ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން ސްޓުޓްގާޓް ބަލިކޮށް ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން ބަޔާން މިއުނިކާ ޕޮއިންޓަކާ ގާތަށް ބޮރޫޝިއާ ޑޯޓްމުންޑް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޑޯޓްމުންޑް މޮޅުވީ ސްޓުޓްގާޓް އަތުން 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، ދެވަނަ ހާފުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ޑޯޓްމުންޑުންނެވެ. މި ހާފު ފަށައިގެން 11 ވަނަ މިނެޓުގައި އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޑަނިއެލް މާލެންއެވެ. އޭނާ މި ލަނޑު ޖަހާފައިވަނީ ރަފައެލް ގުއެރެއިރޯ ދިން ޕާހަކުންނެވެ.

މި މެޗުގައި ސްޓުޓްގާޓުން ނަތީޖާ އެއްވަރުކޮށްފައިވަނީ މެޗުގެ 63 ވަނަ މިނެޓުގައެވެ. އޭރިއާ ތެރެއަށް ވަދެ ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ރޮބާޓޯ މަސިމޯއެވެ. އެކަމަކު މެޗު ނިމެން ފަސް މިނެޓަށް ވެފައި ވަނިކޮށް އޭރިއާ ތެރެއިން ލިބުނު ބޯޅައަކުން ކެޕްޓަން މާކޯ ރޮއިސް ވަނީ ލަނޑެއް ޖަހައި، ޑޯޓްމުންޑް މި މެޗުން މޮޅުކޮށްދީފައެވެ.

މި މޮޅާއެކު ޑޯޓްމުންޑުން ބަޔާނާ ޕޮއިންޓަކާ ގާތަށް ޖެހިލިއިރު، ތާވަލުގެ އެއްވަނައިގައި ބަޔާން އޮތީ ކުޅުނު 12 މެޗުން ލިބުނު 28 ޕޮއިންޓާއެކުއެވެ. ދެވަނައިގައި ޑޯޓްމުންޑަށް 12 މެޗުން ވަނީ 27 ޕޮއިންޓް ލިބިފައެވެ. އަދި ޑޯޓްމުންޑް އަތުން ބަލިވި ސްޓުޓްގާޓް އޮތީ ތާވަލުގެ ފުލުން ތިންވަނައިގައި 12 މެޗުން 10 ޕޮއިންޓާއެކުއެވެ.