އަމީންގެ ދައުވާތައް ބާތިލުކުރީ ރަނގަޅަށް ނޫންކަމަށް ސުޕްރީމް ކޯޓުން ޙުކުމްކޮށްފި
3 އޮކްޓޯބަރު 2021 | އާދީއްތަ 09:00ގާނޫނު މާނަކުރުމުގައި އޮޅުންތަކެއް ހުރިކަން ފާހަގަކުރެވުނު
ޓެރަރިޒަމް ދައުވާ އުފުލާފައިވާ މުހައްމަދު އަމީންގެ ޝަރީއަތް ކުރިއަށްދަނީ
ޓެރަރިސްޓެއް ކަމަށް ބުނާ މުޙައްމަދު އަމީނުގެ މައްސަލައިގައި ހައިކޯޓުން ނިންމާފައިވާގޮތާމެދު ޕްރޮސެކިއުޓަރ ޖެނެރަލްގެ އޮފީހުން ހިތްހަމަ ނުޖެހޭތީ އެ ޤަޟިއްޔާ ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކޮށްފައިވާއިރު، އަމީންގެ ދައުވާތައް ބާތިލުކުރީ ރަނގަޅަށް ނޫންކަމަށް ދިވެހިރާއްޖޭގެ ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާޤުން ޙުކުމް ކުރައްވައިފިއެވެ.
ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވަނީ އުއްތަމަ ފަނޑިޔާރު އަޙުމަދު މުއުތަސިމް އަދުނާން، ފަނޑިޔާރު އާއިޝާ ޝުޖޫން މުހައްމަދު، އަދި ފަނޑިޔާރު ހުސްނުއްސުއޫދެވެ.
އާދިއްތަ ދުވަހު އޮތް އަޑުއެހުމަކީ މި މައްސަލައިގެ ގޮތް ނިންމެވުމަށް ބޭއްވި އަޑުއެހުމެކެވެ. އެގޮތުން މި އަޑުއެހުމުގައި ފަނޑިޔާރުން ވަނީ އެބޭފުޅުންގެ ރައުޔު އިއްވަވާފައެވެ.
މި މައްސަލައިގައި ފަނޑިޔާރު ހުސްނުއްސުއޫދުގެ ރައުޔު އިއްވެވުމަށްފަހު ވިދާޅުވީ، އަމީންގެ މައްޗަށް ދައުވާ ކުރުމަށް މުއްދަތު ގުނާނީ ޓެރަރިޒަމްގެ ގާނޫނުގެ ދަށުން ކަމަށެވެ. އަދި އަމީންގެ ފަރާތުން ހުށައެޅި ހުށައެޅުންތައް ބަލައިނުގަތުމަށް ކްރިމިނަލް ކޯޓުން ނިންމީ ރަނގަޅަށް ކަމަށާއި، އޭނާގެ މައްޗަށް ކޮށްފައިވާ ދައުވާތައް ހައިކޯޓުން ބާތިލުކޮށްފައިވަނީ ޓެރަރިޒަމް މަނާ ކުރުމުގެ ޤާނޫނުގެ އުސޫލުތަކާ ޚިލާފަށްކަމަށް ޤަބޫލު ކުރައްވާކަމަށް ހުސްނުއްސުއޫދު ވިދާޅުވިއެވެ.
"މިގޮތަށް މި މައްސަލަ ނިމުމުން، ކްރިމިނަލް ކޯޓުން ބަލަމުންދިޔަ (853 އަދި 854 ވަނަ ގަޒިއްޔާ) ތަކުން ބަލަމުންދިޔަ މައްސަލަތައް ހައިކޯޓުން އެ ގަޒިއްޔާތައް ބާތިލު ކުރުމުގެ ކުރިން ބަލަމުން ދިޔަ ހިސާބުން އެ މައްސަލަ ބެއްލެވި ފަނޑިޔާރުން ކުރިއަށް ގެންދަންޖެހޭނެކަމަށް ދެކެން، މިގޮތުން މައްސަލަ ބަލާއިރު އިދާރީ ގޮތުން ހުރި ކަންކަން ފުރިހަމަ ކުރުމަށްޓަކައި މި މައްސަލައަށް އާ ގަޒިއްޔާ ނަންބަރުތަކެއް ދީގެން ކުރިއަށް ގެންދިއުމަށް ހުރަހެއް އޮތްކަމަށް ނުދެކެން"
ފަނޑިޔާރު އަޙުމަދު މުއުތަސިމް އަދުނާން، ފަނޑިޔާރު އާއިޝާ ޝުޖޫން މުހައްމަދުވެސް ވަނީ ފަނޑިޔާރު ހުސްނުއްސުއޫދުގެ ރައުޔަށް ތާއީދު ކުރައްވާފައެވެ. އެއާއެކު މި މައްސަލައިގައި ހައިކޯޓުން ނިންމި ނިންމުން ސުޕްރީމް ކޯޓުން ވަނީ ބާތިލުކޮށްފައެވެ.
މައްސަލައިގެ ޚުލާސާއެއް:
އަމީނަކީ ޖިނާއީ އިޖުރާއަތުގެ ޤާނޫނުގެ ދަށުން ބަންދުކޮށްފައިވާ މީހެއްކަމަށްވާތީ އޭނާގެ މައްޗަށް ދައުވާކުރަން ޖެހޭ މުއްދަތުގައި ދައުވާކޮށްފައި ނުވާކަމަށް ބުނެ އަމީންގެ ފަރާތުން ދައުވާތައް ބާތިލުކޮށްދިނުމަށް އެދި ކްރިމިނަލް ކޯޓަށް ހުށައެޅިއެވެ. ހަމައެއާއެކު، ދެ ދައުވާއަކީވެސް އެއް ވާގިއާތަކެއްގެ މައްޗަށް އުފުލާފައިވާ ދައުވާތަކެއްކަމަށް ބުނެ އަމީންގެ ފަރާތުން ވަނީ ދައުވާތައް ބާތިލުކޮށްދިނުން އެދި ކްރިމިނަލް ކޯޓަށް ހުށައަޅާފައެވެ. ނަމަވެސް އެ ހުށައެޅުން ޤަބޫލު ނުކުރުމުން އަމީންގެ ފަރާތުން އެ ނިންމުން ހައިކޯޓުގައި އިސްތިއުނާފުކޮށް، ހައިކޯޓުން މި މައްސަލަ ނިމުނީ އަމީންއާ އެއްކޮޅަށެވެ. ހައިކޯޓުގެ ނިންމުމުގައި ބުނެފައިވަނީ އަމީން ބަންދުކޮށްފައިވަނީ ޓެރަރިޒަމްގެ ގާނޫނުގެ ބަދަލުގައި ޖިނާއީ އިޖުރާއަތުގެ ގާނޫނުގެ ދަށުން ނަމަވެސް, ދައުވާ ކުރުމަށް މުއްދަތު ގުނާފައިވަނީ ޓެރަރިޒަމްގެ ގާނޫނުގެ ދަށުން ކަމަށެވެ.
ޖިނާއީ އިޖުރާއަތުގެ ގާނޫނުގެ ދަށުން ބަލާއިރު އަމީންގެ މައްޗަށް ހައްޔަރުކުރިތާ 30 ދުވަސް ތެރޭ ދައުވާ ކުރަން ޖެހެ އެވެ. ނަމަވެސް, އަމީންގެ މައްޗަށް ދައުވާކޮށްފައިވަނީ 30 ދުވަސް ހަމަވި ފަހުންނެވެ. އެއީ ޓެރަރިޒަމް ގާނޫނުގެ ދަށުން ލިބޭ މުއްދަތަށް ބަލައި، ބަންދުކުރިތާ 45 ދުވަސްވުމުގެ ކުރިންނެވެ.
އެހެންނަމަވެސް، ދައުލަތުން އެ ނިންމުން ސުޕްރީމް ކޯޓުގައި އިސްތިއުނާފުކުރީ މައިގަނޑު 2 ނުކުތާއެއްގެ މައްޗަށެވެ. އެގޮތުން އަމީންގެ މައްޗަށް ހިނގާނީ ޓެރަރިޒަމް މަނާ ކުރުމުގެ ޤާނޫނު ކަމަށާއި، މި މައްސަލައަކީ ކްރިމިނަލް ކޯޓުން މައުޟޫޢީ ގޮތުން ބަލަން ޖެހޭ މައްސަލައެއްގެ ގޮތުގައި ކަނޑައަޅުއްވައި ދެއްވުން އެދިވަޑައިގަންނަވާ ކަމަށް ދައުލަތުން ފާހަގަކޮށްފައިވެއެވެ. ދައުލަތުން ބުނެފައިވަނީ މި މައްސަލައަކީ ކްރިމިނަލް ކޯޓުން މައުޟޫޢީ ގޮތުން ބަލަން ޖެހޭ މައްސަލައެއްގެ ގޮތުގައި ކަނޑައަޅުއްވައި ދެއްވުމަށް އެދިފައެވެ. ދައުލަތުގެ ފަރާތުން މި މައްސަލައިގައި ވަކާލާތު ކުރައްވާފައިވަނީ ޕްރޮސެކިއުޓަރ ޖެނެރަލް ހުސައިން ޝަމީމެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި ޕީޖީ ޝަމީމް ވިދާޅުވީ މި މައްސަލައިގައި މާނަކުރެއްވުން އެނޫން ގޮތަކަށް މާނަކުރައްވައިގެން ހައިކޯޓުން މައްސަލަ ނިންމަވާފައިވާތީ ހިތްހަމަ ނުޖެހުން އެބައޮތް ކަމަށެވެ. އަދި ޚާއްސަ ގާނޫނާއި އާންމު ގާނޫނު އެއްތަނެއްގައި އޮވެއްޖެނަމަ ސުޕްރީމް ކޯޓުން މީގެކުރިން ނިންމަވާފައިވާ ޤަޟިއްޔާތަކުގައި ނިންމަވާފައިވާ ގޮތަކީ ޚާއްސަ ގާނޫނުގައި އެވާހަކަ އެބައޮތްތޯ ބެލުން ކަމަށާއި، އެ ސުވާލުގެ ޖަވާބަކީ އާއެނކޭ ކަމުގައިވާނަމަ ހާއްސަ ގާނޫނަށް އަމަލުކުރަންވާނެ ކަމަށެވެ. އަދި ނޫން ނަމަ އާންމު ގާނޫނަށް ރުޖޫއަވާން ޖެހޭ ކަމަށް ވިދާޅުވިއެވެ.
