ކޮޅިގަނޑެއްގައި ޖެހި ނޮޅިވަރަމުގެ ޑިންގީއެއް ބަންޑުން ޖަހާލައިފި
12 ނޮވެމްބަރު 2021 | ހުކުރު 14:36ބަންޑުންޖަހާލި ޑިންގީގައި ތިބީ ،ކުޑަ ދެކުދިންނާއި ދެ ފިރިހެނުން
ހދ.ނޮޅިވަރަމުން މިއަދު މަހަށް ނިކުތް ޑިންގީ ބަންޑުން ޖަހާލާފައި
މަހަށް ނުކުމެ އުޅުނު ހދ. ނޮޅިވަރަމުގެ ޑިންގީއެއް ބަންޑުން ޖަހާލައިގެން އެމްއެންޑީއެފުން އެހީތެރކަން ފޯރުކޮށްދީފިއެވެ. ޑިންގީ ބަންޑުން ޖަހާލަން މެދުވެރިވީ އައި ވިލާގަނޑެއްގައި ޖެހި، ޑިންގީއަށް ރާޅެއް އަރައިގެންނެވެ.
މި ހާދިސާއާއި ގުޅިގެން އެމްއެންޑީއެފުން ވިދާޅުވީ ބަނޑުން ޖަހާލާފައި ވަނީ ނޮޅިވަރަމާއި، ނޮޅިވަރަންފަރާއި ދޭތެރެއަށް މަހަށް ނުކުމެ އުޅުނު ޑިންގީއެއް ކަމަށެވެ. މި ހާދިސާގެ ހިނގައިގެން އުޅޭކަން އެމްއެންޑީއެފް ނޮދަން އޭރިއާއަށް އެނގިފައިވަނީ ނޮދަން އޭރިއާ ކުޅުދުއްފުށީގައި އޮންނަ އެމްއެންޑީއެފްގެ ހާބަރ ކްރާފްޓް ލޯންޗް ގަޑި ހަމަކުރުމަށް ދުއްވަން ނުކުމެ އުޅެނިކޮށް މިއަދުގެ 15:40 ހާއިރު ކަމަށް އެމްއެންޑީއެފުން ވިދާޅުވެއެވެ.
ނޮދަން އޭރިއާގެ ލޯންޗަށް މިހާދިސާ ފެނިފައި ވަނީ ނޮޅިވަރަމާއި ނޮޅިވަރަންފަރާއި ދޭތެރޭ ޑިންގީއެއް ބަންޑުންޖަހާލައިގެން ކަނޑުވެފައި ތިބި މީހުން އެސަރަހައްދުން ދަތުރުކުރި މެރީނާ ނަމަކަށް ކިޔާ ދޯންޏަކަށް ނަގައިގެން އުޅެނިކޮށް ކަމަށް އެމްއެންޑީއެފުން ވިދާޅުވިއެވެ.
މިހާދިސާ ހިނގިއިރު ޑިންގީގައި ތިބީ ދެ ފިރިހެނުންނާއި ކުޑަ ދެ ކުދިންނެވެ. މިހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ. އެމްއެންޑީއެފް ނޮދަން އޭރިއާގެ ސިފައިން ވަނީ ބަންޑުން ޖަހާލި ޑިންގީގައި ތިބި ކުޑަކުދިން ނޮޅިވަރަމަށް ގެންގޮސްދީފައެވެ. އަދި އެނބުރި ޑިންގީ އޮތް ސަރަހަށްދަށް ގޮސް ޑިންގީ ވަނީ ފުށުން ޖަހާފައެވެ. އެމްއެންޑީއެފްގެ އެހީތެރކަމާއެކު ޑިންގީ މިހާރު ވަނީ ނޮޅިވަރަމަށް ގެންގޮސްދީފައެވެ.
ކުރިއަށް އޮތް 3 ދުވަހު ރާއްޖެ ސަރަހައްދުގައި ވައިގަދަވުމާއެކު ކަނޑުތައް ގަދަވާނެ ކަމަށް މޫސުމާއި ބެހޭ ގައުމީ އިދާރާއިން ލަފާކޮށްފައިވާތީ ކަނޑުދަތުރުކުރާ ފަރާތްތަކުން މޫސުމަށް ސަމާލުކަން ދެއްވުމަށް ކަމާބެހޭ ފަރާތްތަކުންވަނީ އިލްތިމާސްކޮށްފަ އެވެ.
ކަނޑުދަތުރުކުރާ އުޅަނދުފަހަރުގެ އޮޑިވެރިންނާއި، ކެޕްޓަނުން މޫސުމާބެހޭ އެންމެ ފަހުގެ މަޢުލޫމާތު ހޯއްދެވުމަށްފަހު ދަތުރުތައް ރޭވުމަށާއި ދަތުރުކުރާ ފަރާތްތަކުން ދަތުރަށް ފުރުމުގެ ކުރިން އަންގަންޖެހޭ ފަރާތްތަކަށް އެންގުމާއި އަދި އުޅަނދުގައި ލައިފްޖެކެޓާއި މުޢާސަލާތީ ނިޒާމާއި ދިޔަހިއްކާ ޕަންޕު ފަދަ ތަކެތި ހުރީ ރަނގަޅަށްތޯ ޗެކް ކުރުމާއި، ޚާއްސަކޮށް ކުދި އަދި ސަލާމަތީގޮތުން ރައްކާތެރިކަން ކުޑަ އުޅަނދުފަހަރުގައި ރޭގަނޑު، އަދި ވިއްސާރައިރު ދަތުރު ނުކުރުމަށް ވަނީ އިލްތިމާސް ކޮށްފަ އެވެ.
