަށްވެސް ވަނީ ލާފައެވެ.

ފުލުހުންގެ ބެލުމުގެ ދަށުގައި ހުއްޓާ އޭނާ ދަންޖެހެން މަސައްކަތް ކުރި މައްސަލައިގައި ފުލުހުންގެ އިހުމާލެއްވޭތޯ ބަލަން ރައްޔިތުންގެ މަޖިލީހުގެ މަޑުއްވަރީ ދާއިރާގެ ޕީއެންސީގެ މެންބަރު އާދަމް ޝަރީފް އުމަރު ވަނީ މައްސަލަ މަޖިޅިހަށް ހުށަހަޅުއްވަން ނިންމަވާފައެވެ. އެގޮތުން މި މައްސަލަ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ މެދުވެރިކޮށް ބަލައިދިނުމަށް އެދި ރައްޔިތުންގެ މަޖިލީހުގެ ރައީސަށް އޭނާ ވަނީ ސިޓީއެއް ހުށަހަޅުއްވާފައެވެ.

ރާއްޖެއެމްވީއަށް އެނގިފައިވާ ގޮތުގައި ކޮންމެ 10 މިނެޓަކުން ފުލުހުން ގޮޅި ޗެކް ކުރެއެވެ. އެގޮތުގެ މަތިން އޭނާގެ ގޮޅި ޗެކް ކުރިތާ 10 މިނެޓު ނުވަނިސް ފުލުހުން އަނެއްކާވެސް އެ ގޮޅި ޗެކް ކޮށްފައިވެއެވެ.

ފައިސަލްގެ އަންހެނުން ނިޝާމާ މަރުވެފައި އޮއްވާ ފެނިފައިވަނީ މި މަހުގެ 10 ވަނަ ދުވަހު ނޮޅިވަރަމްގައި އޭނާ ދިރިއުޅެމުން އައި ގޭގެ ތެރެއިންނެވެ. އޭނާ މަރުވިފަހުން ފައިސަލް ޑޮކްޓަރަށް ދައްކަން ކަމަށްބުނެ ކުޅުދުއްފުއްޓަށް ގޮސްފައިވާ ކަމަށާއި އޭނާ ކުރިންވެސް ނިޝާމާއަށް އަނިޔާ ކުރާ ކަމަށް އެ ރަށުގެ މީހުން ބުނެއެވެ.