2022 ވަނަ އަހަރުގެ ބަންދު ދުވަސްތަކުގެ ގޮތުގައި އިތުރު ދުވަސްތަކެއް ކަނޑައަޅުއްވައިފި
ބަންދު ދުވަސްތަކުގެ ގޮތުގައި އިތުރު ހަތަރު ދުވަހެއް ވަނީ ކަނޑައަޅުއްވާފައި
ރައީސުލްޖުމްހޫރިއްޔާގެ އޮފީސް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް، 2022 ވަނަ އަހަރުގެ ބަންދު ދުވަސްތަކުގެ ގޮތުގައި އިތުރު ދުވަސްތަކެއް ކަނޑައަޅުއްވައިފިއެވެ.
މިކަން އިއުލާނު ކުރައްވާފައި ވަނީ ރައީސުލްޖުމްހޫރިއްޔާގެ އޮފީހުން ބުދަ ދުވަހު ނެރުއްވިދެންނެވުމެއްގައެވެ.
މިގޮތަށް ކަނޑައަޅުއްވާފައި ވަނީ ރަސްމީ ބަންދު ދުވަހަށް ފަހު ސަރުކާރު ހުޅުވޭ ދުވަހުގެ ކުރިއަށް ހަފްތާ ބަންދު ދިމާވާ ބުދަ އަދި ބުރާސްފަތި ދުވަސްތަކެވެ. އެގޮތުން ހަތަރު ދުވަހެއް ރައީސް ވަނީ ބަންދު ކުރައްވާފައެވެ.
އެގޮތުން މޭ މަހުގެ ފަސް ވަނަ ދުވަސް ބަންދުކޮށްފައި ވަނީ ފިތުރު އީދު ނިމި އަލުން ސަރުކާރު ހުޅުވޭ ދުވަހަކަށް ބުރާސްފަތި ދުވަސް ވާތީއެވެ.
މިއަންނަ އަހަރުގެ ބޮޑު އީދު ދުވަހަކީ ޖުލައި ނުވައެއްވާ ހޮނިހިރު ދުވަހެވެ. އަދި މީގެ ކުރިން އޮތް ގޮތުން އީދު ބަންދު ނިމި އަލުން ސަރުކާރު ހުޅުވޭނީ ޖުލައި މަހުގެ 13 ވަނަ ދުވަހުއެވެ. އެހެންކަމުން ޖުލައި 13 އަދި 14 ވަނަ ދުވަސް ވަނީ ބަންދު ދުވަސްތަކެއްގެ ގޮތުގައި ކަނޑައަޅުއްވާފައެވެ. މިއާއެކު މުޅި އެ ހަފްތާ އެއްކޮށް ބަންދު ވާނެއެވެ.
ޖުލައި 28 ވަނަ ދުވަސް ބަންދު ދުވަހެއްގެ ގޮތުގައި ކަނޑައަޅުއްވާފައި ވަނީ މިނިވަން ދުވަހަށް ފަހު ސަރުކާރު އަލުން ހުޅުވޭނީ ބުރާސްފަތި ދުވަހު ކަމަށް ވާތީއެވެ.
