ބޯޓުދެލި ބޭނުން ކުރުން ހުއްޓާލުމަށް، ދުނިޔޭގެ 40 ގައުމަކުން އެއްބަސްވެފައިވާ ކަމަށް އިނގިރޭސިވިލާތުން ހާމަކޮށްފިއެވެ.
ބޯޓުދެލި އެންދުން ހުއްޓާލުމަށް އެއްބަސްވި ގައުމުތަކުގެ ތެރޭގައި، ދުނިޔޭގައި އެންމެ ގިނައިން ބޯޓުދެލި އަންދާ ގައުމުތަކުގެ ތެރޭގައި ހިމެނޭ ޕޮލޭންޑް، ވިއެޓްނާމް، ޗިލީ ހިމެނެއެވެ. އެހެންނަމަވެސް ދުނިޔޭގައި އެންމެ ބޮޑަށް ބޯޓުދެއްޔަށް ބަރޯސާ ވަމުންދާ ގައުމުތަކުގެ ތެރޭގައި ހިމެނޭ، ޗައިނާ އޮސްޓްރޭލިއާ، އިންޑިއާ، އަދި އެމެރިކާ މިކަމަށް އެއްބަސްނުވާކަމަށް ވަނީ ރިޕޯޓްކޮށްފައެވެ.
މި އެއްބަސްވުމުގައި ސޮއިކުރި ގައުމުތަކުން ވަނީ، ބޯޓުދެލި ބޭނުން ކޮށްގެން ހަކަތަ އުފައްދާ އައު އެއްވެސް މަޝްރޫއެއް ކުރިޔަށް ނުގެންދަން ނިންމާފައެވެ. އަދި 2030 ވަނަ އަހަރު އަންނަންވާއިރަށް މުއްސަނދި ގައުމުތަކަށް ބޯޓުދެލި ބޭނުން ކޮށްގެން އުފައްދާ ހަކަތަ ފޯރުކޮށްދިނުން ނިމުމަކަށް ގެނައުމާއި، ދުނިޔޭގެ ފަގީރު ގައުމުތަކަށް މިއުސޫލުން އުފައްދާ ހަކަތަ ފޯރުކޮށްދިނުން 2040ގައި ނިމުމަކަށް ގެނައުމަށް ވަނީ އެއްބަސްވެފައެވެ.
އަދި މި އެއްބަސްވުމުގައި ބައެއް ކުންފުނިތަކުންވެސް ސޮއިކޮށްފައިވާއިރު, ދުނިޔޭގެ ބޮޑެތި ބޭންކުތަކުންވަނީ ބޯޓުދެލި ބޭނުންކޮށްގެން ހިންގާ ޕްރޮޖެކްޓަތަކަށް ފައިސާ ޚަރަދު ނުކުރުމަށްވެސް ނިންމާފައެވެ.
