ގަރާޖެއް ނެތި ހަތަރު ފުރޮޅުލީ އެއްގަމު އުޅަނދު ރަޖިސްޓްރީ ކޮށްދޭ ގޮތަށް ހުށަހެޅި އިސްލާހު ފާސްނުކުރަން ކޮމިޓީން ނިންމައިފިއެވެ.
ގަރާޖެއް ނެތި ހަތަރު ފުރޮޅުލީ އުޅަނދު ރަޖިސްޓްރީ ކުރެވޭ ގޮތަށް އެއްގަމު ދަތުރުފަތުރުގެ ގާނޫނަށް މި އިސްލާހު ހުށަހެޅުއްވީ ނޮޅިވަރަމު ދާއިރާގެ މެންބަރު މުޙައްމަދު ނަޝީދެވެ. އެ އިސްލާހު ފާސް ނުކުރަން ނިންމައި، މިހާރު ޕާކްކުރުމަށް ރައްޔިތުންނަށް ދިމާވާ ދަތިތަކާއި ގޮންޖެހުންތައް ހައްލުކޮށްދިނުމަށާއި، އެކަމުގައި ހުރި މާލީ އުދަގޫތައް ފިލުވައިދިނުމަށް ދައުލަތުގެ ކަމާ ގުޅޭ މުއައްސަސާތަކުން އިންތިޒާމުތަކެއް ހަމަޖައްސަން ކޮމިޓީން ވަނީ ފާސްކޮށްފައެވެ. މި ނިންމުތަކާއެކު މިހާރު ވަނީ ކޮމިޓީ ރިޕޯޓް އެކުލަވާލާފައެވެ.
ގާނޫނަށް ހުށަހެޅިފައިވާ އިސްލާހުގައި ބުނެފައިވަނީ، އިންޖީނުލީ އެއްގަމު އުޅަނދު ރަޖިސްޓްރީ ކުރަން ހުށަހަޅާއިރު ގަރާޖެއްގައި އެ އުޅަނދު ބާއްވާނެ ކަމުގެ ލިޔުން ހުށަހެޅުން ލާޒިމެއް ނޫން ކަމަށެވެ.
މި އިސްލާހާ ގުޅޭ ގޮތުން މާލެ ސިޓީ ކައުންސިލްގެ ޚިޔާލު ވެސް ކޮމިޓީން ވަނީ ހޯދާފައެވެ. ކޮމިޓީއަށް ވަޑައިގެން މާލެ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވެފައިވަނީ، ގަރާޖު ހުންނަން ޖެހޭ ކަމަށް އޮންނަ މާއްދާ އުވާލައިފިނަމަ, އެއްވެސް ކޮންޓްރޯލެއް ނެތި ވެހިކަލްތައް މާލޭގައި އިތުރުވެގެންދާނެ ކަމަށެވެ. މުޢިއްޒު ވިދާޅުވީ، ވެހިކަލެއް ގެނެސް އެ ބާއްވާނެތަން ނެތި ދޫކޮށްލައިފިނަމަ އިތުރަށް މާލެ ތޮއްޖެހެން މަގުފަހިވާނެ ކަމަށެވެ. އޭގެ ނަތީޖާ ވަރަށް ގޯސްވާނެ ކަމަށް މުޢިއްޒު ވިދާޅުވިއެވެ.
މިހާރުވެސް ނައްތާލަން ޖެހޭ ވެހިކަލްތައް ވެސް މާލެތެރޭގައި އެކި ތަންތަނުގައި ޕާކްކޮށްފައި ހުރިކަން މުޢިއްޒު ފާހަގަކުރެއްވިއެވެ.
ގަރާޖު ހުއްދަ ދިނުމާއި ގަރާޖުގެ ފެންވަރު ކަނޑައެޅުމަށް މާލެ ސިޓީ ކައުންސިލަށް މިހާރު ޓްރާންސްޕޯޓް އޮތޯރިޓީން ވަނީ ހަވާލުކޮށްފައެވެ.
މާލެއަށް އެތެރެކުރެވޭ ވެހިކަލްގެ އަދަދު ކަނޑައެޅުމަށް މަސައްކަތްތަކެއް ކުރެވިފައިވާ ކަމަށާއި، ޓްރާންސްޕޯޓުން އެ މައުލޫމާތު މިހާރު ކައުންސިލާ ހިއްސާ ކޮށްފައިވާ ކަމަށާއި, އެހެންކަމުން ވެހިކަލްތައް އެތެރެ ކުރެވޭނެ އަދަދު ކަނޑައެޅުމުގެ މަސައްކަތް ކައުންސިލުން މިހާރު ކުރަމުން އަންނަ ކަމަށް ކޮމިޓީގައި މުއިއްޒު ވިދާޅުވިއެވެ.
މާލެ ސިޓީގައި ވެހިކަލްތައް ޕާކް ކުރާނެ ޖާގަ އިތުރުކޮށް, ޕާކިންގ ސްލޮޓް ދިނުމަށް ކައުންސިލުން މިހާރުވެސް މަސައްކަތް ކުރަމުން އަންނަ ކަމަށް މުޢިއްޒު ވިދާޅުވިއެވެ.
މިހާރުވެސް މާލެ ސިޓީގައި ގަރާޖެއް ނުލިބި, ރަޖިސްޓްރީ ނުކުރެވި 400އާ ގާތްކުރާ އަދަދަކަށް ވެހިކަލް އެބަހުރި ކަމަށާއި، މިފަދަ އިސްލާހެއް ގެނެސްފިނަމަ އެއްވެސް ކޮންޓްރޯލެއް ނޯންނާނެ ކަމަށް ކޮމިޓީއަށް ވަޑައިގެން ޑެޕިއުޓީ މޭޔަރ އަހުމަދު ނަރީޝް ވަނީ ވިދާޅުވެފައެވެ.
ކޮމިޓީން މީގެކުރިން ވަނީ އެ އިސްލާހު ފާސްކުރަން ފެންނަ ކަމަށް ނިންމާފައެވެ. އެކަމަކު މަޖިލީހުގެ ނާއިބުރައީސް އީވާ އަބްދުﷲ ހިމެނޭ ގޮތަށް އެމްޑީޕީގެ ބައެއް މެންބަރުން އެ އިސްލާހަށް ދެކޮޅު ހެއްދެވުމުން އިސްލާހު އަލުން ދިރާސާކުރުމަށް ކޮމިޓީއަށް ފޮނުވީ މިދިޔަ އޭޕްރީލް 29 ވަނަ ދުވަހުއެވެ.
