ރައީސް ޔާމީނު ބޭރަށް ފުރުވާލުމަށް އެކި ސިފަސިފައިގައި މިސަރުކާރުން މަސައްކަތް ކުރި: އަބްދުއްރަހީމް
ގައުމު ދޫކުރައްވައި ވަޑައިގަންނަވާނެ އެހެންތަނެއް ނޯންނާނެ ކަމަށް ރައީސް ޔާމީން ވިދާޅުވި
މަރުހަބާ ރައީސް ޔާމީން ޖަލްސާގައި ޕީއެންސީގެ ރައީސް އަބްދުއްރަހީމް އަބްދުﷲ ވާހަކަދައްކަވަނީ،
ކުރީގެ ރައީސް އަބްދުﷲ ޔާމީން ރާއްޖެއިން ބޭރަށް ފުރުވާލުމަށް އެކި ސިފަސިފައިގައި މިސަރުކާރުން މަސައްކަތް ކުރި ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
މަރުހަބާ ރައީސް ޔާމީން ޖަލްސާގައި ވާހަކަ ދައްކަވަމުން އަބްދުއްރަހީމް ވިދާޅުވީ ރައީސް ޔާމީން ރާއްޖެއިން ބޭރަށް ފުރުވާލުމަށް އެކި ސިފަސިފައިގައި މިސަރުކާރުން މަސައްކަތް ކުރި ކަމަށާއި، އެކަން އެންމެ ރަނގަޅަށް އެނގިވަޑައިގަންނަވާނީ މިއަދުގެ ހޯމް މިނިސްޓަރު އިމްރާން އަބްދުﷲ ކަމަށެވެ.
އެގޮތުން މިނިސްޓަރު އިމްރާން ޖަލަށް ވަޑައިގެން ރައީސް ޔާމީން ބޭނުންފުޅުވާ ގައުމަކަށް ބޭސްފަރުވާއަށް ވަޑައިގަތުމުގެ ފުރުސަތު އެބައޮތް ކަމަށް ވިދާޅުވެފައިވާ ކަމަށް އަބްދުއްރަހީމް ވިދާޅުވިއެވެ. އަދި ޖަވާބުގައި ދިވެހި ގައުމު ދޫކުރައްވައި، ވަޑައިގަންނަވާނެ އެހެންތަނެއް ނޯންނާނެ ކަމަށް ރައީސް ޔާމީން ވިދާޅުވެފައިވާ ކަމަށް އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ރައީސް ޔާމީން ގައުމުން ފިއްލަވަން މަސައްކަތް ނުކުރައްވާ ކަމަށާއި، ކުރިއަށް އޮތްތަނުގައި ވެސް އެފަދަ ކަމެއް ނުކުރައްވާނެ ކަމުގެ ޔަގީންކަން އެމަނިކުފާނު ދެއްވާފައިވާ ކަމަށެވެ.
މީގެ އިތުރުން އަބްދުއްރަހީމް ވިދާޅުވީ ރައީސް ޔާމީން ޖަލުގައި ހުންނެވިއިރު ގިނަ ދަތިތަކާއި ކުރިމަތިވެ، ބޮޑެތި ގޮންޖެހުންތަކާއި ކުރިމަތިލާން ޖެހުނު ކަމަށެވެ. ޕާޓީގެ ތެރޭގައި ބައިބައިވުން އުފައްދައި، ބަދަހި ލަޝްކަރު ރޫޅާލުމަށް ހަގީގަތާއި ހިލާފު ވާހަކަތައް ދައްކައި ފަތުރަމުން ގެންދިޔަ ކަމަށް އަބްދުއްރަހީމް ވިދާޅުވިއެވެ. ނަމަވެސް އެހުރިހާ ކަމެއް ނާކާމިޔާބު ވެގެންދިޔައީ ރައީސް ޔާމީންގެ ލަފާފުޅުގެ ދަށުން މަސައްކަތްތައް ކުރިއަށް ގެންދިއުމުން ކަމަށް އަބްދުއްރަހީމް ވިދާޅުވިއެވެ.
