އަލީ ޚަލީލުވަނީ ބާޣީއެއްގެ އަތުން ރައިފަލެއް އަތުލައިގެންފައި
ސ. ހިތަދޫ ހިލާލީމަންޒިލް ޢަލީ ޚަލީލު
ފަހުގެ ތާރީޚެއްގައި ދިވެހިންގެ މިޖީލުގެ ގިނަ ބައެއްގެ ލޯކުރިމަތިން ފެނުނު 3 ނޮވެންބަރުގެ ބިރުވެރި ޢުދުވާނީ ޙަމަލާއަށް 33 އަހަރުވީއެވެ. ބޭރުގެ ނިރުބަވެރި ޕްލޮޓް ޖަމާޢަތާ ގުޅިގެން ޒާތީ ތަޢައްސުބުން ފުރިގެންވި ދިވެހި މަދު ޚާއިނުންތަކެއް ދިން އެ ޙަމަލާއިން ދިވެހި ޤައުމު ސަލާމަތްވީ ޤައުމަށް ވަފާތެރި ދިވެހި ދަރީންތަކެއްގެ ހިތްވަރުގަދަ ޖިހާދުން ކަމީ ދެބަސްވާނެ ހަގީގަތެއްނޫނެވެ.
ޤައުމު ބިރުވެރިކަމާއި ނާމާން ކަމުގެ މަތީގައިވަނިކޮށް ފަހަތަށް ނުޖެހި ފުރާނަ އަތަށްލައިގެން ނިކުތް މަދު މީހުންގެ ތެރޭ ސ. ހިތަދޫ ހިލާލީމަންޒިލް (ޑްރީމީވިލާ) ޢަލީ ޚަލީލު ހިމެނެއެވެ. މިހާރު އުމުރުން 74 އަހަރުވެފައިވާ ޚަލީލުގެ އެ ޚިދުމަތުގެ އަގު ވަޒަންކޮށް އޭނާއަށްވަނީ އެކަމުގެ ހަނދާނީ ފިލާ ސަރުކާރުން ދެއްވާފައެވެ. ޤައުމާއި ވަޠަނުގެ ހައްގުގައި އަލީ ޚަލީލު ވެވަޑައިގެންނެވި ޤުރްބާނީގެ އަގު އެފަދަ ޝީލްޑަކުން އަދާނުކުރެވޭހާ ބޮޑަށް އޭނާގެ ކުޅަދާނަކަން އެދުވަހު ދައްކައިދީފައިވެއެވެ. އޭނާވަނީ އެދުވަހުގެ ހިތި ތަޖުރިބާތައް ރާއްޖެއެމްވީއާ ޙިއްސާކުރައްވާފައެވެ. ކުރިއަށް ވަޑައިގަންނަވާށެވެ.
އެއީ ސ. ހިތަދޫއަށް އުފަން އެރަށު ޑްރީމީވިލާ، މިހާރުގެ ނަމުންނަމަ ހިލާލީ މަންޒިލް ޢަލީ ޚަލީލުއެވެ. ތަޢުލީމަށް ލޯބިކުރާ އާއިލާއަކުން އުފަންވި ޚަލީލު ބޮޑުވީ މުޅި ރަށަށް ވެސް ނަން މަޝްހޫރު ޤުރްއާންކިޔަވައިދޭ ހައްވާބީދައްތަގެ މައިވަންތަކަމުގެ ހިޔަލުން ފުރިހަމައަށް ހިޔާ ލިބިގެންނެވެ. މަސައްކަތާއި ހުނަރުން ފުރިފައިވި ބައްޕައެއްގެ އަޅާލުމާއި އޯގާތެރިކަމުގެ ތެރެއިން ހުނަރު ހޯދުމަށް އުފެދުނު ޝައުޤާ އެކު އޭނަގެ ޒުވާން ހަޔާތުގެ ކުރީކޮޅު އެއްކޮށް ހޭދަކުރީ ގަމުގެ "ރޯޔަލްއެއަރފޯސް"ގައެވެ. އެތަނުގައި މަސައްކަތް ކުރަން ލިބުނު ފުރުސަތަކީ އޭނާ ދެކޭގޮތުގައި އޭނާގެ ހުރިހާ ކާމިޔާބީއެއްގެ ފެށުމެވެ.
އާރްއޭއެފްގައި ހޭދަކުރި 18 ވަރަކަށް އަހަރުގެ ދިގު މުއްދަތުގެ ތެރޭ އޭނާވަނީ މިފަދަ އެތައް ކަމެއް ތަޖުރިބާ ކޮށްފައެވެ. އެދުވަސްވަރު ސިންގަޕޫރު ސިވިލްއޭވިއޭޝަނާއި ރާއްޖޭން ބޭރުގެ އެކި ހިސާބުތަކުން ތަފާތު ގިނަ ދާއިރާތަކުން ކިޔެވުމުގެ ފުރުސަތު ފަހިވެގެން ދިއުމާ ގުޅިގެން އޭނާވަނީ އިންޖިނިއަރުކަމާއި ޓެކްނިކަލް ދާއިރާގެ ގިނަ ހުނަރުތަކާއި، ފަޔަރ ފައިޓިންއާ ގުޅޭ ތަފާތު ތަމްރީންތައް ހޯއްދަވާފައެވެ.
އިނގިރޭސިންގެ ދައުރަށްފަހު މާލެ ބަދަލުވެ އަލީ ޚަލީލު ވަނީ މާލޭ އެއަރޕޯޓްގެ ޗީފް ފަޔަރ އޮފިސަރ ކަން ގިނަ ދުވަސްތަކެއް ވަންދެން ކުރައްވާފައެވެ. ޢުދުވާނީ ޙަމަލާ ދިވެހީންނާ ކުރިމަތިވިއިރު ޚަލީލަކީ ޓެކްނިކަލް 48 މުވައްޒަފުންނާއެކު މާލޭގައި ވެހިކަލް ގަރާޖެއް ހިންގަމުން، 365 ލޭބަރުންނާއެކު ކޮންސްޓްރަކްޝަން މަސައްކަތުގެ ދާއިރާގައި މަސައްކަތް ކުރެއްވި ފަރާތެކެވެ.
އާދައިގެ މަތިން ޚަލީލު އޭނާގެ ގަރާޖުގައި ނުނިމިހުރި ބައެއް މަސައްކަތްކުރުމައިގެން ފަތިސް ވަންދެން ހުއްޓާ ގެއިން ގުޅައި ބަޔަކު ބަޑިޖަހާވާހަކައާއި އަވަހަށް ގެއަށްއައުމަށް އެދުމުން އެއީ ނޮވެންބަރ 11 އަށް ފަރިތަކުރަނީކަމަށްބުނެ އޭނާމަޑުކޮށްލީއެވެ. އެހެންހުރެފައި 05.30 ވުމުން ގެއަށްދާން ދިޔަ މަގުމަތީ ގޭގޭގެ ކުޑަދޮރުތަކުން ހަނާއަޅައި އަވަހަށް އެތެރެވުމަށް ބުނަން ފެށުމުން ކަމެއް ގޯސްވެއްޖެކަން އޭނާއަށް އިޙުސާސް ކުރެވުނެވެ. ގެ ހުންނަނީ ރައްޔިތުންގެ މަޖްލިސްކުރާގެއާއި ކައިރި "ކަނދިލި ގޯޅީ"ގައި ކަމުން އެހިސާބަށް ދިޔަތަނުން ބަޑިޖަހާއަޑު އިވެންފެށިއެވެ.
އަލީ ޚަލީލަކީ މިނިސްޓަރ ހަމީދުގެ ކާރުކޮޅު ސާވިސްކޮށް ބަލަހައްޓަން ހަވާލުވެގެންހުރި މީހާއެވެ. އެހެންކަމުން އޭނާ އަވަސްވެގަތީ އެކާރުކޮޅުގައި ހުރި ޤައުމީ ދިދަ ލުއްސާލުމަށްފަހު ރައްޓެއްސަކާއެކު ޖުމްލަ 2 ކާރުގައި އެދިމާއަށް ދިއުމަށެވެ. ޚަލީލުއާއި އޭނާގެ އެކުވެރިޔާ ވަނީ ޙަމީދުގެ ޢާއިލާގެ ބޭފުޅުން ގެ އިތުރުން ޒާހިރު ޙުސެއިންއާއި އަދި ފަތުޙުﷲ ޖަމީލުއާއި އަދި އެ އާއިލާ ވެސް ރައްކާތެރި ހިސާބުތަކަށް ގެންދިއުމުގައި އެހީތެރިވެފައެވެ.
ވަގުތުގެ ބިރުވެރިކަމާއި ހާސްކަމުގެ ތެރޭގައި ވެސް "އަބުޝީ" ކަޑައިން ކާބޯތަކެތި އެބޭފުޅުންނަށް ފޯރުކޮށްދިނުމަށްފަހު ޤައުމުގެ އިސްސަފުގައި ތިއްބެވި އޭނާގެ ލޮބުވެތި ވެރިންގެ ޙިމާޔަތާއި ރައްކާތެރިކަން ކަށަވަރުވުމުން ޚަލީލު ދެން މިސްރާބުޖެހީ މަޖީދީ މަގާ ދިމާއަށެވެ. ވާނުވާ ބަލައިލުމުގެ ނިޔަތުގައެވެ. އޭނާއަށް ލިބިފައިހުރި ޢިލްމާއި ތަޖްރިބާގެ އަލީގައި ޤައުމު އެދިގޮވަމުންދިޔަފަދަ ކެރޭ ދަރިއެއްކަން ދައްކާލުމުގެ ޖޯޝާއިފޯރި އޭނާގެ ޙިއްސުތަކުގައި އުތުރި އަރަމުން ދިއުމާ ވެސް އެކުގައެވެ.
ސެންޓްރަލް ހޮސްޕިޓަލް ކައިރިން ޚަލީލަށް ވަނީ ސަގަރު ނާސިރުގެ ކޮއްކޮ އިސްމާޢީލު ދީދީއާ ދިމާވެފައެވެ. އެހިސާބުން ލަންކާގެ 3 މީހުންނާއެކު ނާސިރު ދަމުން ހަނާ އެޅުމުން އިސްމާއިލުއަށް ގޮވިކަމަށް ހީކޮށް ހުއްޓާ ނާސިރު، އޭނާއެއް ނޫނޭ ކަލޭ އަންނާށޭ ބުނުމުން ޚަލީލު ދިޔައެވެ. އޭނާ އެގެންދިޔައީ އެވަގުތު މަގުމަތީ ޕާކުކޮށްފައިއޮތް އޭނާގެ ބޮޑު 3 ލޮރީ އަތުލުމުގެ ނިޔަތުގައެވެ. އެކަމަށް އިންކާރު ކުރުމުން ނާސިރު ރައިފަލް ލޯޑުކޮށް ޚަލީލްގެ ބަނޑުގައި ޖައްސާލިއެވެ. އެވަރުން ވެސް ފަހަތަކަށް ނުޖެހެއެވެ. އޭނާހުރީ ސާބިތުކަންމަތީގައެވެ.
ޚަލީލު އެސަލާމަތްވީ ހަމަ ކިރިޔާއެވެ. އަދިހަމަ އެއާއެކު އެތައް ސަތޭކަ ދިވެހިން އަރުވައިގެން ފިލަން އެބާޣީން ރޭވި ރޭވުމުން ވެސް އެތައް ބަޔަކު ސަލާމަތްކުރެވުނީއެވެ.
ލިބުނު ހިތްހަމަ ޖެހުމާއެކު އަނެއްކާވެސް އޭނާ މިސްރާބުޖެހީ ދެންވާގޮތެއް ވެސް ބަލައިލާށެވެ. ކިތަންމެ ވަރުބަލިވެ ހައިހޫނު ކަމުގައި ހުއްޓަސް ގެއަށްވަދެ ރަޖާލައިގެން އޮންނާކަށް އޭނާގެ ޟަމީރު ގަބޫލެއް ނުކުރިއެވެ. އަނެއްކާވެސް ހިނގައިގަތީއެވެ. ޕޯސްޓަލް ބިލްޑިން ކައިރީ ހުރި މަޙްމޫދާ ސަލީމްމެންގެ މަތީބަޔަށް ގޮސް އަރައިފިއެވެ. އޭރު ބާޣީންގެ 2 މީހަކު އެތާ ހަރަކާތްތެރިވަމުން ދިޔައެވެ. އިރުކޮޅަކުން އޭގެތެރެއިން އެކަކު ހަނިގޯޅިއަށް ވަންތަން ފެނުމުން މިއިން މީހަކާ ދިމާކޮށްލަން މިއީ ރަނގަޅު ފުރުސަތެއް ކަމަށް އަލީއަށް ގަބޫލުކުރެވުނެވެ.
ޚަލީލަކީ ކުރިންވެސް ދެންނެވި ފަދައިން ގަމުގެ ރޯޔަލްއެއަރފޯސްގައިތިބި އިނގިރޭސީންކައިރީ މަސައްކަތް ކުރި މީހެއްކަމުން އޭނާއަށް އެމީހާ އަތުން ބަޑި އަތުލުމަކީ އެހާ އުނދަގޫ ކަމަކަށް ނުވިއެވެ. އެދިޔަގޮތަށްގޮސް ހޮސްޕިޓަލަށް ވަދެ ބަޑި ހަވާލުކުރީ އެތަނުގައި ހުރި ފޯކަލްޕޮއިންޓު ޅޮހީގެ ޒާހިރުއާއެވެ.
ކާމިޔާބު މަސައްކަތަކަށް ފަހުވެސް ޚަލީލުވަނީ ހުއްޓާނުލާ ބާޣީންގެ ކިބައިން ދިވެހި ޤައުމު ސަލާމަތް ކުރުމުގައި ފަރުދީ ޒިއްމާ ފުރިހަމައަށް އަދާކޮށްފައެވެ. އިންޑިއާ ސިފައިން އައުމަށްފަހު ވެސް ގޭގޭގެ ފުރާޅާއި އެނދު ތަންދޮށަށްދާންދެން ބަލައި ހޯދަން އުޅުނު ޓީމްތަކުގައި ހަމަޔަށް ނުކައި ނުބޮއެ ނުނިދާ 10 ރޭ 10 ދުވާލު އޭނާ ހޭދަކޮށްފައިވެއެވެ.
ޚަލީލު އެވަނީ ހަމަޔަގީނުން ވެސް މިދިވެހި ޤައުމަށްޓަކައި ޤުރްބާނީތަކެއް ވެފައެވެ. ދިވެހި ފަސްގަނޑު އެދި ގޮވަނީ އަލީ ޚަލީލުފަދަ ޤައުމަށް ވަފާތެރި ކެރޭ ދަރީން ތަކަކަށެވެ.
