ރައީސުލްޖުމްހޫރިއްޔާ، އައްޑޫ ސިޓީ ކައުންސިލާއި ބައްދަލުކުރައްވައިފި
18 ނޮވެމްބަރު 2021 | ބުރާސްފަތި 21:50ކައުންސިލަށް ގާނޫނީ ގޮތުން ބާރު ލިބިފައި ވިއަސް އެކަމުގައި ދިމާވާ ގޮންޖެހުންތައް ހައްލުކުރުމަށް މަސައްކަތްކުރަން ޖެހިފައިވޭ
ރައީސުލްޖުމްހޫރިއްޔާ، އައްޑޫ ސިޓީ ކައުންސިލާއި ބައްދަލުކުރެއްވުން
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، އައްޑޫ ސިޓީ ކައުންސިލާއި ބައްދަލުކުރައްވައި، ކައުންސިލަރުންގެ ކަންބޮޑުވުންތައް އޮޅުންފިލުއްވައިފިއެވެ.
އާރަށުގައި ކުރިޔަށް ގެންދެވި މި ބައްދަލުކުރެއްވުމުގައި ކައުންސިލަރުން ވަނީ އައްޑޫ ސިޓީގެ ކުރިއެރުމަށްޓަކައި މިހާރަށް އެންމެ މުހިއްމު ކަންތައްތަކާ ބެހޭ މައުލޫމާތު ރައީސުލްޖުމްހޫރިއްޔާއަށް ދަންނަވާފައެވެ.
އެގޮތުން ކައުންސިލަރުން ފާހަގަކުރެއްވި ކަންކަމުގެ ތެރޭގައި ކައުންސިލަށް ގާނޫނީ ގޮތުން ބާރު ލިބިފައި ވިއަސް އެކަމުގައި ދިމާވާ ގޮންޖެހުންތައް ހައްލުކުރުމަށް މަސައްކަތްކުރަން ޖެހިފައިވުމާއި، މުނިސިޕަލް ޚިދުމަތްތައް ދިނުމުގައި ދިމާވާ ގޮންޖެހުންތަކާއި، ބޯހިޔާވަހިކަމުގެ މައްސަލައާއި އެކި ޚިދުމަތްތައް ދިނުމުގައި ހުރި ދަތިތަކުގެ އިތުރުން އައްޑޫ ސިޓީގައި ޓޫރިޒަމް ތަރައްގީ ކުރުމަށް ހުރި ގޮންޖެހުންތަކާއި ސިއްހީ ދާއިރާ އިތުރަށް ހަރުދަނާ ކުރުމަށް ކުރެވެން ހުރި ކަންތައްތަކުގެ އިތުރުން އުމްރާނީ ތަރައްގީއަށް ބޭނުންވާ ކަންކަން ހިމެނެއެވެ.
މި ބައްދަލުކުރެއްވުމުގައި ކެބިނެޓުގެ ބައެއް ވަޒީރުން ވަނީ ކައުންސިލަރުން ފާހަގަކުރެއްވި މަޝްރޫއުތަކާބެހޭ މައުލޫމާތު އޮޅުންފިލުވައިދެއްވައި، މަޝްރޫއުތައް ކުރިއަށް ގެންދެވުމުގައި ސަރުކާރުން ގެންގުޅުއްވާ ވިސްނުން ސާފުކޮށްދެއްވާފައެވެ.
މި ބައްދަލުވުމުގައި ރައީސުލްޖުމްހޫރިއްޔާ ވަނީ ކައުންސިލަރުން ފާހަގަކުރެއްވި ކަންކަމުގައި ސަރުކާރުގެ އިދާރާތަކާއި ސަރުކާރު ހިއްސާވާ ކުންފުނިތައް މެދުވެރިކޮށް އެދެވޭ ހައްލެއް ހޯއްދަވަން މަސައްކަތް ކޮށްދެއްވާނެކަމުގައި ވިދާޅުވެފައެވެ. މި ބައްދަލުކުރެއްވުމުގައި އައްޑޫ ސިޓީއަށް ނިސްބަތްވާ މަޖިލީސް މެންބަރުންނާއި ބައެއް ވަޒީރުންވެސް ބައިވެރިވެވަޑައިގެންނެވިއެވެ.
