ގަރާޖު ސިޓީ އުވާލާ އިސްލާހަށް، މާލެ ސިޓީ ކައުންސިލުން ދެކޮޅު
އެއްގަމު ދަތުރުފަތުރުގެ ގާނޫނަށް މި އިސްލާހު ހުށަހެޅުއްވީ ނޮޅިވަރަމު ދާއިރާގެ މެންބަރު މުޙައްމަދު ނަޝީދު
މާލެ ސިޓީ ކައުންސިލުން ތަރައްގީކޮށްފައިވާ ޕާކިންގ ޒޯނެއް
ގަރާޖު ހުންނަން ޖެހޭ ކަމަށް އޮންނަ މާއްދާ އުވާލައިފިނަމަ, އެއްވެސް ކޮންޓްރޯލެއް ނެތި ވެހިކަލްތައް މާލޭގައި އިތުރުވެގެންދާނެ ކަމަށް މާލެ ސިޓީ ކައުންސިލްގެ މޭޔަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.
މޭޔަރ މިހެން ވިދާޅުވީ، ގައުމީ ތަރައްގީއާއި ތަރިކައިގެ ކޮމިޓީގައި, އެއްގަމު ދަތުރުފަތުރުގެ ގާނޫނަށް ހުށަހެޅިފައިވާ އިސްލާހާ ގުޅޭގޮތުން މާލެ ސިޓީ ކައުންސިލްގެ ޚިޔާލު ހޯދުމަށް ހޯމަ ދުވަހު ބޭއްވި ކޮމިޓީ ބައްދަލުވުމުގައެވެ. ގާނޫނަށް ހުށަހެޅިފައިވާ އިސްލާހުގައި ބުނެފައިވަނީ، އިންޖީނުލީ އެއްގަމު އުޅަނދު ރަޖިސްޓްރީ ކުރަން ހުށައަޅާއިރު ގަރާޖެއްގައި އެ އުޅަނދު ބާއްވާނެ ކަމުގެ ލިޔުން ހުށައެޅުން ލާޒިމު ނޫން ކަމަށެވެ.
އެއްގަމު ދަތުރުފަތުރުގެ ގާނޫނަށް މި އިސްލާހު ހުށަހެޅުއްވީ ނޮޅިވަރަމު ދާއިރާގެ މެންބަރު މުޙައްމަދު ނަޝީދެވެ.
ކޮމިޓީގައި ވާހަކަދައްކަވަމުން މުޢިއްޒު ވިދާޅުވީ، ވެހިކަލެއް ގެނެސް އެ ބާއްވާނެތަން ނެތި ދޫކޮށްލައިފިނަމަ އިތުރަށް މާލެ ތޮއްޖެހެން މަގުފަހިވާނެ ކަމަށެވެ. އޭގެ ނަތީޖާ ވަރަށް ގޯސްވާނެ ކަމަށް މުޢިއްޒު ވިދާޅުވިއެވެ. ގަރާޖު ސިޓީ މިހާރުވެސް ހޯދަނީ ރަޖިސްޓްރީ ކުރަން ކޮންމެހެން ހޯދަން ބޭނުންވާ ލިޔުމަކަށްވާތީ ކަމަށާއި، ގަރާޖު އެހެން ތަންތަނަށް ބަދަލު ކުރުމުގެ ފުރުސަތު އޮންނަ ކަމަށް މޭޔަރު ވިދާޅުވިއެވެ. މިހެން މިކަން އޮންނައިރު ގަރާޖު ސިޓީ ބޭނުން ނުވާގޮތަށް ކަނޑައެޅިއްޖެނަމަ އެއްވެސް ކޮންޓްރޯލެއް ނެތި ވެހިކަލްތައް އިތުރުވަމުންދާނެ ކަމަށް މުޢިއްޒު ވިދާޅުވިއެވެ.
މިހާރުވެސް ނައްތާލަން ޖެހޭ ވެހިކަލްތައްވެސް މާލެތެރޭގައި އެކި ތަންތަނުގައި ޕާކްކޮށްފައި ހުރިކަން މުޢިއްޒު ފާހަގަކުރެއްވިއެވެ.
ގަރާޖު ހުއްދަ ދިނުމާއި ގަރާޖުގެ ފެންވަރު ކަނޑައެޅުމަށް މާލެ ސިޓީ ކައުންސިލަށް މިހާރު ޓްރާންސްޕޯޓް އޮތޯރިޓީން ވަނީ ހަވާލުކޮށްފައެވެ.
މާލެއަށް އެތެރެކުރެވޭ ވެހިކަލްގެ އަދަދު ކަނޑައެޅުމަށް މަސައްކަތްތަކެއް ކުރެވިފައިވާ ކަމަށާއި، ޓްރާންސްޕޯޓުން އެ މައުލޫމާތު މިހާރު ކައުންސިލާ ހިއްސާ ކޮށްފައިވާ ކަމަށާއި, އެހެންކަމުން ވެހިކަލްތައް އެތެރެ ކުރެވޭނެ އަދަދު ކަނޑައެޅުމުގެ މަސައްކަތް ކައުންސިލުން މިހާރު ކުރަމުން އަންނަ ކަމަށް ވިދާޅުވިއެވެ.
މާލެ ސިޓީގައި ވެހިކަލްތައް ޕާކް ކުރާނެ ޖާގަ އިތުރުކޮށް, ޕާކިންގ ސްލޮޓް ދިނުމަށް ކައުންސިލުން މިހާރުވެސް މަސައްކަތް ކުރަމުން އަންނަ ކަމަށް މުޢިއްޒު ވިދާޅުވިއެވެ.
މިހާރުވެސް މާލެ ސިޓީގައި ގަރާޖެއް ނުލިބި, ރަޖިސްޓްރީ ނުކުރެވި 400އާ ގާތްކުރާ އަދަދަކަށް ވެހިކަލް އެބަހުރި ކަމަށާއި، މިފަދަ އިސްލާހެއް ގެނެސްފިނަމަ އެއްވެސް ކޮންޓްރޯލެއް ނޯންނާނެ ކަމަށް ކައުންސިލް މެމްބަރުން ފާހަގަކުރެއްވިއެވެ. މިހާރު ހުރި މައްސަލަތަކަށް ހައްލު ހޯދުމަށް ކައުންސިލުން މަސައްކަތް ކުރަމުންއަންނަ ކަމަށް ކައުންސިލުން ފާހަގަކުރިއެވެ.
