މިނިވަން ނުވެގެން އުޅެނީ ޔާމީނެވެ. ދިވެހިންނެއް ނޫނެވެ.

ތާރީޚު ނުދެކޭވަރުގެ ދަރަނިވެރިކަމެއްގެ ތެރެއަށް ރާއްޖެ ވައްޓާލީ ވެރިކަމަށް އައިބަޔަކު އެމީހުންގެ އަމިއްލަ އެދުމުގައެވެ. ޔާމީނުގެ ވެރިކަން ނިމުނު އިރު ދުނިޔޭގެ މާލީ އިދާރާތަކާއި ގައުމުތަކުން ރާއްޖެއަށް މާލީ އެހީތެރިކަން ނުދޭވަރަށް ގައުމުވަނީ ދަރަނި ވެރިކުރުވާފައެވެ. ނުވިތާކަށް ރާއްޖޭގެ ހުރިހާ އެސެޓެއްހެން އޮތީ ވިއްކާ ހުސްކޮށްފައެވެ. އަސާސީ ކަންކަން ކުރުމަށާއި ދަރަނި އަދާކުރަން ދަރަނި ވެރިވުންނޫން ގޮތެއް ރާއްޖެއަކަށް މިހާރަކުނެތެވެ. ރާއްޖެއަށް ދަރަންޏެއް ދޭނެވެސް ބަޔަކު ނެތެވެ. މި ނިކަމެތި ހާލަތަށް ގައުމުވައްޓާލާފައި ނިކުމެ ތިބެ ޔާމީނުގެ އައުވާނުން އިސްވެތިބެ މިނިވަން ކަމުގެ ވާހަކަ ދައްކާކަށް ލަދެއް ނުގަނެއެވެ.

ރާއްޖެއަކީ ފުރިހަމަ މިނިވަން ގައުމެކެވެ. ރާއްޖެއަކީ އދ ގެ ފުރިހަމަ މެންބަރެކެވެ. ރާއްޖެއަކީ އެކުވެރި ދައުލަތްތަކުގެ މަދަދާއި އެހީ އިންތިހާއަށް ލިބޭ ގައުމެކެވެ. ޔާމީނު ވެރިކަމުގައި ޖެއްސި ދަރަނީގެ ދަންތުރައިން ރާއްޖެ މިންޖުކޮށް ދިނުމަށް ރާއްޖޭގެ އަތުގައި ހިފައިގެން އޮތީ އެންމެ އެކުވެރި އިންޑިޔާއެވެ. އިންޑިޔާގެ ބިންކުޑަވެގެން ރާއްޖެ ހިފާކަށް އިންޑިޔާ ނޫޅެއެވެ. ޔާމީނުގެ ދަރަނީގެ ދަންތުރައިން ރާއްޖެ ސަލާމަތްކޮށްދިނުމަށް އެހީތެރިވުމާއި ރާއްޖޭގެ ރައްޔިތުންނަށް ރާއްކާތެރިކަން ހޯދާދިނުން ނޫން ބޭނުމެއް އެމީހުންގެ ނެތެވެ. ރާއްޖެއިން އިންޑިޔާއަށް ކޮށްދޭހާވެސް ކަމަކީ އިންޑިޔާ ކަނޑުގެ ސަލާމަތާރައްކާތެރި ކަމަށްޓަކައި އިންޑިޔާއިން ކުރަމުން ގެންދާ ކަންކަމަށް އެހީތެރިކަން ފޯރު ކޮށްދިނުމެވެ. މިކަމުގައި އަޅުވެތިވުމެއް އަޅުވެތި ކުރުމެއްނެތެވެ.

އަންތަރީހެއް ނުވާނެ ހެއްޔެވެ. ޔާމީނޫއެވެ. ބަޔަކު އެއްކޮށްގެން ގައުމިއްޔަތާއި މިނިވަންކަމުގެ ނަމުގައި ޖަލުގެ ތޭރިތަކުގެ ފަހަތުން ނިކުންނަށް މަރުފަލި ނުޖަހާށެވެ. ގިނަ ދިވެހި ރައްޔިތުން ތިބީ ނިކަން ހޭލައެވެ. ފިތުނަ އުފައްދައިގެން ތިޔައުޅެނީ ކޮން މިނިވަންކަމެއް ހޯދަންހެއްޔެވެ.

ބަލަ! ވެރިކަމުގަ ތިބިއިރު ރައްޔިތުންނަށް ޖެއްސި ހާލު ހަދާންކޮށް ބަލާށެވެ. ސިޔާސީ ވާދަވެރިން ގޮޅިގޮޅިއަށް ފައްތާލާ އެތައް އާއިލާއެއް މަގުމަތިކޮށްލި ހަދާންވޭހެއްޔެވެ. ފުލުފުލުގައި ނޫސް މަޖައްލާތައް ލައްކައިން ލައްކައިން ޖުރުމަނާ ކުރި ހަދާން ނެތީ ހެއްޔެވެ. ފަނޑިޔާރުންގެ ބަނޑު ބިންމަތީގައި ޖެއްސީ އޮޅިގެން ހެއްޔެވެ. ރަށްރަށާ ފަޅުތައް ނުވިއްކަން ހެއްޔެވެ. ނިކަން ރަގަޅަށް މިނިވަން ކަމުގެ ވާހަކަ ދައްކާލަމާ ހިގާށެވެ.

ނުލިބިގެން ތިޔައުޅެނީ ކޮން މިނިވަން ކަމެއް ހެއްޔެވެ. ހާލަތުއް ޒުރޫރާގެ މިނިވަން ކަންހެއްޔެވެ. ސްޕްރީމް ކޯޓުގެ ފުރާޅުން ޓިނު ނެގުމުގެ މިނިވަން ކަންހެއްޔެވެ. ރާގޮޑި އުކާލާހެން މަޖިލީހުގެ ފާރުމަތިން މެންބަރުން އުކާލުމުގެ މިނިވަން ކަން ހެއްޔެވެ.

އާއެކެވެ. އެމްއެމްޕީއާރުސީ ދަވާލާ ރައްޓެހިނާ ގާތްމީހުނަށް ބަހާލުމުގެ މިނިވަންކަން ނެތީމާ ލައްކަ ހިތައް ތަދުވާނެއެވެ. މާފަރު އެއަރޕޯޓުން ހާސް ހާހުން ރުއް އުފުރައިގެން ގެނެސް އެމްސީއެލްގެ ނަމުގައި ބިލް ހަދައިގެން މިލިޔަނުން ރުފިޔާނަގާ އެ ފައިސާއާއި ރުއްތަކަށް ވީނުވީ އަންގާނުލާ ދިރުވާލުމުގެ މިނިވަންކަން ނެތިގެން އުޅޭކަން އެބަ އެގެއެވެ. މަގުހަނި ދެތިންގަޑު ޓިނަށް އެލާޖިކް ވެފައި ތިބި ވަގުންނަށް އެތައް މިލިޔަނުގެ އަގުހުރި ލަގްޒަރީ ފްލެޓްގަތުމުގެ މިނިވަންކަން ނެތިގެން އުޅޭނެތާއެވެ. އަތޮޅުތައް ހުރިގޮތަށް ވިއްކާލުމުގެ މިނިވަންކަން ގެއްލުނީމާ ފަޔަށް ހިނިއަރަނީތާއެވެ. އެތައް ރަށަކަށް ޓްރާންސްފޯމަރު ގަތުމުގެ ނަމުގައި އެތައް މިލިޔަން ޑޮލަރެއް ކަޅާކޮށްލައި އެރަށްރަށަށުގެ ކަރަންޓު ތޯލާފުޅީގައި ދިނުމުގެ މިނިވަންކަން ނެތުމަކީ ހޭކެނޑޭވަރު ކަމަކަށް ވަނީތާއެވެ. ބުރިޖުގެ ލޯނުން ކޮއްކޯފުޅަށް ސިޓީ ހޮޓަލެއް އަޅާ ދިނުމުގެ މަސައްކަތުގައި ބުރަކި ޖެހުނީމާ އެމިނިވަންކަން ހޯދާން އުޅޭނެތާއެވެ. ދަރުމަވަންތަ ހޮޓަލުގެ ދެވަނަ ޓަވަރު އާޓިފިޝަލް ބީޗް ކުރިމަތީގައި ބިނާކުރަނިކޮށް ވެރިކަން ވެއްޓި އެބިނާ ހުރަގެއަކަށް ބަދަލުވީމާ އަސަރުފަށެއް ކުރާނެތާއެވެ.

މޮޔަނުވާށެވެ. ދިވެހީންގެ ގިނަބަޔަކަށް ވާނުވާ އެގެއެވެ. މިޒަމާނުގައި އެއްބަޔަކު އަނެއް ބަޔަކު އަޅުވެތި ކުރުމަކަށް ދުނިޔޭގައި ފުރުސަތެއްނެތެވެ. އެހެން ނޫނަސް ރަހުމަތްތެރިކަމާ ގާތް ކަމަކީ އަޅުވެތިކަން ކަމަށް ދެކޭ ބަޔަކީ ވިސްނުންކޮށި ބަލިބަޔެކެވެ. ޔާމީނުގެ ބައިވެރިން ތިޔަޖަހަން އުޅެނީ ކޮންސަކަރާތެއްކަން ނޭގިގެން އެބަ އުޅޭ ހެއްޔެވެ. ޔާމީނުގެ މިނިވަން ކަމަށްޓަކާ މަގުތަކަށް ނިކުންނާނެ މީހުން ނެތުމުން ހީލަތްތެރިކަމާއެކު މީހުން ނެރެން ތިއުޅޭ އުޅުމުން ފައިބާނީ ހުޅުބެވެ.