މިސަރުކާރުގައި ޅަފަތުގެ ތައުލީމަށް ޚާއްސަ ސަމާލުކަމެއްދޭ ކަމަށް ރައީސުލްޖުމްހޫރިއްޔާގެ ނާއިބް ފައިސަލް ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އާދިއްތަ ދުވަހުގެ ހެނދުނު މުހައްމަދު ގާސިމް ޕްރީސްކޫލް ހުޅުވުމަށް އެ ސްކޫލްގައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ. ނާއިބްރައީސް ފައިސަލް ވިދާޅުވީ ޅަފަތުގެ ތައުލީމަކީ ވަރަށް މުހިންމު ފެށުމެއް ކަމަށާއި، އެކުދިން ގިނަ ކަންކަން ދެނެގަނެ، އެއްކުއްޖަކު އަނެއް ކުއްޖަކާ ގުޅިގެން އުޅެން ދަސްކުރާ ކަމަށެވެ. އަދި ޕްރީސްކޫލަށް ކުއްޖާ ވައްދާ، ކުޅުމުގެ ތެރެއިން ގިނަ ކަންކަން ދަސްކޮށް ދިނުމަކީ މުހިންމުކަމެއްގެ ގޮތުގައި ނާއިބްރައީސް ފާހަގަކުރެއްވިއެވެ.
ނާއިބްރައީސް ވިދާޅުވީ ޅަފަތުގެ ތައުލީމަށް މިސަރުކާރުން ވަރަށް ބޮޑު އަހައްމިއްޔަތު ކަމެއްދޭ ކަމަށާއި، ތައުލީމީ ދާއިރާ ކުރިއެރުވުމަށް ގިނަ މަސައްކަތްތަކެއް ކުރަމުންދާ ކަމަށެވެ. ރާއްޖޭގެ ހުރިހާ ދިމަދިމާލުން ތައުލީމީ ދާއިރާއަށް ދިމާވާ އެކިއެކި މައްސަލަތަކާއި ގޮންޖެހުންތައް ހައްލުކުރުމަށް ކުރަމުންދާ މަސައްކަތްތަކަށް ބޮޑެތި ކުރިއެރުންތަކެއް ލިބިފައިވާ ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ މި ސަރުކާރުން އެންމެ ބޮޑު ހޭދައެއް ކުރަމުންދާ ދާއިރާއަކީ ވެސް ތައުލީމީ ދާއިރާ ކަމަށެވެ.
ހުޅުމާލޭގެ ދެވަނަ ފިޔަވަހީގައިވާ ހިޔާ ފްލެޓްތަކުގައި މީހުން ދިރިއުޅެން ފަށާފައިވާއިރު މީހުން އާބާދުވާ މިންވަރާ ބަލާފައި އެކަށީގެންވާ ވަރަށް ސްކޫލްތައް އިމާރާތްކޮށްފައި ނެތުމުން އެތަކެއް ދަތިތަކާ ރައްޔިތުން ކުރިމަތިލާން ޖެހިފައިވާކަން ފާހަގަކުރައްވައި ނާއިބްރައީސް ވިދާޅުވީ ސަރުކާރުން މިހާރުވެސް ދަނީ ހުޅުމާލޭގައި 2 ސްކޫލެއް އިމާރާތްކުރުމުގެ މަސައްކަތް ކުރަމުން ކަމަށާއި، އެތަނުން އެއް ސްކޫލެއްގެ މަސައްކަތް ވަރަށް ބާރު ސްޕީޑްގައި ކުރިއަށްދާ ކަމަށެވެ.
ތައުލީމީ ދާއިރާ ކުރިއެރުވުމުގައި ކުރަމުންދާ މަސައްކަތްތަކުގައި ރައްޔިތުންގެ ފަރާތުން ލިބޭ އެއްބާރުލުން ނާއިބްރައީސް ފާހަގަކުރައްވާފައިވެއެވެ.
