ކޮޕް26 އިން 1.5 ގެ ލަނޑުދަނޑިއަށް ވާސިލްވުމަށް ކުރެވެންހުރި ކަންކަން ބުނެދީ އެކަމަށް މަސައްކަތްކުރުމަށް ރައްޔިތުންނަށް ބާރުއަޅަން ޖެހޭ ކަމަށް އދ ގެ 76 ވަނަ އާންމު މަޖިލީހުގެ ރައީސް، އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ގްލާސްގޯގައި ބޭއްވި ކޮޕް-26 ކްލައިމެޓް ކޮންފަރެންސަށް ކުރެއްވި 4 ދުވަހުގެ ރަސްމީ ދަތުރުފުޅު ނިންމަވާލެއްވުމަށްފަހު އަބްދުﷲ ޝާހިދު މިހާރު ވަނީ އެނބުރި ނިއުޔޯކަށް ވަޑައިގެންފައެވެ. ޝާހިދު ވިދާޅުވީ ގްލަސްގޯއިން ފުރަނީ ނުހަނު ގިނަ އުއްމީދުތަކާއެކު ކަމަށެވެ. އަދި ކޮޕް26 އިން 1.5 ގެ ލަނޑުދަނޑިއަށް ވާސިލްވުމަށް ކުރެވެންހުރި ކަންކަން ބުނެދީ އެކަމަށް މަސައްކަތްކުރުމަށް ރައްޔިތުންނަށް ބާރުއަޅަން އެބަޖެހޭ ކަމަށާއި މިކަން ވީހާވެސް އަވަހަށް ކުރަންޖެހޭކަން ބުނެދީ އަދި މިކަމަށް ސާފު މަގެއް، ޓައިމްލައިނެއް އޮތްކަން ބުނެދޭން އެބަޖެހޭ ކަމަށެވެ. އެކަންކަން ހާސިލްވާކަމަށް ދެކިވަޑައިގަންނަވާ ކަމަށާއި ޑީފޮރެސްޓޭޝަން ނިމުމަކަށް ގެނައުމަށް އިއުލާނު ކުރުމާއި، މާލީ އެހީތެރިކަމާއި އެޑެޕްޓޭޝަންއާއި ނެޓް ޒީރޯ ޓާގެޓްފަދަ ކަންކަމަކީ މިކުރާ މަސައްކަތް ކުރިއަށް ދާކަމުގެ ހެކިތައް ކަމަށް ވެސް ޝާހިދު ވިދާޅުވިއެވެ.
ކޮޕް26 ރަސްމީކޮށް ހުޅުވުމުގެ ރަސްމިއްޔާތުގައި އަބްދުﷲ ޝާހިދު ތަގުރީރު ކުރައްވަމުން، މޫސުމަށް އަންނަ ބަދަލުތަކުގެ ސަބަބުން ކުރިމަތިވާ މައްސަލަތައް ހައްލުކުރުމުގެ ގާބިލުކަން އިންސާނިއްޔަތަށް ލިބިފައިވާކަން ފާހަގަކުރެއްވިއެވެ. ޝާހިދު ވަނީ މިދިޔަ އޮކްޓޯބަރު މަހުގެ 26 ވަނަ ދުވަހު ބޭއްވި ޖެނެރަލް އެސެމްބްލީ ހައި-ލެވެލް ޑައިލޮގް އޮން ޑެލިވަރިންގ ކްލައިމެޓް އެކްޝަންގެ ބައްދަލުވުމުގައި ކުރެވުނު މަޝްވަރާތަކާއި ދެކެވުނު ވާހަކަތައްވެސް ކޮޕް-26 ގެ ބައިވެރިންނާ ހިއްސާކުރައްވާފައެވެ. މި ބައްދަލުވުމުގައި މާލީ އެހީތެރިކަން ހޯދުމާއި، ޓެކްނޯލޮޖީ ބަދަލުކުރުމާއި، އެޑަޕްޓޭޝަނަށް އިތުބާރުހުރި ވަޞީލަތްތައް ހޯދުމަށް މެންބަރު ގައުމުތަކުން ގޮވާލެއްވިއެވެ.
ކޮޕް26 ގެ 2 ވަނަ ދުވަހު މިނިސްޓަރ ޝާހިދު ވަނީ ވޯލްޑް ލީޑަރސް ސަމިޓްގައި ދުނިޔޭގެ އެހެނިހެން ގައުމުތަކުގެ ވެރިންނާ ބައްދަލުކުރައްވާފައެވެ. ޝާހިދުވަނީ އެންޓީގުއާ އެންޑް ބާބިއުޑާ، ބަންގްލަދޭޝް، ބަލްގޭރިއާ، ބާބެޑޯސް، ބުރޫނާއީ، ކެނެޑާ، ކޮމޮރޯސް، މިސްރު، ފިޖީ، ގިނީ ބިސާ، އިންޑިއާ، ކުވައިތު، މަލާވީ، ދިވެހިރާއްޖެ، ނެމީބިއާ، ޕަލާއު، ސައޮ ޓޯމެ އެންޑް ޕްރިންސިޕޭ، ސީޝެލްސް، ސްރީލަންކާ، ޓެންޒޭނިއާ، ތައިލެންޑް، ޓްރިނިޑާޑް އެންޑް ޓޮބޭގޯ، ޓުވާލޫ، ޔޫ.އޭ.އީ އަދި ޔޫރަޕިއަން ކޮމިޝަންގެ އިސްވެރިންނާއި މިނިސްޓަރުންނާ ބައްދަލުކުރައްވާފައެވެ.
މީގެ އިތުރުން، ޝާހިދު ވަނީ މޫސުމީ ބަދަލުތަކާ ގުޅޭ ގޮތުން ޒުވާނުންނާއެކު ރައުންޑްޓޭބަލް ޑިސްކަޝަންއެއް ބާއްވަވާފައެވެ. އަދި ޝާހިދުވަނީ ޔޫ.އޭ.އީ އާއި ދިވެހިރާއްޖޭގެ ޒުވާނުންގެ މަންދޫބުންނާއި ބައްދަލުކުރައްވާފައެވެ. އަދި މޫސުމަށް އަންނަ ބަދަލުތަކާބެހޭ ބައިނަލްއަގްވާމީ ޕެނަލްގެ އަންހެން ސައިންޓިސްޓުންނާ ބައްދަލުކުރައްވާ މޫސުމީ ސައިންސާއި ސިޔާސަތުތައް ކަނޑާއެޅުމުގައި އަންހެނުންނާއި އަންހެން ކުދިންގެ ބައިވެރިވުން އިތުރުކުރުމަށް ހުރި ހުރަސްތަކާ ބެހޭގޮތުން މަޝްވަރާކުރައްވާފައެވެ.
