ލިބިފައިވާ ފުރުސަތު ނަގާނުލުމަށް ރައީސް އާދޭހާއެކު ގޮވާލައްވައިފި
1 ނޮވެމްބަރު 2021 | ހޯމަ 17:53މިއީ ތިމާވެށީގެ މައްސަލަތައް ހައްލުކުރުމަށް ލިބޭ ފަހު ފުރުސަތު ކަމަށް ވެދާނެ
ކޮޕް26 ގައި ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހު ތަގުރީރު ކުރައްވަނީ
ތިމާވެށީގެ ކަންކަން ހައްލުކުރުމަށް ލިބިފައި މިވާ ވަގުތު ނަގާ ނުލުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ދުނިޔޭގެ ގައުމުތަކަށް އާދޭހާއެކު ގޮވާލައްވައިފިއެވެ.
ސްކޮޓްލެންޑްގެ ގްލާސްގައި މިހާރު ކުރިޔަށްދާ ކޮޕް26ގައި ތަގުރީރު ކުރައްވަމުން ރައީސް ވިދާޅުވީ ކަނޑުގެ ލޮނުގަނޑު އުފުލިއްޖެނަމަ އެއީ ރާއްޖެއަށް މަރުގެ އަދަބު ދިނުން ކަމުގައެވެ. އަދި ދުނިޔޭގެ ލީޑަރުން މިއަދު ގްލާސްގޯއަށް އެއްވެ މިތިބީ ދުނިޔެއަށް މިވަގުތު ދިމާވެފައިވާ އެންމެ ބޮޑު މައްސަލަ ކަމުގައިވާ ތިމާވެށީގެ މައްސަލައަށް ހައްލު ހޯދުމުގެ ގޮތުން ކަމަށާއި، މިއީ ތިމާވެށީގެ ކަންކަން ހައްލު ކުރުމަށް ލިބޭ ފަހު ފުރުސަތުގައި ވުން އެކަށީގެންވާ ކަމަށެވެ.
ރައީސް ވިދާޅުވީ ތިމާވެށީގެ ކަންކަން ހައްލު ކުރުމަށް ޕެރިސް އެގްރިމެންޓްގައި ހިމަނާފައިވާ ކަންކަން ކުރުމާ ގާތަށްވެސް މިއަދާއި ހަމައަށް އާދެވިފައިނުވާ ކަމަށާއި، މިއީ ކަންބޮޑުވާ ކަމެއް ކަމުގައެވެ. އަދި ތިމާވެށީގެ މައްސަލަތައް އެންމެ ގައުމަކުން މަސައްކަތް ކޮށްގެން ހައްލު ނުކުރެވޭނެ ކަމަށާއި، މިއީ ދުނިޔޭގެ ހުރިހާ ގައުމަކުން އެކެއްޗެއް ކިޔާ އެއް ގަލަކަށް އަރާ ތިމާވެށީގެ މައްސަލަތައް ހައްލު ކުރަންވީ ވަގުތު ކަމަށެވެ.
ރައީސް އިތުރަށް ވިދާޅުވީ ދުނިޔޭގެ ލީޑަރުން ކޮވިޑްގެ ހާލަތުގައިވެސް ގްލާސްގޯއަށް އެއްވެ މިތިބީ ތިމާވެށީގެ މައްސަލަތައް ހައްލު ކުރުމަށް ކަމަށާއި، އެހެންކަމުން މި ލިބުނު ވަގުތުގެ ބޭނުން ހިފުމަށް އާދޭހާއެކު ދަންނަވާ ކަމަށެވެ. އަދި މިއީ ތިމާވެށީގެ ކަންކަން ހައްލު ކުރުމަށް ލިބޭ އެންމެ ފަހު ވަގުތަށް ވެދާނެ ކަމަށެވެ.
