ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް, ދިން ހަމަލާއާއި ގުޅިގެން މަޖިލީހުގެ މަސައްކަތްތައް މަޑުޖެހުމެއް އައި ކަމަށް މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.

އެމްޑީޕީގެ ގައުމީ މަޖިލީހުގެ ހަތަރު ވަނަ ދައުރުގެ ފުރަތަމަ ޖަލްސާގައި ބައިވެރިވެވަޑައިގެން މަޖިލީހުގެ މަސައްކަތްތައް ކުރިއަށްދިޔަގޮތުގެ ތަފްސީލް ހިއްސާކުރައްވަމުން އާޒިމް ވިދާޅުވީ, މިއަހަރުތެެރޭގައި މަޖިލީހުގެ މަސައްކަތްތަކަށް އެކި ގޮންޖެހުންތައް ދިމާވި ކަމަށެވެ. އެގޮތުން ކޮވިޑާ ގުޅިގެން ދިމާވި ދަތިތަކާއި، ރައްޔިތުންގެ މަޖިލީހުގެ ރައީސް ނަޝީދަށް އަމާޒުކޮށް, ދިން ހަމަލާއާއި ގުޅިގެން މަސައްކަތްތަކަށް މަޑުޖެހުމެއް އައި ކަމަށް އާޒިމް ވިދާޅުވިއެވެ.

މަޖިލީހުގެ ތިންވަނަ ދައުރު ނިމުމަކާ ގާތަށް އައިސްފައިވާއިރު، އެކި ގޮންޖެހުންތަކާއެކުވެސް މަޖިލީހުން ފުރިހަމަ މަސައްކަތްތަކެއް ކޮށްފައިވާކަން އާޒިމް ފާހަގަކުރެއްވިއެވެ. މިގޮތުން އެމްޑީޕީން ފުރަތަމަ ދައުރުގައި 4 ގަރާރެއް ހުށަހަޅާފައިވާކަމަށާއި، އަދި ފުރަތަމަ ދައުރުގައި އެންމެ ގިނަ ކަންކަން ހުށަހެޅީ މަޖިލީހުގެ ރިޔާސަތުންކަން އާޒިމް ފާހަގަކުރެއްވިއެވެ.

އެގޮތުން މަޖިލީހުގެ މަޖިލީހުގެ ފުރަތަމަ ދައުރުގައި މުހިންމު 2 ކަމެއް ނިންމުމުނުކަމަށް އާޒިމް ވިދާޅުވިއެވެ. އެއީ ދައުލަތުގެ ޚަރަދަށް ޒިންމާވުމާއި، ކޮމިއުނިކޭޝަން މިިނިސްޓަރުގެ އިތުބާރު ނެތްކަމުގެ މައްސަލަ ބަލައި މިނިސްޓަރު މަގާމުން ވަކިކުރެވުން ކަމަށް ވިދާޅުވިއެވެ. މި މަސައްކަތްތަކުގައި ކޮވިޑާ ގުޅިގެން ކުރިމަތިލާންޖެހުނު ދަތިތައް އޭނާ ވަނީ ފާހަގަކުރައްވާފައެވެ.

އެއަށްފަހު ދެވަނަ ދައުރުގެ މަސައްކަތްތައް ފަށައިގަނެގެން ކުރިއަށްދަނިކޮށް ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއަށްފަހު މަޖިލީހުގެ މަސައްކަތްތަކަށް މަޑުޖެހުމެއް އައި ކަމަށް އާޒިމް ވިދާޅުވިއެވެ. އެހެންނަމަވެސް އެ ދައުރުގައިވެސް މުހިންމު މަސައްކަތްތަކެއް ނިންމުނު ކަމަށާއި، އޭގެތެރޭގައި 2 ވަޒީރަކާ ސުވާލު ކުރެވި، ފަނޑިޔާރަކު މަގާމުން ވަކި ކުރެވުނު ކަމަށް އޭނާ ވިދާޅުވިއެވެ.

މިހާރު ކުރިއަށްދާ ތިންވަނަ ދައުރުގެ މިހާތަނަށް 34 ޖަލްސާއެއް ބާއްވާފައިވާއިރު، މި ދައުރުގައިވެސް ގިނަ މަސައްކަތްތަކެއް ނިންމިފައިވާކަން އާޒިމް ފާހަގަކުރެއްވިއެވެ. މީގެ ތެރޭގައި މުހިންމު ބިލްތަކެއްގެ މަސައްކަތް ނިންމައި، މުހިންމު ބިލްތަކެއް މަޖިލީހަށް ހުށަހެޅިގެން ދިޔަކަން އޭނާ ފާހަގަކުރެއްވިއެވެ.