ސެޓެލްކޯގެ ސްމާޓް މީޓަރު އަންނަ އަހަރު އާންމުންނަށް ދޫކުރަނީ
ހުޅުމާލެ ފޭސް 2 ގައި ސްމާޓް މީޓަރު ބަހައްޓާފައިވޭ
ސްޓެލްކޯ
އެޕްލިކޭޝަނެއް މެދުވެރިކޮށް ކަރަންޓު ބޭނުން ކުރެވޭ މިންވަރު ބަލާލެވޭ ސްމާޓް މީޓަރު އަންނަ އަހަރު އާންމުނަށް ވިއްކަން ފަށާނެ ކަމަށް ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ ވިދާޅުވެއްޖެއެވެ.
ރާއްޖެއެމްވީއަށް މައުލޫމާތުދެއްވަމުން މުޣުނީ ވިދާޅުވީ ހުޅުމާލެ ފޭސް 2 ގެ 7000 ހައުސިން ޔުނިޓްގައި ސްމާޓް މީޓަރުތައް ބަހައްޓާފައިވާ ކަމަށެވެ. އަދި ސްމާޓް މީޓަރުގެ ހުރިހާ މައުލޫމާތެއް އެޕްލިކޭޝަނުން ލިބޭނެ ކަމަށް ވެސް މުޣުނީ ވިދާޅުވިއެވެ. މިއީ ސްމާޓް މީޓަރު ރާއްޖޭގައި ތައާރަފް ކުރި ފުރަތަމަ ފަހަރެވެ.
ސްމާޓް މީޓަރަކީ ކަރަންޓް ބޭނުންކުރާ މިންވަރާއި، ވޯލްޓޭޖް ލެވެލްތަކާއި، ޕަވަރ ފެކްޓަރ ފަދަ މައުލޫމާތު ރެކޯޑްކުރާ އިލެކްޓްރޯނިކް ޑިވައިސްއެކެވެ.
މުޣުނީ ވިދާޅުވީ، ސްމާޓް މީޓަރ މެދުވެރިކޮށް ކަރަންޓު ޚަރަދު އެންމެ ގިނައިން ބޭނުން ކުރެވޭ ގަޑިތައް ސްޓެލްކޯ އެޕްލިކޭޝަން މެދުވެރިކޮށް ބަލާލެވޭނެ ކަމަށެވެ. އަދި ކަރަންޓު ބިލަށް އަރާވަރު ލިމިޓް ވެސް ކުރެވޭނެ ކަމަށެވެ.
ހުޅުމާލެ އާއި މާލޭގެ އެކި ސަރަހައްދުތަކުގައި ސްމާޓް މީޓަރުތަށް ދަނީ ޓެސްޓް ކުރަމުންނެވެ. ސްޓެލްކޯގެ އެޕްލިކޭޝަންގެ ބައެއް ފީޗާރސްތައް ޓެސްޓުކުރަމުން ދާކަމަށް މުޣުނީ ވިދާޅުވިއެވެ. މީގެ އިތުރުން، އަންނަ އަހަރުގެ ކުރީ ކޮޅު އާންމުންނަށް ސްމާޓް މީޓަރުތަކުގެ ޚިދުމަތް ރަސްމީކޮށް ލިބިގެން ދާނެއެވެ.
