އައްޑޫ ސިޓީ، މަރަދޫ ފޭދޫގައި ކުޑަ ކުއްޖަކަށް ފުލުހުން އަނިޔާ ކުރިކަމަށް ތުހުމަތުކޮށް ސޯޝަލް މީޑިއާގައި ދައުރުވަމުންދާ ވީޑިއޯއެއް ފުލުހުންގެ ސަމާލުކަމަށް އައިސްފައިވާކަމަށް ފުލުހުން ބުނެފިއެވެ.
ފުލުހުންގެ ޕްރޮފެޝަނަލް ސްޓޭންޑާރޑްސް ކޮމާންޑުން އެކަން ހިނގާފައިވާ ގޮތާ ގުޅޭ މައުލޫމާތު ސާފު ކުރަމުންދާކަމަށް ފުލުހުން މައުލޫމާތުދިނެވެ
އެގޮތުން މި މައްސަލައިގައި ފުލުހުން އަމަލުކުރަން ޖެހޭ އުސޫލުތަކާ ޚިލާފަށް އަމަލުކޮށްފައިވާ ކަމަށް ތުހުމަތު ކުރެވިއްޖެނަމަ، ފުރިހަމަ ތަހުގީގެއް ހިންގައި އެކަމާ ގުޅިގެން އަޅަންޖެހޭ ފިޔަވަޅު އަޅާނެ ކަމަށް ފުލުހުން ވަނީ ބުނެފައެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެނިގެން ދަނީ ފުލުހުން އަނިޔާކުރި ކަމަށް ފިރިހެން ކުއްޖަކު ބުނާ މަންޒަރެވެ. އެގޮތުން އޭނާގެ ބޯ ފާރުގައި ޖަހައި، ފުރަގަހަށް ބިޑި އެޅުވި ކަމަށް އެކުއްޖާ ތުހުމަތުކުރެއެވެ. އަދި އެކުއްޖާ އެ ވާހަކަތައް ދެއްކިއިރު ކައިރީގައި ފުލުހުން ތިބި މަންޒަރުވެސް ވީޑިއޯއިން ފެނެއެވެ.
