އެކި ބޭނުންތަކަށް މާލެ އަންނަ މީހުންނަށް ފޭރޭ މީހުން ޓާގެޓް ކުރޭ: ފުލުހުން
9 ޑިސެމްބަރު 2021 | ބުރާސްފަތި 18:53ފާއިތުވެދިޔަ ދުވަސްތަކުގައި ބްލެކްމެއިލްކޮށްގެން ފައިސާ ހޯދާފައިވާ މިންވަރު ވަނީ އިތުރުވެފައި
ފުލުހުން ބޭއްވި ނޫސްވެރިންގެ ބައްދަލުވުމުގެ ތެރެއިން
ފައިސާ ފޭރުމުގެ އަމަލު ހިންގާ މީހުން އެކި އެކި ބޭނުންތަކަށް މާލެ އަންނަ މީހުންނަށް ޓާގެޓް ކުރާ ކަމަށް ފުލުހުން ބުނެފިއެވެ.
ފުލުހުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މޭޖާ ކްރައިމްސް އިންވެސްޓިގޭޝަންގެ ހެޑް ޗީފް ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ފާއިތުވެދިޔަ ދުވަސްތަކުގައި ބްލެކްމެއިލްކޮށްގެން ފައިސާ ހޯދާފައިވާ މިންވަރު އިތުރުވެފައިވާ ކަމަށެވެ.
ޝިފާއު ވިދާޅުވީ ފައިސާ ފޭރުމުގައި އުމުރުން ދުވަސްވީ މިހުންނަށް ޓާގެޓް ކުރާކަން ފާހަގަކުރެވިފައިވާ ކަމަށެވެ. އަދި އެކި އެކި ބޭނުންތަކަށް މާލެ އަންނަ މީހުންގެ އިތުރުން މަސްވެރިންނަށާއި މަސްދޯނި ފަހަރުތަކުގައި އަދި މުދާ އުފުލާ ދޯނިތަކުގައި ހަރަކާތްވާ މީހުންނަށް ޓާގެޓް ކުރަމުންދާ ކަމަށް ވެސް ވިދާޅުވިއެވެ.
މިޒާތުގެ ކުށްކުށަށް އަރައިގަތުމުގައި އުމުރުން 18 އަހަރު ނުފުރޭ ކުޑަކުދިން ބައިވެރި ކުރާކަން ވަނީ ފާހަގަކުރެވިފައި ކަމަށާއި މިކަންތައްތަކަށް އާންމުން އިތުރަށް ހޭލުންތެރިވާން ޖެހޭ ކަމަށް ޝިފާއު ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ތެފްޓް އެންޑް އޯގަނައިޒްޑް ކްރައިމް އިންވެސްޓިގޭޝަންސްގެ ހެޑް އިންސްޕެކްޓަރ އޮފް ޕޮލިސް މުހައްމަދު ލަތީފް ވިދާޅުވީ މިދިޔަ މަހުގެ 26 ވަނަ ދުވަހުގެ 2:35ގައި 15 މީހުންގެ ގްރޫޕަކުން ހުއްދަ ނޫން ގޮތުގައި ބަޔަކު ހިފަހައްޓައި، އޭގެ ތެރެއިން ދެ މީހަކު ނުރުހުމުގައި ކާރަކަށް އަރުވައިގެން ގެންގޮސް އެ ފަރާތްތަކަށް ޖިސްމާނީ ގޮތުން ބޮޑެތި އަނިޔާތަކެއް ކޮށްފައިވާ މައްސަލައެއް ހުށަހެޅިފައިވާ ކަމަށެވެ.
އޭނާ ވިދާޅުވީ އެ މައްސަލައާ ގުޅިގެން މިހާތަނަށް، 21 އަހަރާއި 36 އަހަރާ ދެމެދުގެ ހަތަރު ފިރިހެނަކު ހައްޔަރު ކޮށްފައިވާ ކަމަށެވެ. އޭގެ ތެރެއިން ތިން މީހުންގެ ބަންދުގެ މުއްދަތު ދަމަހައްޓައި، 36 އަހަރުގެ މީހާ ޝަރުތުތަކަކާ އެކު ދޫކޮށްލާފައިވާ ކަމަށް ވެސް ލަތީފު ވިދާޅުވި އެވެ. އެ މައްސަލާގައި ހައްޔަރުކޮށްފައިވަނީ ތޫނު ހަތިޔާރު ބޭނުންކޮށްގެން މާރާމާރި ހިންގުމާއި ފޭރުމާއި މަސްތިވާތަކެތީގެ ރެކޯޑު ވެސް އޮންނަ މީހުންކަން ލަތީފް ފާހަގަ ކުރެއްވިއެވެ.
ރަހީނުކޮށް ބިރުދައްކައި ފައިސާ ފޭރުމުގެ މައްސަލަތަކުގައި ބިދޭސިން އިސްވެ ތިބެ ހިންގާ ގެސްޓްހައުސްތަކަށް މީހުން ގެންގޮސް އެފަދަ އަމަލުތައް ހިންގާކަން ތަހުގީގަށް ފާހަގަވެފައިވާ ކަމަށް ފުލުހުން ބުންޏެވެ. މިފަދަ މައްސަލަތައް ގިނައިން ހިނގިޔަސް ރިޕޯޓް ކުރާ މިންވަރު މަދު ކަމަށް ފުލުހުން ބުންޏެވެ.
