އަންނަ އަހަރަށް ލަފާކޮށް ރައްޔިތުންގެ މަޖިލީހަށް ކަނޑައަޅާފައިވާ ބަޖެޓަށް 7 މިލިއަން ރުފިޔާ އިތުރުކުރަން ބަޖެޓު ކޮމިޓީއަށް ހުށަހަޅަން އާންމު ކޮމިޓީން ފާސްކޮށްފިއެވެ.
ބަޖެޓު ކޮމިޓީއަށް ހުށަހަޅަންޖެހޭ ރިޕޯޓާ ބެހޭގޮތުން މަޝްވަރާކުުރުމަށް ބޭއްވި އާންމު ކޮމިޓީގެ ބައްދަލުވުމުގައި، އެ ކޮމިޓީގެ ނާއިބު މުގައްރިރު ތޮއްޑޫ ދާއިރާގެ މެންބަރު ހަސަން ޝިޔާން ވިދާޅުވީ ބަޖެޓުގައި ހިމަނަން މަޖިލީހުގެ ފަރާތުން ހުށަހެޅި އަދަދު ފިނޭންސް މިނިސްޓްރީން އެޕްރޫވްކުރި ނަމަވެސް ނިއު ޕޮލިސީ އިނިޝިއޭޓިވްގެ ދަށުން ހުށަހެޅި ހަތް މިލިއަން ރުފިޔާ އަދި ހަމަޖެހިފައި ނުވާ ކަމަށެވެ.
އެކަމާ ބެހޭގޮތުން ކުރެންދޫ ދާއިރާގެ މެންބަރު އަބްދުލްޣަނީ އަބްދުލްހަކީމް ވިދާޅުވީ ނިއު ޕޮލިސީ އިނިޝިއޭޓިވްގައި ހިމެނޭ ކަންކަމަކީ ވަރަށް މުހިންމު ކަންކަން ކަމަށެވެ. އެގޮތުން މިވަގުތު މަޖިލީހުގެ އިމާރާތުގައި ލިފްޓުގެ ދަތިކަން ހުރުމާއި، ކޮމިޓީ ރޫމްތަކުގައި އިދާރީ ބޭނުމަށް ބޭނުންވާ ވަސީލަތްތައް ވެސް އެންމެ އެކަށީގެންވާވަރަށް ނެތްކަން ވެސް ފާހަގަކުރެއްވިއެވެ. އަދި ކޮމިޓީ އާއި މަޖިލީހުގެ ޖަލްސާތައް އެކުއެކީގައި ހިނގަމުން އަންނައިރު ކޮމިޓީތަކުގައި ތިއްބަވާ މެންބަރުންނަށް ޖަލްސާތަކުގައި ހިނގާ ކަންކަން އެނގޭނެ ގޮތެއް ނެތުމުން ޖަލްސާގައި ބައިވެރިވުމުގެ ފުރުސަތު ހަނިކަމުގައި ވިދާޅުވިއެވެ.
ނިއު ޕޮލިސީ އިނިޝިއޭޓިވްގެ ދަށުން ހުށަހެޅި އަދަދަކީ އެކަންކަން ހައްލުކުރުމަށް ހުށަހެޅި ބަޖެޓެއްކަމަށާއި، އެ އަދަދު މަޖިލީހުގެ ބަޖެޓައް އިތުރުކޮށްދެއްވުމަށް ހުށަހެޅުއްވިއެވެ. އެ ހުށަހެޅުއްވުމަށް ތާއީދު ލިބުމުން ކޮމިޓީގެ އަޣުލަބިއްޔަތުންވަނީ އެ ހުށަހެޅުން ފާސްކޮށްފައެވެ.
ރައްޔިތުންގެ މަޖިލީހަށް އަންނަ އަހަރުގެ ބަޖެޓުގެ ގޮތުގައި ކަނޑައެޅީ 191 މިލިއަން ރުފިޔާއެވެ.
