އެމްޓީސީސީން ކުރިއަށް އޮތްތަނުގައި ބްރިޖާއި ޑޮކްޔާޑު އަޅާނެ: އާޒިމް
94 މަޝްރޫއެއްގެ މަސައްކަތްތައް ކުރިއަށްދާއިރު، އެއްފަހަރާ 64 މަޝްރޫއެއް އެއްވަގުތެއްގައި ހިންގަމުންދޭ
އެމްޓީސީސީގެ 41 ވަނަ އަހަރީ ދުވަހުގެ ޖަލްސާގެ ތެރެއިން، ރައީސް އިބްރާހިމް މުހައްމަދު ސޯލިހާއި އެމްޓީސީސީގެ ސީއީއޯ އާދަމް އާޒިމް،
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ކުރިއަށް އޮތްތަނުގައި ބްރިޖާއި ޑޮކްޔާޑު އަޅާނެ ކަމަށް އެކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާދިއްތަ ދުވަހުގެ ރޭ ކުރިއަށް ގެންދިޔަ އެމްޓީސީސީގެ 41 ވަނަ އަހަރީ ދުވަހުގެ ޖަލްސާގައި ވާހަކަދައްކަވަމުން އާޒިމް ވިދާޅުވީ މިސަރުކާރާއެކު ކުންފުންޏަށް ބޮޑެތި ކުރިއެރުންތަކެއް ލިބިފައިވާ ކަމަށާއި، ގެއްލުމާއެކު ހިންގި ކުންފުނިން މިސަރުކާރުގެ ތިން އަހަރު ބޮޑެތި ކާމިޔާބީތަކެއް ހާސިލްކޮށްފައިވާ ކަމަށެވެ.
އާޒިމް ވިދާޅުވީ 2018ގެ ކުރިން އެމްޓީސީސީއަށް ހިންގަފައިވަނީ އެއްފަހަރާ ގާތްގަނޑަކަށް 25ށް މަޝްރޫއު ކަމަށެވެ. ނަމަވެސް މިއަދު އެއްފަހަރާ 94 މަޝްރޫއެއްގެ މަސައްކަތްތައް ކުރިއަށްދާއިރު، އެއްފަހަރާ 64 މަޝްރޫއެއް އެއްވަގުތެއްގައި ހިންގަމުންދާ ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ މީގެ ކުރިން އެ ކުންފުންޏަށް ބަނދަރެއް ހެދެނީ ތިން އަހަރުން ކަމަށާއި، މިހާރު އެސްޕީޑް އެއް އަހަރަށް ބަދަލުކުރެވިފައިވާ ކަމަށެވެ. އެގޮތުން ހިމަންދޫ ބަނދަރު ހުޅުވިގެން ދިޔައީ އެއްއަހަރު ދުވަހުގެ މަސައްކަތުންކަން އާޒިމް ފާހަގަކުރެއްވިއެވެ. އާޒިމް ވިދާޅުވީ މީގެ ކުރިން އެއަރޕޯޓެއް އަޅަން ތިން އަހަރު ނަގާއިރު، މިއަދު ބިމެއް ހިއްކައިގެން އެއާޕޯޓު އެޅުމަށް ހޭދަވަނީ 18 ވަރަކަށް މަސް ދުވަސް ކަމަށެވެ.
އެމްޓީސީސީގެ މުސްތަގުބަލަށް އިޝާރާތް ކުރައްވައި އާޒިމް ވިދާޅުވީ މިހާރު މިދާ ގޮތަށް މަސައްކަތްތައް ކުރިއަށްދާނަމަ ކުރިއަށް އޮތްތަނުގައި ބައިނަލްއަގުވާމީ ބޮޑެތި މަޝްރޫއުތައް ހިންގޭނެ ކަމަށެވެ. އާޒިމް ވިދާޅުވީ އެފަދަ ގާބިލް ކުންފުންޏަކަށް އެމްޓީސީސީ ވެގެންދާނެ ކަމަށާއި، ކުންފުނިން އަމާޒު ހިފާފައިވަނީ ރައީސް އިބްރާހިމް މުހައްމަދު ސޯލިހު ޒައާމަތުގައި އެހިސާބަށް ވާސިލްވުމަށް ކަމަށެވެ.
އެގޮތުން ބްރިޖާއި ޑޮކްޔާޑު އަޅާނެ ކަމަށާއި، ހައި ސްޕީޑް ފެރީތައް ގާއިމްކުރާނެ ކަމަށް އާޒިމް ވިދާޅުވިއެވެ. އަދި އެ ފެންވަރުގެ ގާބިލް މުއައްޒަފުން ވެސް ބިނާކުރެވޭނެ ކަމަށް އާޒިމް ވިދާޅުވިއެވެ.
އެމްޓީސީސީގެ ހިންގުމުގެ އޮނިގަނޑު ހަރުދަނާ ކުރެވިފައިވާކަން ފާހަގަކުރައްވައި އާޒިމް ވިދާޅުވީ ކުންފުނީގެ މުއައްޒަފުންނަކީ މަސައްކަތްތެރި ބައެއް ކަމަށާއި، މަސައްކަތުގެ ވަގުތު ކޮފީ މޭޒުން ނުފެންނާނެ ކަމަށެވެ. އޭނާ ވިދާޅުވީ ދުވަހުން ދުވަހަށް ނިންމަންޖެހޭ މަސައްކަތްތައް ނިންމާތޯ ބެލުމާއި، މުއައްޒަފުންގެ ކަންކަން ވަރަށް ގާތުން ބަލަމުންދާ ކަމަށެވެ. މުއައްޒަފުން ގާބިލް ބަޔަކަށް ހެދުމަށާއި، ފަހި ފުރުސަތުތައް ހޯދައިދިނުމަށް މަސައްކަތް ކުރަމުންދާ ކަމަށް އާޒިމް ވިދާޅުވިއެވެ. އަދި ވިދާޅުވީ ކުންފުނީގެ ހުރިހާ މުއައްޒަފުން ކަސްޓަމާސަވިސްގެ ރޮނގުން ތަމްރީންވާން ޖެހޭ އުސޫލެއް ގާއިމްކުރެވި ހިނގަމުންދާ ކަމަށެވެ.
މީގެ އިތުރުން އާޒިމް ވިދާޅުވީ ކުރިއަށް އޮތީ ކުންފުންޏަށް ފަހި ދުވަސްތަކެއް ކަމަށެވެ. 2020 އަހަރު ރެކޯޑް މިންވަރަށް ފައިދާވެފައިވާއިރު، 2021 ވަނަ އަހަރުގެ މިހާތަނަށް ކުންފުނީގެ ފައިދާ މިދިޔަ އަހަރުގެ ފައިދާއަށްވުރެ އިތުރުވެފައިވާ ކަމަށް އާޒިމް ވިދާޅުވިއެވެ.
