ރާއްޖޭގެ ބޮޑު ސަރަހައްދަކަށް ޔެލޯ އެލާޓް!

ރާއްޖޭގެ މޫސުން ގޯސްވުމާ ގުޅިގެން ބޮޑު ސަރަހައްދަކަށް ޔެލޯ އެލާޓް ނެރެފިއެވެ.

ހއ. އަތޮޅުން ފެށިގެން ތ. އަތޮޅަށް ޔެލޯ އެލާޓް ފުރަތަމަ ނެރެފައިވަނީ ހުކުރު ދުވަހުގެ ހެނދުނު 06:30ން ފެށިގެން 10:30އާ ހަމައަށެވެ. ނަމަވެސް މިހާރު ވަގުތު އިތުރުކޮށް ޔެލޯ އެލާޓް ނެރެފައިވަނީ ހަވީރު 4:30ށެވެ.

މޫސުމާ ބެހޭ ގައުމީ އިދާރާ އިން ބުނީ ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، ވިލާގަނޑުގައި 45 މޭލަށް ވައި ގަދަވެ، އާއްމުގޮތެއްގައި ކަނޑުތައް ގަދަވާނެ ކަމަށް ލަފާ ކުރެވޭ ކަމަށެވެ.

މީގެ އިތުުރުން ލ. އަތޮޅުން ފެށިގެން އައްޑޫ ސިޓީއަށް ނެރެފައިވާ ވައިޓް އެލާޓްގެ ވަގުތު ވެސް ވަނީ އިތުރުކޮށްފައެވެ. ފުރަތަމަ ވައިޓް އެލާޓް ނެރެފައިވަނީ ހުކުރު ދުވަހުގެ ހެނދުނު 06:30ން ފެށިގެން 12:30އާ ހަމައަށެވެ. އަދި މިހާރު ވަގުތު އިތުރުކޮށްފައިވަނީ އިރުއޮއްސި 6:30ށެވެ.

މޫސުމާ ބެހޭ ގައުމީ އިދާރާއިން ބުނީ ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި ވިލާގަނޑުގައި ގަޑިއަކު 45 މޭލަށް ވައި ގަދަވެ ކަނޑުތައް އާންމު ގޮތެއްގައި ގަދަވާނެ ކަމަށް ލަފާކުރެވޭ ކަމަށެވެ.

ރާއްޖޭގެ މޫސުން ގޯސްވުމާ ގުޅިގެން، މޫސުމާ ބެހޭ ގައުމީ އިދާރާއިން ބުނީ ރާއްޖޭގެ ސަރަހައްދުގައި އުފެދިފައިވާ ލޯ ޕްރެޝަރ ޓްރަފްގެ ސަބަބުން ކުރިއަށް އޮތް 3 ދުވަހު ރާއްޖޭގެ ހުރިހާ ސަރަހައްދެއްގައި ވައި ގަދަވުމާއެކު ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ. އަދި ބައެއް އަތޮޅުތަކަށް ބޯކޮށް ވާރޭވެހި ގުގުރުން އެކަށީގެންވާ ކަމަށް މޫސުމާ ބެހޭ ގައުމީ އިދާރާއިން ބުނެއެވެ.

އެހެންކަމުން ކަނޑުދަތުރު ކުރާ ފަރާތްތަކުން މޫސުމަށް ޚާއްސަ ގޮތެއްގައި ސަމާލުވުމަށް މުސޫމާ ބެހޭ ގައުމީ އިދާރާއިން އިލްތިމާސްކޮށްފައިވެއެވެ.