ލޯންޗުން މޫދަށް ވެއްޓި، ގެއްލިގެން ހޯދަމުންދާ ކުޑަ ކުއްޖާ އަދިވެސް ނުފެންނަ ކަމަށް އެމްއެންޑީއެފުން ބުނެފިއެވެ.
މި ހާދިސާގައި ގެއްލިފައިވަނީ ވ. ފުލިދޫއަށް ނިސްބަތްވާ އުމުރުން 4 އަހަރުގެ ޖައިޝް ޖިނާހްއެވެ. އެމްއެންޑީއެފް އިން ބުނީ ހޮނިހިރު ދުވަހު މާލެއިން ވ. އަތޮޅަށް ދަތުރުކުރި ލޯންޗަކުން 4 އަހަރުގެ ފިރިހެން ކުއްޖަކު ކަނޑަށް ވެއްޓި ގެއްލުމާ ގުޅިގެން ,އެކުއްޖާ ހޯދުމުގެ މަސައްކަތް އެމްއެންޑީއެފް ކޯސްޓްގާޑާއި އާއިލާގެ ފަރާތުން ކުރަމުންދާ ކަމަށެވެ. އަދި އެކުއްޖާއާ ބެހޭ އެއްވެސް ޚަބަރެއްވޭތޯ އެސަރަޙައްދުން ދަތުރުކުރާ އުޅަނދު ފަހަރުންނާއި އެހިސާބުގެ ރަށްތަކުން ބަލައިދިނުމަކީ ކޯސްޓްގާޑްގެ ވަރަށް ބޮޑު އެދުމެއް ކަމަށެވެ.
އެކުއްޖާއާ ބެހޭ އެއްވެސް މައުލޫމާތެއް ލިބިއްޖެނަމަ ލަސްނުކޮށް, ކޯސްޓްގާޑްގެ ހިލޭ ގުޅޭ ނަމްބަރު 191 ނުވަތަ 3395981 އަދި 3398898 ފޯނަށް ގުޅުމަށާއި, އަދި ފެކްސް ކުރައްވާނަމަ 3391665 ނަމްބަރަށް ފެކްސް ކުރުމަށް އެމްއެންޑީއެފް އިން އެދެއެވެ.
ރާއްޖެއެމްވީއަށް އެމްއެންޑީއެފުން ބުނީ ހުރިހާ ވަސީލަތްތައް ބޭނުންކޮށްގެން އެކުއްޖާ ހޯދުމުގެ މަސައްކަތްތައް ކުރަމުންދާ ކަމަށާއި، މިހާތަނަށް 10 ސްކޮއަރ ކިލޯމީޓަރުގެ ބޮޑު ސަރަހައްދެއް ބަލާފައިވާ ކަމަށެވެ. އަދި މިހާތަނަށް އެކުއްޖާއާ ގުޅުން ހުރި އެއްޗެއް ވެސް ފެނިފައިނުވާ ކަމަށް އެމްއެންޑީއެފުން ބުނެއެވެ. މައުލޫމާތު ލިބޭ ގޮތުގައި އެކުއްޖާލައިގެން ހުރީ ކަޅު ކުލައިގެ ޓީޝާޓެކެވެ.
މީގެ އިތުރުން މިހާދިސާގައި ގެނބިގެން ނިޔާވި އެކުއްޖާގެ މަންމަ، 33 އަހަރުގެ މަރިޔަމް ނާހިދާގެ ހަށިގަނޑު ކޯސްޓްގާޑްގެ އެހީތެރިކަމާއެކު، އާދިއްތަ ދުވަހުގެ ހެނދުނު 7:30 ހާއިރު މާލެ ގެނެސްފައިވާ ކަމަށް އެމްއެންޑީއެފުން ބުނެއެވެ.
ކ. ގުރައިދޫ ހެލްތު ސެންޓަރުން ބުނީ, އަންހެން މީހާ އެ ސެންޓަރަށް ގެނެސްފައިވަނީ ހޮނިހިރު ދުވަހުގެ އިރުއޮއްސި 6:35 ހާއިރު ކަމަށާއި، ގެނައި އިރުވެސް ނިޔާވެފައިވާ ކަމަށެވެ.
