އެކަނި ނިންމާ ނިންމުމެއް ނަމަ ހިޔާ ފްލެޓްތައް ތަޅާލީމުސް - އަސްލަމް
ޖެހި ޖެހިގެން 25 ބުރީގެ ހަތް ހާސް ފްލެޓް އަޅަން ކޮށްފައި އޮތް ޕްލޭނަކީ ގޯސް ޕްލޭނެއް
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ - މުހައްމަދު އަސްލަމް
އެކަނި ނިންމާ ނިންމުމެއް ނަމަ, ހިޔާ ފްލެޓްތައް ތަޅާލައި، އަލުން އާ ތަންތަން ހެދުމަށް މަސައްކަތް ފެއްޓެވީސް ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގައި، ހިޔާ ފްލެޓްގައި އިޖުތިމާއީ މައްސަލަތައް ނުކުންނަމުންދާ ކަމަށް ވިދާޅުވެ މިނިސްޓަރަށް އަމާޒުކުރެއްވި ސުވާލަށް ޖަވާބު ދެއްވަމުން މިނިސްޓަރ އަސްލަމް ވިދާޅުވީ، ކުޑަ ތަންކޮޅެއްގައި ޖެހިޖެހިގެން 25 ބުރީގެ 7000 ފްލެޓް އަޅަން ކޮށްފައި އޮތް ޕްލޭނަކީ ގޯސް ޕްލޭނެއް ކަމަށެވެ. އައްޑޫ ސިޓީގެ އާބާދީއަށްވުރެ ބޮޑު އާބާދީއެއް، ކުޑަ ތަނަކަށް ޖަމާކުރުން އެއީ ގޯސް ނިންމުމެއް ކަމަށާއި، މި ސަރުކާރަށް އައިއިރު އެތަނުގެ މަަސައްކަތް އޮތީ ނުހުއްޓޭ ހިސާބުގައި ކަމަށެވެ. އެމަނިކުފާނު އެތަން ތަޅާލުމަށް ނިންމެވި ކަމަށާއި، އެކަނި ނިންމަވާ ނިންމެވުމެއް ނަަމަ ތަޅާލެއްވީސް ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ، މިވެރިކަމުގައި އެތަން ބެލުމަށްފަހު އެހާ ބޮޑު އާބާދީއަކަށް އެކަށީގެންވާ ތަނެއް ނޫން ކަމަށް ތަކުރާރުކޮށް ވިދާޅުވި ކަމަށެވެ. ސަރުކާރުން ތަކުރާރުކޮށް އެހެން ބުނި ނަމަވެސް އެތަން ހަވާލު ނުކުރުމުގެ ޝަކުވާއާއެކު ސަރުކާރުން އެތަން ހަވާލުކުރަން ނިންމައި، މިހާރު އެހެރީ ހަވާލު ކޮށްފައި ކަމަށެވެ. މިހާރު އެތަނުން އެ ފެންނަނީ ކުޑަ ތަންކޮޅަކަށް މީހުން އެއް ކުރުމުގެ ނަތީޖާ ކަމަށެވެ. ގޯސް ނިންމުމަކަށް ބިނާވެފައި އޮތް ކަމެއް ކަަމަށާއި، އެތަނުގައި ދެން އޮތީ އެތަން ބެލެހެއްޓުން ކަމަށެވެ. އެއީ މި ސަރުކާރުން ވިޔަސް އަދި އަންނަ ސަރުކާރަކުން ވިޔަސް ކުރަން ޖެހޭ ކަމެއް ކަމަށެވެ. ކުށްތަކަށް ފުލުހުން ފިޔަވަޅު އެޅުން ނޫން ގޮތެއް ނެތް ކަމަށެވެ.
އެއް ކޮޓަރީގެ ފްލެޓް ފެނިއްޖެތޯ ޝިޔާމް ކުރެއްވި ސުވާލަށް ޖަވާބު ދެއްވަމުން އަސްލަމް ވިދާޅުވީ، އެއް ކޮޓަރީގެ ފްލެޓް އެމަނިކުފާނަށް ފެނިވަޑައިގަންނަވާ ކަމަށާއި، އެހެންނަމަވެސް އެއް ކޮޓަރީގެ ފްލެޓް އެޅުމަކީ މި ސަރުކާރުގެ ސިޔާސަތެއް ނޫން ކަމަށެވެ. ދިވެހިންނަކީ އުމުރު ދުވަހަށް ބޯހިޔާވަހިކަން ހޯދާ ބައެއް ކަމަށާއި، ގެދޮރުވެރި ވުމަށް އެއްކޮޓަރިއަކީ ހައްލެއް ކަމަށް ދިވެހިން ނުދެކޭ ކަމަށެވެ. އަދި މެމްބަަރަށް އެނގިވަޑައިގަންނަވާ ކަންތަކުގައި އިތުރު ސުވާލުކުރައްވަނީ ވަކި މަންޒަރެއް ދެއްކުމަށް ކަމަށް މިނިސްޓަރ އަސްލަމް ވިދާޅުވިއެވެ.
