އެމަރެލްޑް މޯލްޑިވްސް ރިސޯޓް އެންޑް ސްޕާއިން ގިނަ އަދަދެއްގެ ކުނި މޫދަށް އެޅި މައްސަލަ އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)އިން ބަލަން ފަށައިފިއެވެ.

މިކަން އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވަނީ ރާއްޖެއެމްވީއަށް ކަށަވަރުކޮށްދީފައެވެ. ނައީމް ވިދާޅުވީ މި މައްސަލަ ބަލަން ނިންމާފައިވާއިރު، މި މަސައްކަތް ކުރިއަށްގެންދާނީ ކަމާގުޅޭ އިދާރާތަކާ ގުޅިގެން ކަމަށެވެ.

މިކަން މިހާ ބޮޑަށް ފެންމަތިވެފައިމިވަނީ މިދިޔަ ބުރާސްފަތި ދުވަހު ހިނގި ހާދިސާއަކަށްފަހުއެވެ. އެ ރިސޯޓުގައި މަސައްކަތްކުރާ ޑައިވަރެއް ކަމަށްވާ އއ. ހިމަންދޫއަށް އުފަން އިގްބާލް ބިލާލްއަށް، އެ ރިސޯޓު ކައިރީގައި އޮންނަ ޑައިވް ޕޮއިންޓެއް ކަމަށްވާ "މާފަރު ކޭވް"އިން ގިނަ އަދަދެއްގެ ކުނި ކޮތަޅުތަކެއް ފެނި, އެއީ އެ ރިސޯޓުން އެޅި ކުނިތަކެއްކަން އޭނާއަށް އެނގުނު ހިސާބުންނެވެ. އޭނާ ވަނީ އެ ކުނިތައް ނަގައި އެ ރިސޯޓުގެ ރިސެޕްޝަންއަށް އަޅާލާފައެވެ.

ބިލާލް ކިޔައިދިން ގޮތުގައި އޭނާއަކީ ޑައިވްކުރާ މީހެއްކަމުން ރިސޯޓަށް ދިޔަ ފުރަތަމަ ދުވަހުން ފެށިގެން ކަނޑަށް ކުނި އުކާކަން އެނގިގެންދިޔައެވެ. އަދި ޑައިވް ކުރަންދާ ގިނަ ދުވަސްތަކުގައި ކުނިކޮތަޅުތައް ފެންނަ ކަމަށާއި، އެކަމާއި އިންތިހާއަށް ކަންބޮޑުވާ ކަމަށެވެ. ކުނިވާ ޒާތުގެ ތަކެތި ކަނޑަށް އެޅިނަމަވެސް ޕްލާސްޓިކް ޒާތުގެ އެއްޗެހި ކަނޑަށް އެޅުމަކީ އޭނާ ހިތް އެދޭ ކަމެއް ނޫން ކަމަށް އޭނާ ބުންޏެވެ.

އިގްބާލް ބުނީ މިކަމަށް ހައްލު ހޯދުމަށް ތަކުރާރުކޮށް އެތައް މަސައްކަތެއް ކޮށްފައިވާކަމަށެވެ. އެހެންނަމަވެސް މިކަމަށް ހައްލެއް ނުލިބި އޮއްވައި، އޮކްޓޫބަރު 28ގައި ކުރި ޑައިވުން ކުނިކޮތަޅުތައް ފެނުމުން ރުޅި ގަދަވީކަމަށް އިގްބާލް ކިޔައިދިނެވެ. އަދި އޭނާއާ އެކުގައި މަސައްކަތް ކުރާ ބައެއް މުވައްޒަފުން ވެގެން ރިސޯޓުން އުކާލި ބައެއް ކުނިތައް ނަގާފައިވާ ކަމަށާއި، ކުނިތައް ނަގާފައި ވަނީ 20 މީޓަރާއި 25 މީޓަރު އަޑިން ކަމަށް އޭނާ ބުނެފައިވެއެވެ.

އެ ކުނިތައް ރިސޯތުގެ ރިސެޕްޝަނަށް އަޅާލުމުން ވަގުތުން ރިސޯޓުން ފައިބަން އެންގީ ކަމަށް އިގްބާލް ކިޔައިދިނެވެ. އެހެން އުކާލާ ކުނިތަކުން ލިބޭ ގެއްލުން އެތައް ގުނައަކުން ބޮޑުވާއިރު، އެއީ މުޅި ރާއްޖެއަށް ލިބިގެންދާ ގެއްލުމެއްގެ ގޮތުގައި އޭނާ ސިފަކުރިއެވެ. ކޮންމެ ދުވަހަކު ވެސް ޑައިވްއަށް އިގްބާލް ފަތުރުވެރިން ގޮވައިގެންދާއިރު، މިރީތިކަން ދަމަހައްޓަން ކޮންމެ މީހަކު ވެސް މަސައްކަތް ކުރުމަށް އޭނާ ގޮވާލިއެވެ.