އަންނަ އަހަރު ފުވައްމުލައް ސިޓީގެ މަގުތަކުގައި ތާރު އެޅުމުގެ މަސައްކަތް ފެށިގެންދާނެ
29 އޮކްޓޯބަރު 2021 | ހުކުރު 07:08މަގު ހެދުމުގެ މަޝްރޫއު އަންނަ އަހަރުގެ ތެރޭގައި އެއްކޮށް ނިންމާލެވޭނެ ކަމަށް އެމްޓީސީސީން ވަނީ ލަފާކޮށްފައި
ފުވައްމުލަކު ސިޓީގެ މަގު ހެދުމުގެ މަޝްރޫއު
އަންނަ އަހަރުގެ ފުރަތަމަ ކުއާޓާގައި ފުވައްމުލަކު ސިޓީގެ މަގުތަކުގައި ތާރު އެޅުމުގެ މަސައްކަތް ފެށިގެންދާނެ ކަމަށް ޤަބޫލުކުރައްވާ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެއެމްވީއަށް އާޒިމް ވިދާޅުވީ ފުވައްމުލަކުގެ މަގު ހެދުމުގެ މަޝްރޫއަށް ގިނަ ސާމާނުތަކެއް އިމްޕޯޓް ކުރަންޖެހޭ ކަމަށެވެ. އަދި ކޮވިޑާ ގުޅިގެން ވަރަށް ބޮޑަށް ލޮޖިސްޓިކް ދަތިތައް ދިމާވީ ކަމަށާއި، ގެންނަން އޯޑަރު ކުރި ބައެއް ސާމާނުތައް ރާއްޖެއާ ހަމައަށް އަންނަން ހަ މަސް ދުވަސް ނެގި ކަމަށެވެ.
މިހާރު ވެސް ސާމާނުތައް ރާއްޖެއަށް ގެނައުމަށް ދަތިވާ ކަމަށް އާޒިމް ވިދާޅުވިއެވެ. އާޒިމް ވިދާޅުވީ މިކަމުގެ ސަބަބުން ޕްރޮޖެކްޓްތައް ކުރިއަށް ގެންދިޔުމަށް ދަތިތަކާއި ދިމާވިނަމަވެސް އެއްވެސް ޕްރޮޖެކްޓެއްގެ މަސައްކަތް ހުއްޓާ ނުލާ އެމްޓީސީސީން ކުރިއަށް ގެންދާ ކަމަށެވެ.
މިއަހަރަށް ފުވައްމުލަކުގެ މަގު ހެދުމުގެ މަޝްރޫއު ނިންމުމަށް އަމާޒު ހިފިނަމަވެސް މި ދަތިތަކާ ގުޅިގެން މަގު ހެދުމުގެ މަޝްރޫއު ނިމިފައިނުވާ ކަމަށް އާޒިމް ވިދާޅުވިއެވެ. އަދި އަންނަ އަހަރުގެ ތެރޭގައި މަޝްރޫއު އެއްކޮށް ނިންމާލެވޭނެ ކަމަށް އާޒިމް ވަނީ ލަފާ ކުރައްވާފައެވެ.
ފުވައްމުލައް ސިޓީގެ އެތެރޭގެ މަގުތައް ހެދުމުގެ މަޝްރޫޢުގެ އަމަލީ މަސައްކަތް ފަށާފައިވަނީ 20 ޖުލައި 2020 ގައެވެ. މި މަޝްރޫޢުގެ ދަށުން 31 މަގުގެ 15،932 މީޓަރުގެ ސަރަހައްދެއް ތަރައްގީކުރެވޭނެ ކަމަށް އެމްޓީސީސީން ބުނެއެވެ. މި މަސައްކަތުގެ ދަށުން 122،659 އަކަމީޓަރުގެ ސަބް ބޭސް ހެދުމާއި، 95،239 އަކަމީޓަރުގެ ތާރު އެޅުމާއި، ހިނގުމަށް ޚާއްޞަ ސަރަހައްދެއް ހެދުން ހިމެނެއެވެ. މީގެ އިތުރުން މަގުތަކުގައި ބައްތި ހަރުކުރުމާއި ފެން ހިންދާ ނިޒާމުގެ މަސައްކަތް ކުރާނެ ކަމަށް އެމްޓީސީސީން ބުނެއެވެ.
މި މަސައްކަތަށް 279.4 މިލިއަން ރުފިޔާ ޚަރަދުވާނެއެވެ. މި މަޝްރޫއު އެމްޓީސީސީއާ ހަވާލުކޮށްފައިވަނީ 2019 ވަނަ އަހަރުގެ ޖުލައި މަހުގެ 04 ވަނަ ދުވަހެވެ.
