ރާއްޖޭގެ ވަފުދުގެ އެޑްވައިޒަރަކަށް އދ.ގެ ކުރީގެ ހިއުމަން ރައިޓްސް ޗީފް އައްޔަން ކުރައްވައިފި
ރައީސް ސާލިހުގެ އަރިހުގައި ރާއްޖޭގެ މަތީ ފެންވަރުގެ ވަފުދެއް ބައިވެރިވެ ވަޑައިގެންފައިވޭ
ރައީސުލްޖުމްހޫރިއްޔާ އ.ދ.ގެ ކުރީގެ ހައިކޮމިޝަނަރ ފޮރ ހިއުމަން ރައިޓްސް އާއި ބައްދަލުކުރެއްވުން
ސްކޮޓްލެންޑްގެ ގްލާސްގޯގައި މިހާރު ކުރިއަށްދާ ކޮޕް26 ސަމިޓުގައި ބައިވެރިވާ ދިވެހި ވަފުދުގެ އެޑްވައިޒަރަކަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އދ.ގެ ކުރީގެ ހިއުމަން ރައިޓްސް ކޮމިޝަނަރު އައްޔަން ކުރައްވައިފިއެވެ.
މޫސުމަށް އަންނަ ބަދަލުތަކާބެހޭ 26ވަނަ ޔުނައިޓެޑް ނޭޝަންސް ކޮންފަރެންސް އޮފް ދަ ޕާޓީސް (ކޮޕް26) ގައި ބައިވެރިވެވަޑައިގަންނަވާ ދިވެހިރާއްޖޭގެ ވަފުދުގެ އެޑްވައިޒަރެއްގެ ގޮތުގައި، އ.ދ.ގެ އިންސާނީ ހައްގުތަކާބެހޭ ކުރީގެ ހައިކޮމިޝަނަރ ޕްރިންސް ޒައިދު ރައަދުލް ހުސައިން އައްޔަން ކުރެއްވީ ނޮވެމްބަރު އެކެއްގައެވެ.
އދ.ގެ އިންސާނީ ހައްގުތަކާ ބެހޭ ކޮމިޝަނަރުގެ މަގާމު ޒައިދު އަދާކުރައްވާފައިވަނީ 2014 ވަނަ އަހަރުގެ ސެޕްޓެމްބަރު މަހުގެ 1ވަނަ ދުވަހުން ފެށިގެން 2018 ވަނަ އަހަރުގެ އޮގަސްޓް މަހުގެ 31 ވަނަ ދުވަހުގެ ނިޔަލަށެވެ.
ކޮޕް26 ސަމިޓުގައި ރައީސް ސާލިހުގެ އަރިހުގައި ރާއްޖޭގެ މަތީ ފެންވަރުގެ ވަފުދެއް ބައިވެރިވެވަޑައިގަންނަވައެވެ. އޭގެތެރޭގައި ރާއްޖޭގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ އާއި މޫސުމަށް އަންނަ ބަދަލުތަކާ ބެހޭ ޚާއްސަ މަންދޫބު ސަބްރާ އިބްރާހިމް ނޫރުއްދީން ވެސް ހިމެނިވަޑައިގަންނަވައެވެ.
ޕްރިންސް ޒައިދު ވަނީ 2010 ވަނަ އަހަރުގެ ސެޕްޓެމްބަރު މަހުން ފެށިގެން 2014 ވަނަ އަހަރުގެ ޖުލައި މަހާ ހަމައަށް ޖޯޑަނުން އދ.އަށް ކަނޑައަޅާފައި ހުންނަވާ ދާއިމީ މަންދޫބުގެ މަގާމު އަދާކުރައްވާފައެވެ.
2021 ވަނަ އަހަރުގެ އޮކްޓޯބަރު މަހުގެ 31 ވަނަ ދުވަހުން ފެށިގެން 2021 ވަނަ އަހަރުގެ ނޮވެމްބަރު މަހުގެ 12 ވަނަ ދުވަހުގެ ނިޔަލަށް އިނގިރޭސިވިލާތުން އިސްނަގައިގެން ބާއްވާ ކޮޕް26 އަކީ ޕެރިސް އެގްރީމެންޓާއި، މޫސުމަށް އަންނަ ބަދަލުތަކާ ބެހޭ އދ.ގެ ފްރޭމްވޯކް މުއާހަދާގެ ލަނޑުދަނޑިތަކަށް ވާސިލުވުމަށް ކުރެވޭ މަސައްކަތް އަވަސްކުރުމުގެ މަގުސަދުގައި ޕާޓީތައް އެއްގަލަކަށް އަރުވައި، މޫސުމަށް އަންނަ ބަދަލުތަކާ ބެހޭގޮތުން މަޝްވަރާ ކުރުމަށް ބާއްވާ ސަމިޓެކެވެ.
