ރަށާއި އަތޮޅާއި މުޅި ރާއްޖެ، ޒުވާނުން ބޭނުންވާ ގޮތަކަށް ތަރައްޤީ ކުރުމުގެ ފުރުޞަތު މިހާރު އޮތީ ހުޅުވިފައި: ރައީސް
ނުކުޅެދުންތެރިކަން ހުންނަ 31 މީހަކު މިހާރުވެސް އެމްޓީސީސީ ގެ ވަޒީފާތަކުގައި އެބަތިބި
އެމްޓީސީސީއަށް 41 ވަނަ އަހަރު ފުރުމާއި ގުޅިގެން ބޭއްވި ހަފްލާގައި ރައީސް ވާހަކަދައްކަވަނީ
ޒުވާނުންގެ ރަށާއި އަތޮޅާއި މުޅި ރާއްޖެވެސް ޒުވާނުން ބޭނުންވާ ގޮތަކަށް ތަރައްގީކުރުމުގެ ފުރުސަތު މިހާރު އޮތީ ހުޅުވިފައިކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
އެމްޓީސީސީގެ 41 ވަނަ އަހަރީ ދުވަހުގެ ޙަފްލާގައި ވާހަކަދައްކަވަމުން ރައީސް ވިދާޅުވީ ރާއްޖޭގައި އެކި ކަންކޮޅުތަކުގައި އެމްޓީސީސީން ހިންގަމުންދާ ތަރައްގީގެ މަޝްރޫޢުތަކާއި ގުޅިގެން ވަޒީފާގެ ބައިވަރު ފުރުސަތުތައް ސަރުހައްދުތަކުގައި އުފެދިގެންދާނެކަމަށެވެ. ރަށްރަށުގައި އުފެދޭ އެ ވަޒީފާތަކަށް ސަރުކާރުން ބޭނުންވަނީ ދިވެހިންކަމަށް ރައީސް ވިދާޅުވިއެވެ. އެވަޒީފާތަކަށް ބޭނުންވަނީ ހުނަރުވެރި ކެރޭ ދިވެހި ޒުވާނުންކަމަށާއި މިއީ ސްކޫލްތަކުން ނުކުންނަ ދަރިވަރުންވެސް، އަދި ބެލެނިވެރިންވެސް މިހާރަށްވުރެ ބޮޑަށް ވިސްނަންވީ ކަމެއްކަމަށް ރައީސް ވިދާޅުވިއެވެ.
އެހެންކަމުން ރާއްޖޭގައި މިހާރު ހުރި ވަޒީފާގެ ފުރުޞަތުތަކުގެ ބޭނުން ހިފާ، ޤައުމީ ތަރައްޤީގައި ބައިވެރިވުމަށް ރައީސް ވަނީ ޒުވާނުންނަށް އިލްތިމާސްކުރައްވާފައެވެ.
ރައީސް ވިދާޅުވީ ގައުމުގެ ހިންގުންތެރިކަމުގެ ދާއިރާއަށް ބޭނުންވާ އިންސާނީ ވަސީލަތްތައް ތަރައްޤީކުރުމުގައި އެމްޓީސީސީއަކީ ވަރަށް މުހިންމު މަސައްކަތްތަކެއް ކުރާ ކުންފުންޏެއް ކަމަށެވެ. އަދި އިޖުތިމާއީ ޒިންމާގެ ދަށުން ކުންފުނީގެ ޙަރަކާތްތައް ރާވާލާފައި އޮތީ، މުޖުތަމަޢަށް ވަރަށް ފައިދާހުރި ގޮތަކަށް ކަމަށް ރައީސް ވިދާޅުވިއެވެ.
ރައީސް ވިދާޅުވީ ކުންފުނީގެ މައިގަނޑު މަސައްކަތްތަކަށް ބަލާއިރު، ޢާންމު ރައްޔިތުން ބޭނުންވާ އެންމެ މުހިންމު ޚިދުމަތްތަކާ އެންމެ ބޮޑަށް ގުޅިފައިވާ ކުންފުންޏަކީ އެމްޓީސީސީ ކަމަށެވެ. ރާއްޖޭގެ އިޤްތިޞާދީ ދާއިރާގައި ރައްޔިތުންނަށް މަގުފަހިކޮށްދިނުމުގައި އެމްޓީސީސީން ކުރަމުން އަންނަނީ ތަޢުރީފު ޙައްޤު މަސައްކަތްތަކެއް ކަމަށް ރައީސް ވިދާޅުވިއެވެ.
މަސްވެރިކަމުގެ ޞިނާޢަތަށް އައި އިންޖީނުގެ އިންޤިލާބަށްފަހު، ދިވެހި މަސްވެރިކަމަށް ބޭނުންވާ ޒަމާނީ ވަސީލަތްތައް ފޯރުކޮށްދިނުމުގައި، އެމްޓީސީސީން އަދާކުރަމުން އަންނަނީ ރައްޔިތުން ޝުކުރުވެރިކަމާއެކު ބަލައިގަންނަ ދައުރެއް ކަމަށް ރައީސް ވިދާޅުވިއެވެ. މަސްދޯނި ފަހަރުގެ އިންޖީނުން ފެށިގެން، ކުދިކުދި ސްޕެއަރޕާޓްސް އާއި އެހެން ވަސީލަތްތައް ފޯރުކޮށްދިނުމުގައި އެއްވެސް މެދުކެނޑުމެއްނެތް ކަމަށް ރައީސް ވިދާޅުވިއެވެ.
