ހިޔާ ފްލެޓް ސަރަހައްދުގައި ފުލުހުން ފޯރިމަރަނީ!
8 ޑިސެމްބަރު 2021 | ބުދަ 18:19އެސަރަހައްދުގައި ބެރިކޭޑް ޖަހައި، ވަނީ ބަންދުކޮށްފައި
ހިޔާ ފްލެޓް ސަރަހައްދުގައި ފުލުހުން ހަރަކާތްތެރިވަނީ
ހުޅުމާލެ ފޭސް ދޭއްގައި ހުންނަ ހިޔާ ފްލެޓްތަކުގެ ސަރަހައްދުގައި ފުލުހުން ފޯރިމަރަން ފަށައިފިއެވެ.
އެސަރަހައްދުގައި ފުލުހުން ފޯރިމަރަން ފަށާފައި މިވަނީ، ހުއްދަނެތި، އިދިކޮޅު ޕީޕީއެމް/ޕީއެންސީ ކޯލިޝަނުން ހުޅުމާލޭ ފޭސް ދޭއްގައި "ކޮތަރު ކޮށި" ޖަލްސާ ބޭއްވުމަށް ތައްޔާރުވުމުގެ މަސައްކަތް ފަށާފައިވަނިކޮށެވެ. އެގޮތުން ބުދަ ދުވަހުގެ ރޭ ގާތްގަނޑަކަށް 8:00 ހާއިރު، ޕީޕީއެމް/ޕީއެންސީއަށް ނިސްބަތްވާ މެމްބަރުން އެސަރަހައްދަށް ގޮސް، ދިދަ ޖެހުމުގެ މަސައްކަތް ކޮށްފައިވެއެވެ.
ފުލުހުން އެސަރަހައްދުގައި ފޯރިމަރަން ފަށާފައިވާއިރު، އެއްވެސް ހަރަކާތެއް ކުރިއަށް ނުގެންދެވޭ ގޮތަށް ބެރިކޭޑް ޖަހައި، ވަނީ ބަންދުކޮށްފައެވެ.
ފުލުހުން ފޯރިމަރަން ފަށާއިރު، އެކަމާގުޅޭގޮތުން މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ، ކައުންސިލްގެ އިޚްތިސާސްގެ ތެރޭގައި އޮންނަ ސަރަޙައްދެއްގައި ސިޔާސީ ޕާޓީ އަކުން ޖަލްސާއެއް ބާއްވަން އެދުމުން، އެކަމަށް ކައުންސިލުން ދީފައިވާ ހުއްދަ ތަންފީޒުކުރުމަށް ފުލުހުން ހުރަސް އަޅަމުންދާ ކަމަށެވެ. އަދި އެކަމުގައި ފުލުހުން ގާނޫނީ ގޮތުން ޖަވާބުދާރީކުރުވާނެ ކަމަށް މޭޔަރު މުއިއްޒު ވިދާޅުވިއެވެ.
މާލޭ ސިޓީ ކައުންސިލާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ދެމެދު އުފެދިފައިވާ މައްސަލަ އިތުރަށް ހޫނުވެފައިވާއިރު، މި ޖަލްސާއާ ގުޅޭގޮތުން އިދިކޮޅު ކޯލިޝަނުން ބުނެފައިވަނީ, ހުކުރު ދުވަހުގެ ރޭ ހުޅުމާލެ ދެވަނަ ފިޔަވަހީގައި ބޭއްވުމަށް މަސައްކަތް ކުރަމުން އަންނަ "ކޮތަރުކޮށި" ޖަލްސާ ބާއްވަން ހުއްދަ ހޯދަން ޖެހެނީ މާލެ ސިޓީ ކައުންސިލުން ކަމަށެވެ. ނަމަވެސް ހުޅުމާލޭގެ އެއްވެސް ސަރަހައްދެއްގައި އިވެންޓެއް ބޭއްވުމުގެ ހުއްދަ ހޯދަން ޖެހެނީ، އެޗްޑީސީއަށް ލިޔުމުން ހުށަހަޅައިގެން ކަމަށް އެޗްޑީސީން ބުނެއެވެ. ޕީޕީއެމުން ބުނީ، ޖަލްސާ ބޭއްވުމުގެ ހުއްދަ މާލެ ސިޓީ ކައުންސިލުން މިހާރު ހޯދާފައިވާ ކަމަށާއި، ހުޅުމާލެއަކީ މާލެ ސިޓީ ކައުންސިލްގެ އިޚްތިސާސް ތެރޭގައި ހިމެނޭ ތަނެއް ކަމުން، އެކަމަށް ހުއްދަ ހޯދަން ޖެހެނީ މާލެ ސިޓީ ކައުންސިލުން ކަމަށެވެ.
މާލެ ސިޓީގެ ޑެޕިއުޓީ މޭޔަރު އަހުމަދު ނަރީޝް ސޮއިކުރައްވައި ޕީޕީއެމްގެ ރައީސް ޔާމީނަށް ފޮނުއްވި ސިޓީގައި ބުނެފައިވަނީ، ހުޅުމާލޭގެ ހިޔާ ފްލެޓް ހިމެނޭ ސަރަހައްދުގައި "ކޮތަރުކޮށި" ނަމުގައި ބޭއްވުމަށް އެދިފައިވާ ޖަލްސާ ބޭއްވުމަށް މާލެ ސިޓީ ކައުންސިލްގެ އެއްވެސް އިއުތިރާޒެއް ނެތްކަމަށެވެ.
އެޗްޑީސީން ބުނެފައިވަނީ މިފަދަ ހަރަކާތެއް ބޭއްވުމަށް ބޭނުންވާ ފަރާތްތަކުން އެކަމަށް އެދި އެކޯޕަރޭޝަނަށް ހުށައަޅައިގެން އެހެން ފަރާތްތަކުންވެސް އަމަލުކުރާ އުސޫލުގެ ތެރެއިން އެ ހުއްދައަށް އެދުމުގެ ފުރުސަތު އޮންނާނެ ކަމުގައެވެ. އެހެންކަމުން އެގޮތަށް އަމަލު ކުރުމަށް ހުރިހާ ފަރާތްތަކަށް ވެސް އެޗްޑީސީން ވަނީ އިލްތިމާސްކޮށްފައެވެ. ހުޅުމާލޭގައި ބާއްވާ އެކި އިވެންޓްތަކަކީ ދުރާލައި އެޗްޑީސީން ހުއްދަ ނަގައިގެން ބާއްވާ އިވެންޓުތަކެއް ކަމަށާއި، ހުއްދައަށް އެދިފައި ނުވާ ކަމަށް އެޗްޑީސީން ވަނީ ބުނެފައެވެ. އެކަމުގެ މައުލޫމާތު އެޗްޑީސީއަށް ލިބުނީވެސް މީޑިއާއިން ކަމަށް އެޗްޑީސީން ވަނީ ބުނެފައެވެ.
ހުކުރު ދުވަހުގެރޭ ހުޅުމާލޭގައި ބާއްވާ ޖަލްސާގައި ޕީޕީއެމްގެ ރައީސް އަދި ކުރީގެ ރައީސް ޔާމީނާއި، އެކޯލިޝަންގެ އިސްބޭފުޅުންވެސް ބައިވެރިވާ ގޮތަށް ވަނީ ހަމަޖެހިފައެވެ.
މާލެ ސިޓީ ކައުންސިލާ އެޗްޑީސީއާއިމެދު މިހާރުވެސް ހުޅުމާލޭގެ އިޚްތިސާސްއާ ގުޅޭގޮތުން ދެބަސްވުންތަކެއް އޮވެއެވެ. ގާނޫނުގައި ބުނާގޮތުން ހުޅުމާލޭގެ އެންމެހައި ކަންކަން ބަލަހައްޓަން ޖެހޭނީ މާލެ ސިޓީ ކައުންސިލަށެވެ. އެޗްޑީސީން ބުނީ ހުޅުމާލޭގެ އިޚްތިސާސް އޮންނަނީ އަދިވެސް އެޗްޑީސީއަށް ކަމަށެވެ.
