އޯވަރޑްރޯ ކުރުމުގެ މުއްދަތު ތިންވަނަ ފަހަރަށް އިތުރު ކޮށްދީފި

ދައުލަތުގެ ޚަރަދަށް ޒިންމާ ވުމުގެ ގާނޫނުގައި ބަޔާން ކޮށްފައިވާ ހަމަތަކާއި އުސޫލުތަކުން އިސްތިސްނާ ވުމަށް ރައްޔިތުންގެ މަޖިީހުން ދީފައިވާ މުއްދަތު އިތުރުކުރުމާ ގުޅޭ މައްސަލަ ދިރާސާކޮށް މާލިއްޔަތު ކޮމިޓީން ނިންމި ގޮތުގެ ރިޕޯޓަށް، މާލިއްޔަތު ކޮމިޓީގެ މުގައްރިރު އަދި ކިނބިދޫ ދާއިރާގެ މެމްބަރު މުހައްމަދު ނާޝިޒު ހުށަހެޅި އިސްލާހާއެކު، އޯވަރޑްރޯ ކުރުމުގެ މުއްދަތު ތިންވަނަ ފަހަރަށް އިތުރު ކޮށްފިއެވެ.

މިއާއެކު ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ (ހ)އާއި، (ރ)އާއި، (ބ)ގައި ބަޔާންކޮށްފައިވާ ހަމަތަކާއި އުސޫލުތަކަށް އަމަލުކުރުން ފަސްކުރުމުގެ މުއްދަތު، 2023 ވަނަ އަހަރުގެ ޑިސެމްބަރު މަހުގެ 31 ވަނަ ދުވަހާ ހަމައަށް އިތުރުވެގެންދިޔައީއެވެ.

Advertisement

ކޮމިޓީ ރިޕޯޓަށް ވޯޓަށް އިސްލާހު ހުށަހެޅުއްވީ، މިކަމުގައި ވަކި ގޮތަކަށް އަމަލުކުރަން މަރުކަޒީ ބޭންކަށް އަންގައި، އެގޮތަށް ފާސް ނުކުރުވޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅު ވުމުންނެވެ. ރައީސް ނަޝީދު ވިދާޅުވީ، އިސްތިސްނާ ދިނުމަށް ނިންމުމަށްފަހު، އެކަން ހިންގާނެ ގޮތް ކަނޑައަޅާނީ، އެމްއެމްއާއި ފިނޭންސުން ކަމަށެވެ. އެހެންނަމަވެސް މިހާރު އޮތް ކޮމިޓީ ރިޕޯޓުގައި އެކަން ނިންމުމެއްގެ ގޮތުގައި ކަނޑައަޅާފައިވާ ކަމަށެވެ. އެހެންކަމުން އެއީ މަޖިލީހުން އަރުވާ ލަފައެއްގެ ގޮތުގައި ހިމަނަން ޖެހޭ ކަމަށެވެ.

މި އިސްލާހާއެކު ރިޕޯޓް ފާސްކުރީ 42 މެމްބަރުންގެ ވޯޓުންނެވެ. ނުފެންނަ ކަމަށް ވޯޓު ދެއްވީ 2 މެމްބަރުންނެވެ.

ނާޝިޒު އިސްލާހު ހުށަހެޅުއްވީ ކޮމިޓީ ރިޕޯޓުގެ ނިންމުމުގެ 5.2 އަަދި 5.3ށެވެ. އިސްލާހަށް ތާއީދު ކުރެއްވީ، ހުޅުދޫ ދާއިރާގެ މެމްބަރު އިލްޔާސް ލަބީބެވެ.

ނާޝިޒު ހުށަހެޅި އިސްލާހުގައި ބުނެފައިވަނީ 2021 ވަނަ އަހަރުގެ ޑިސެންބަރު މަހުގެ 31 ވަނަ ދުވަހުގެ ނިޔަލަށް، ޕަބްލިކް ބޭންކް އެކައުންޓް އޯވަރޑްރޯވެފައި ހުންނަ މިންވަރު ސެކިއުރިޓައިޒްކޮށް، މޯލްޑިވްސް މަނިޓަރީ އޮތޯރިޓީން ސަރުކާރަށް އިޝޫކޮށްފައިވާ 50 އަހަރުގެ އެމޯޓައިޒިންގ ބޮންޑަކަށް ބަދަލުކުރުމަށާއި، އަދި މި ބޮންޑުގެ ކޫޕަން ރޭޓަކީ އަހަރަކަށް 2.5 (ދޭއް ޕޮއިންޓް ފަހެއް) ޕަސަންޓް ކަމުގައި ކަނޑައެޅުމަށް ނިންމި ކަމަށް ބުނާ ބުނުން އެއީކޮމިޓީން ދޭ ލަފައެއްގެ ގޮތުގައި ބަދަލު ކުރުމަށެވެ.

އަދި 5.2ގައި، 2202 ވަނަ އަހަރުގެ ޖަނަވަރީ މަހުގެ 1 ވަނަ ދުވަހުން ފެށިގެން 2023 ވަނަ އަހަރުގެ ޑިސެމްބަރު މަހުގެ 31ވަނަ ދުވަހާއި ހަމައަށް، ޕަބްލިކް ބޭންކް އޯވަރޑްރޯ ކުރެވޭނެ އެންމެ މަތީ ލިމިޓަކީ 2.5 (ދޭއް ޕޮއިންޓް ފަހެއް) ބިލިއަން ރުފިޔާ ކަމުގައި ކަނޑައެޅި ކަމަށް ބުނާ ބުނުގެ ބަދަލުގައި، އެއީ ކޮމިޓީން އަރުވާ ލަފައެއް ކަމަށާއި، 2022 ވަނަ އަހަރުގެ ޖަނަވަރީ މަހުގެ 1 ވަނަ ދުވަހުން ފެށިގެން ޕަބްލިކް ބޭންކް އެކައުންޓް އޯވަރޑްރޯވެފައި ހުންނަ ކޮންމެ ދުވަހަކު، އޯވަރޑްރޯވެފައިވާ ބެލަންސުން އަހަރަކަށް 0.1 (ސުމެއް ޕޮއިންޓް އެކެއް) ޕަސަންޓްގެ ރޭޓުން މޯލްޑިވްސް މަނިޓަރީ އޮތޯރިޓީން އިންޓްރެސްޓް ޗާޖުކުރާގޮތަށް ހަމަޖެއްސުމަށް ކޮމިޓީން ނިންމާފައިވާ ކަމަށް ބުނާ ބުނުންވެސް އެއީ ކޮމިޓީގެ ލަފައެއްގެ ގޮތުގައި ބަދަލު ކުރުމަށެވެ.