25 ދުވަހަށްފަހު، ކަފާލާތުގެ ދަށުން އާރްޔަން ދޫކޮށްލައިފި
28 އޮކްޓޯބަރު 2021 | ބުރާސްފަތި 15:06އާރްޔަން ދޫކޮށްލާފައިވަނީ ގައުމުން ބޭރަށް ދިޔުން މަނާކުރުމާއެކު، އިތުރު 13 ކަމަކަށް ޝަރުތުކުރުމަށްފަހު
އާރްޔަން ޚާން
މަސްތުވާތަކެތީގެ މައްސަލާގައި ހައްޔަރުކޮށްފައިވާ ބޮލީވުޑްގެ ސުޕަރ ސްޓާރ ޝާޚުރުކް ޚާންގެ ދަރިފުޅު އާރްޔަން ޚާން 25 ދުވަހަށްފަހު, ކަފާލާތުގެ ދަށުން ދޫކޮށްލުމަށް ބޮމްބޭގެ ހައިކޯޓުން އަމުރުކޮށްފިއެވެ.
އާރްޔަން ދޫކޮށްލުމުގެ ޝަރީޢަތުގެ އަޑުއެހުން ހައި ކޯޓުގައި ފަށާފައިވަނީ އަންގާރަ ދުވަހުއެވެ. އެއަޑު އެހުމުގައި ބުރާސްފަތި ދުވަހު ނިންމާލާފައިވަނީ ކަފާލާތުގެ ދަށުން އާރްޔަންގެ އިތުރުން ދެން ހައްޔަރުކުރި އަރްބާޒްއާއި މުންމުންވެސް ދޫކޮށްލުމަށެވެ. މިމީހުން ހައްޔަރުކޮށްފައިވަނީ މިމަހުގެ ކުރީކޮޅު ކްރޫޒް ޝިޕެއްގައި, އިންޑިޔާގެ ނާކޮޓިކްސް ކޮންޓްރޯލް ބިޔުރޯ (އެންސީބީ)އިން ކުރިޔަށް ގެންދިޔަ ރެއިޑެއްގެ ތެރެއިންނެވެ.
މަސްތުވާތަކެތީގެ މައްސަލާގައި އާރްޔަން ބަންދުކޮށްފައި ހުންނަތާ 25 ދުވަސްފަހުން ދޫކޮށްލުމަށް ކޯޓުން އަމުރުކުރި ނަމަވެސް އާރްޔަންއަށް އަދި ގެއަށްދެވޭނީ ހުކުރު ދުވަހުއެވެ. އާރްޔަންއާއެކު ދެން ހައްޔަރުކުރި ދެ މީހުން ބަންދުކޮށްފައިވަނީ މުމްބާއީގައި ހުންނަ އާރްތުރް ރޯޑް ޖަލުގައެވެ.
މީޑިޔާ ރިޕޯޓްތައް ބުނާގޮތުން އާރްޔަން ދޫކޮށްލާފައިވަނީ ގައުމުން ބޭރަށް ދިޔުން މަނާކުރުމުގެ އިތުރުން, 13 ކަމަކަށް ޝަރުތުކުރުމަށްފަހުއެވެ. އޭގެތެރޭގައި މިމައްސަލާގައި ދެން ޝާމިލްވާ އެއްވެސް މީހަކާ އެއްވެސް މުއާމަލާތެއް ނުކުރުމާއި, ކޮންމެ ހުކުރު ދުވަހަކު އެންސީބީ އޮފީހަށް ދިޔުމާއި, އެއްވެސް މީޑިޔާއަކަށް މިމައްސަލައާ ގުޅިގެން އެއްވެސް ބަޔާނެއް ނުދިނުން ހިމެނެއެވެ.
ހައި ކޯޓުން އާރްޔަން ދޫކޮށްލަން އަމުރުކޮށްފައިވަނީ އާޔްރަން ބަންދުގައި ބެހެއްޓުމަށް އެންސީބީން ދައްކާ ހުއްޖަތްތަކަކީ ވުޖޫދުގައި ނެތް ހާލަތެއްކަމަށާއި, އަމިއްލައަށް ހަދައިގެން އުޅޭ ހާލަތެއްކަމަށް ބުނެއެވެ. އާރްޔަންގެ މައްޗަށް އެންސީބީން އަންނަނީ ޑްރަގް ޓްރެފިކް ކުރާކަމުގެ ތުހުމަތުވެސް ކުރަމުންނެވެ. އާރްޔަންގެ އަތުން މަސްތުވާތަކެތި ފެނިފައިނުވާއިރު އާރްޔަން ބަންދުގައި ބެހެއްޓުމަށް ކުރަމުންދިޔަ މަސައްކަތްތަކާ ގުޅިގެން ގިނަ ބަޔެއްގެ ފާޑުކިޔުން ވަނީ އެންސީބީއަށް އަމާޒުވެފައެވެ. އެގޮތުން މިއީ ޝާހުގެ ދަރިއަކަށްވުމުން ކުރި ކަމެއްކަމަށް ބުނެވެސް ވާހަކަދައްކާފައިވެއެވެ.
އާރްޔަން ބަންދުކުރި ފަހުން ކަފާލާތުގެ ދަށުން ދޫކޮށްލުމަށް ދެ ފަހަރެއްގެ މަތިން ކޯޓުގައި އަޑުއެހުންތައް މީގެކުރިން ކުރިޔަށް ގެންދިޔައެވެ. ނަމަވެސް ދެ ފަހަރުވެސް ކޯޓުން ނިންމާފައިވަނީ ބަންދުން ދޫނުކުރުމަށެވެ. ދަށު ކޯޓުގެ މިނިންމުން އެންމެ ފަހުން ހައި ކޯޓާ ހިސާބަށްގޮސް ކާމިޔާބުކޮށްފައިވާއިރު, މިމަހަކީ ޝާހުގެ އާއިލާއަށް މުހިންމު މުނާސަބަތުތަކެއް އައި މަހެއްވެސްމެއެވެ. އެގޮތުން އާރްޔަންގެ މަންމަ އަދި ޝާހުގެ އަނބިމީހާ ގޯރީ ޚާންގެ އުފަންދުވަސް އޮކްޓޯބަރ މަހު އައިސްފައިވާއިރު ޝާހު އާއި ގޯރީގެ ކައިވެންޏަށް 30 އަހަރު ފުރިފައިވަނީވެސް މިމަހުގެތެރޭގައެވެ.
އާރްޔަން ދޫކޮށްލާފައިމިވަނީ ޝާހުގެ އުފަންދުވަސް އަންނަން ކުޑަދުވަސްކޮޅަކަށް ވެފައިވަނިކޮށެވެ. ޝާހުގެ އުފަންދުވަހަކީ ނޮވެމްބަރ މަހުގެ 2 ވަނަ ދުވަހެވެ.
